Tatala tuaoi o Amerika Samoa ma fa'afeiloa'i va’a meli turisi i le 2023

Pago Pago - AMERIKA SAMOA

I le fonotaga a le Komiti Fa’afoe o le Koviti 19, sa fa’alauiloa ai fuafuaga a le malo e fa’apea o le a tatala atoatoa e Amerika Samoa ona tuaoi i le aso 1 o Ianuari ma o le a talia le aofa’i o va’a mo meli turisi e 18 i le 2023.

O le masina na te’a nei, na fautuaina ai e le Fa’afoe a le COVID-19 ia Kovana Lemanu P.S. Mauga e toe tatala atoa ai le faigamalaga i Amerika Samoa e aofia ai meli turisi i le 2023.

Talu mai le faaiuga o le 2019, na atili ai ona aafia pisinisi tau turisi i le Teritori ona o le taofia o le ulufale i totonu o  Amerika Samoa ona o puipuiga o le pepesi mai o le COVID-19. O le toe tatalaina o le teritori o le a mafai ai e matagaluega a le malo, pulega ma galuega tumaoti ona sauni mo le toe amataina o meli o turisi asiasi mai e le gata e aumai ai le faitau afe o tagata tafafao i tausaga taʻitasi ae faʻatagaina pisinisi ma tagata faʻatau laiti e faʻatau atu a latou oloa i luga o le uafu.

I le fonotaga a le Task Force i le Aso Lua, Tesema 20, 2022, na taua ai e le Fa’atonusili o le Matagaluega o le Soifua Maloloina, Motusa Tuileama Nua, le sauni atu o le DOH e lagolago le Ofisa o Tagata Asiasi mai Amerika Samoa, Pulega o Uafu ma Malae Va’alele ae maise Ofisa uma e fa’atatau i le fa’afeiloa’ia o tagata tafafao mai fafo i o tatou laufanua ia Ianuari 01, 2023.

Na ta’ua e le Fa’atonusili o le Ofisa o Tagata Asiasi mai i Amerika Samoa ia Taimalelagi Minnue Tuia, ua matua’i fiafia lava o ia e fa’alogo i lea tulaga ona ua sauni le Ofisa Asiasi ma le au fa’atau! Sa ia taua fo’i e fa’apea, o Amerika Samoa o le atunu’u mulimuli lea ia vasa Pasefika o le a tatalaina o latou laufanua i meli turisi asiasi mai. 

Ma o lo’o mana’omia e pulega a nei meli turisi se fa’amaoniga o le a tatala atoatoa e Amerika Samoa ona tuaoi i le tausaga fou ina ia mafai ai ona fa’amautu a latou galuega. 

O le meli turisi muamua mo Amerika Samoa i totonu o le silia i le tolu tausaga ua fa’atulaga e taunu’u mai ai i totonu o le uafu ia Fepuari 2023.

AOFA’I PESIA I LE COVID-19

O se tasi o mataupu na talanoaina e le Komti Fa’afoe o le numera o i latou ua pesia pe ua a’afia i le fa’amai o le COVID-19. 

Ua fa’ailoa e le lipoti a le Matagaluega o le Soifua Maloloina mo le vaiaso mai ia Tesema 12 e o’o atu ia Tesema 18 e toaono i latou ua fa’amonia le pesia i le COVID-19 mai le 54 o i latou na faia su'esu'ega i le DoH Laboratory ma le falema’i o le LBJ Medical Center.

Faaalia e le lipoti e 47 tagata na faia suesuega i le falemai. O le faatonu o le DoH Clinical Service Dr. Elizabeth Lauvao na ia tuuina atu le lipoti i le komiti fa’afoe. 

I le tali atu ai i le fesili a le sui o le task force, na taua ai e Dr. Lauvao e le o ia te ia ni faamaumauga pe o i latou nei e to’afa ua ma’ea ona faia tuipuipui ona o le lipoti lenei mai i le LBJ. Ma o le a ia tulitatao lma le LBJ pe a toe taliu mai i le teritori le toe ta’i i le lipoti. 

E leai se sui mai le LBJ sa auai i le fono i lea aso. 

Ma o le aofai tu’ufa’atasi o i latou ua pesia i le COVID-19 talu mai ona pepesi lenei fa’ama’i i Amerika Samoa ia Fepuari o le tausaga lenei, e 8,272. Ma o lo’o tumau le au maliliu i le 34 talu mai lenei fa’amai oti.

Ole fa'amaumauga mulimuli na fa'amatu'u mai e le malo ile COVID-19 na maua i le aso 01 o Tesema, ma fa'ailoa mai ai o le aofa'i o fa'amaumauga ole COVID-19 sa i ai ile 8,264 fa'ama'i.