TATALA FALE'AI O LE TO'ESE - 40 ASO NA TOE FA'ALELEIA AI

O le taeao o le aso Lua na tatala aloa'ia ai le fale'ai o le To'ese i Tafuna ma sa auai atu i ai le mamalu o le faigamalo mo lea fo'i fa'amoemoe taua, ma asiasi atu fo'i ia i latou o nofosala o le atunu'u, e pei ona faia e le faigamalo i lenei vaitau fiafia o tausaga ta'itasi.

O le Tina o le atunuu, Cynthia Moliga sa ia o'otia le lipine e toe tatala aloa'ia ai le fale'ai mo le tausiga lelei o i latou o nofosala ma tuli fa'asalaga ai.

O le Konekarate fou a le susuga TaupauTau Toluono, Triple T dba Pentagon Services na toe fa'aleleia atoa le fale'ai lea o le TCF i le na'o le 40 aso, ina ua loka e le vaega mai le Matagaluega o le Soifua Maloloina le fale'ai ona ua le talafeagai ma aiaiga tau le Soifua Maloloina.

O lenei galuega na fa'afuase'ia lava ona mana'omia ona fa'atino, ma sa fa'akonekarate ai loa lea kamupani faufale ma teufanua latou te fa'atinoa.

"O se meaalofa taua lea mo i latou uma o lo'o tuli fa'asalaga, aua e tatau fo'i ona mautinoa lo outou tausiga lelei, ae manatua fo'i outou uma i nei vaitau fiafia fa'atasi ma aiga. Ia outou iloa, o lo'o alofagia pea outou e i matou uma, ae maise nai o outou pelega. O se taimi taua lenei i mafutaga fa'aleaiga, ae o lea ua outou aumau ai iinei,” o se vaega lea o le tautalaga a le afioga le Kovana Sili, Lolo Matalasi Moliga, i lana saunoaga e tusa o lenei vaitau o le tausaga.

“E tutusa le taga'i a le Atua ia i latou ua nofosala ma i tatou uma o lo'o soifua sa'oloto. E alofa lava le Atua ia i tatou, ae o lenei vaitau, na soifua mai ai le Mesia sa ia fa'asa'oloto i tatou uma mai sese ma agasala. Ia tatou manatua ai i latou uma i lenei vaitau. O e fo'i o gasegase, ia avea oe ma se ua mapu atu i ai ona tiga i sou alofa tula'i ma e tausia lelei i latou."

I le taimi o le saunoaga a le ali'i Komesina o Leoleo, Lei Sonny Thompson, sa ia fa'ailoa atu ai ia i latou uma o tuli fa'asalaga ma nofosala i le To'ese, "O lo'o tele na'ua fa'asea a le atunu'u i le matou va'ai mai pea ia te outou ma lo outou tausiga lelei. Peita'i e ao ina faia ma le alofa tiute uma mo outou. Alolofa ia, faia se suiga lelei ma toe fo'i i mafutaga mafana ma outou aiga. E manatua pea outou i talosaga ma galuega lelei fa'apenei, ina ia vave ona toe fuata'ina le soifua ma mafaufauga lelei, aua se lumana'i manuia fa'atasi ma outou pelega."

O le avanoa o le susuga Taupau, sa ia fa'afetaia ai le mautalitonuina o ia ma lana pisinisi e le ali'i Kovana, ua ia taua'ao atu ai le avanoa mo ia e fa'atino ai lea galuega i le To'ese.

Sa ia fa'afetaia fo'i le lagolagosua atu o nisi o uso a pisinisi i le latou taumafaiga ua vave ai ona mae'a ae silisili lana fa'afetai i lana aufaigaluega i le vave ona latou fa'atino o le galuega i le malosi ua maua ma le tomai ua agava'a ai.

E le'i ta'ua lava le tau o lenei galuega i so'o se tasi na saunoa fa'apitoa i le aso na tatala ai le fale'ai lea, peita'i, e i ai le talosaga sa fa'ao'o ane e ali'i ma tama'ita'i o lo'o nofosala i le Toese e ala i le latou skids ma pesega. E fia maua lava se avanoa e fa'atutu atu aga'i i le tupulaga o lo'o tulifa'asalaga, e fa'afiafia atili ai i latou.

Ua fa'ailoa mai lava e se tasi o i latou talavou nei, "E sili ai le matou o atu e piki le lapisi ta'atia i autafa o le alatele, e avea ma matou tautua i aso ta'itasi, ma totogia ai i matou e le malo ao tulifa'asalaga i le To'ese."

Na faia fa'afiafiaga a i latou i le To'ese fa'apea fo'i ma fa'afiafiaga ma pesega a le DHSS Choir a'o fa'atautaia le mafutaga ma le faigamalo.