Tatala TAOA avanoa fanau aoga e asiasi atu ai i le latou Maketi

I le tatala aloaiaina ai o le Maketi o Galuega Taulima a le Ofisa o Tagata Matutua (TAOA) i le vaiaso nei, na taua ai e le Faatonusili ia Ale Tifimalae le agaga atoa o Tama ma Tina matutua, ina ia maua le avanoa o fanau aoga ma tupulaga talavou e malaga atu ai e molimauina auala o lo o fa’atinoina ai nei galuega taulima, ma malamalama atili ai i le fa’atinoina o galuega fa’a Samoa moni.

O le aso ananafi na fa’ataunu’uina ai lea moemitiga a le Ofisa o le TAOA, ina ua tu’uina atu e le afioga i le ali’i Fa’atonusili ia Ale sana tusi i le Fa’atonusili le tumau o le Matagaluega o Aoga a le malo, e fa’ailoa aloaia atu ai lo latou taliaina lea o fanau aoga e malaga asiasi atu e vaai ma molimauina galuega taulima o lo o fa’atinoina e Tama ma Tina matutua o le atunu’u.

“Talu ai o lea ua tatala aloaia le Maketi mo Galuega Taulima a Tama ma Tina matutua i le vaiaso nei, ua matou tu’uina atu ai lenei valaaulia mo aoga uma a le malo fa’apea ai ma aoga tua, ina ia malaga mai e asiasi, vaavaai ma molimauina auala eseese o lo o fa’atinoina ai e le tagata matutua galuega taulima eseese a le atunu’u”, o se vaega lea o le tusi a Ale i le Fa’atonusili le tumau o le Ofisa o Aoga, susuga Philo Jennings.

O ni isi o tulaga na taua e Ale i lana tusi e mafai ona faatinoina e fanau aoga i le taimi o a latou asiasiga, e aofia ai le vaavaai i soo se galuega taulima ua mae’a ona gasoaia ma ua fa’alauiloa fo’i i totonu o le maketi, mafai ona latou molimauina Tina matutua o lo o galulue i le lalagaina lea ma le gaosiaina o isi galuega taulima e pei o le lalagaina o pulou, fala, ato, ili, ma isi lava ituaiga galuega taulima e aofia ai ma le Elei.

E matai fo’i e le fanau aoga ona latou molimauina Tama matutua o lo o galulue i le vaneina lea o Tanoa palu ‘ava, tootoo, uatogi ma isi lava ituaiga galuega taulima a Samoa, ae maise ai tulaga o le gaseseina lea o le suavai poo le umu.

Talu ai o le laititi o le nofoaga o lo o i ai le Maketi mo Galuega Taulima a Tama ma Tina matutua, ua talosagaina ai le Ofisa o Aoga ina ia lava fanau aoga e to’a 30 e mafai ona malaga atu i le asiasiga, lea e mafai ona fa’ataunu’uina i aso Lua, aso Lulu ma aso Tofi, amata mai i le itula e 8:30 e oo atu i le itula e 11:30 i le taeao lava.

O le a taoto atu lava i aoga ta’itasi mo le fa’atulagaina o pasi ma taumafa mama mo fanau i le taimi o a latou asiasiga.

Na taua e le tofa Ale i le aso na tatalaina ai le Maketi a tagata matutua e fa’apea, o le agaga autu na naunau ai Tama ma Tina matutua e gaosi galuega taulima ma teu i totonu o le nofoaga autu e pei ona i ai nei, ina ia mafai ai ona fa’alauiloa le tele o galuega taulima a Samoa o loo mafai lava ona gaosia i totonu o le atunu’u.

“Talu ai ua amata ona mou malie ese atu le taua o galuega taulima a Samoa i manatu o ni isi o tupulaga talavou a le atunu’u, ua manatu ai le TAOA ina ia toe fa’aolaola ma toe fa’ailoa i fanau le taua o galuega taulima a Samoa”, o le saunoaga lea a Ale i le Samoa News i le aso na tatala aloaia ai le maketi mo galuega taulima.