Tauaao e Toeava ma lana loia le ripoti a Leoleo

O le vaiaso na te’a nei na fa’ailoa ai e le loia a Vincent Toeava i luma o le Fa’amasinoga Maualuga, lo la tauaaoina lea o le ripoti a Leoleo e uiga i le mataupu o lo o tu’uaia ai le ua molia, fa’atasi ai ma ni isi e to’alua, o le mataupu e fa’atatau i le fa’aaoga fa’agaoi o pepa taumafa (food stamp).

Ina ua valaau le mataupu a Toeava i le vaiaso na te’a nei, na fa’ailoa ai e lana loia ia David Vargas lo la tauaaoina lea o se vaega o le ripoti a Leoleo, ma le fa’amoemoe o le fa’aiuga o le aso lava lea (aso Tofi o le vaiaso na te’a nei) e tauaao atu ai e le malo vaega fa’ai’u o lea ripoti.

O le mataupu a Toeava na tolopo mai i le vaiaso i ona tua atu ma le fa’amoemoe e toe fofogaina i le aso Tofi o le vaiaso na te’a nei, ina ua le mafai e lana loia ona finauina le la talosaga i luma o le Fa’amasinoga, e fa’aitiitia ai le tupe e totogi e tatala ai le ua molia i tua mai le toese i Tafuna.

E $450,000 le tupe ua uma ona fa’atulaga e le Fa’amasinoga Faaitumalo e tatala ai Toeava i tua, peita’i o lo o manatu lana loia e talosaga i le Fa’amasinoga ina ia fa’aitiitia le aofa’i o le tupe e totogi.

I le taulimaina ai e le itu tete’e o le ripoti a Leoleo, na talosagaina ai loa e Vargas ali’i Fa’amasino mo se avanoa e toe tolopo ai le mataupu a Toeava mo se isi taimi o i luma, ina ia maua ai le avanoa la te iloilo ma faitau ai i ripoti, ona fuafua ai loa lea o talosaga e tatau ona tuuina atu i luma o le Fa’amasinoga.

Na fa’amaonia e le loia a le malo ia Robert Morris le saunoaga a Vargas, e tusa ai vaega o le ripoti lea ua mae’a ona tauaao atu i ai, ma le fa’amoemoe o se taimi o le aso lava lea e fa’amae’a atu ai vaega o le ripoti o lo o totoe.

Na talia e Kruse le talosaga ma toe fa’atulaga ai loa le mataupu a Toeava e fofogaina i le masina fou.

E 19 moliaga mamafa o lo o tu’uaia ai e le malo ia Toeava, e mafua mai i le mataupu e pei ona tu’uaia ai o ia ma ni isi se to’alua, i le fa’aaoga fa’asolitulafono o pepa taumafa mai le polokalame mo tagata matutua o loo fa’atautaia e le Matagaluega o Auaunaga ma Tautua Lautele a le malo (DHSS).

O isi e to’alua o lo o tu’uaia fa’atasi ma Toeava i lenei mataupu e aofia ai Jane Vasa, lea ua mae’a ona ta’usala e le Fa’amasinoga Fa’aitumalo i le moliaga mama o le gaoi, ma ua fa’amoemoe o le aso 29 o le masina lenei ua fa’atulaga e lau ai lana fa’asalaga.

O le isi to’atasi, o se ali’i faipisinisi Asia ia Liren Zhang, poo Kevin fo’i e pei ona iloa ai e le to’atele, lea o loo tu’uaia i moliaga mamafa e 17, ma o lo o taofia fo’i o ia i le toese ina ua le mafai ona totogi le $450,000 na fa’atulaga e le fa’amasinoga e tatala ai o ia i tua.

O le iloiloga o le mataupu a Toeava i luma o le Fa’amasinoga i le vaiaso na te’a nei, na poloaina ai loa e Kruse le loia a le malo ia Morris, ia oo mai i le aso Tofi o le vaiaso na te’a nei, le aso 31 o Me ua mae’a ona tuuina atu i le itu tete’e ripoti a Leoleo atoa ai ma mau fa’amaonia uma lava a le malo e uiga i lenei mataupu.

Na fa’asea Vargas i le fa’amasinoga i le vaiaso i ona tua atu, i le le mafai lea ona ia finauina o le talosaga e fa’aitiitia ai le tupe e tatala ai Toeava i tua, ona e le i tuuina atu lava e le malo mau faamaonia e uiga i le latou tagi fa’asaga i lenei mataupu.

Ua toe taofia nei Toeava i le toese e fa’atali ai le aso lea ua fa’atulaga e toe valaau ai lana mataupu i luma o le fa’amasinoga maualuga.