Tatala fale fou mo galuega a le Koluse Mumu i Amerika Samoa

Ua iloga, o le Koluse Mumu e fa’aaogaina tele e fitafita tiute ma fitafita fa’aagaaga a se vaega au a le Malo tele. O i latou foi sa auai i le aso ananafi i le tatalaina o le fale fou o le Koluse Mumu.

[ata: Leua Aiono Frost]

Na talimalo le Komiti Fa’afoe o le Koluse Mumu i Amerika Samoa, o lo’o galulue soo tau’au ma le Koluse Mumu i San Diego, lea sa malaga fa’apitoa mai ai lona sui e molimau le tatala aloa’ia ai o le fale fou o le Koluse Mumu i le atunu’u.

O lenei fale sa fa’atuina na’o sina tama’i avanoa e faia atoa ai le tele o galuega e tautuaina ai le atunu’u i vaitau o fa’alavelave fa’afuase’i e a’afia ai le tele o aiga o le atunu’u, pe na’o se aiga fo’i ua oo fa’afuase’i i ai fa’alavelave le ma’alofia, ma fa’atama’ia ai se falenofo, o taimi ia e tule’i mai ai le Koluse Mumu ma a’atino le latou matafaioi, o le lavea’i ma fesoasoani atu.

O le tauaofai o le galuega e tolu ala sa fa’atupe mai ai. O le vaega muamua sa aumai e le Koluse Mumu  i San Diego, i lona aotelega e $35,000 i le 2014. O le sao o tagala lautele sa fa’aaoga ai ala e sailia ai tupe e fa’aaoga ai le a’ao foa’i o le atunuu. Sa faia Koneseti a le “Dancing Fingers Production” lea e fa’auluulu ia Poe Mageo, ae foa’i ai le lautele o le atunu’u ma maimoa i lea koneseti, ma fai ‘aiga ai fo’i.

Lona lua o sailiga e ala i Radiothon mai le lautele  ma maua le tu’ufa’atasiga e $47,542.77. Tapenaga a le malo ma ona matagaluega eseese ua maua ai le $93,413.97.

Tu’ufa’atasiga o le seleni e fausia ai fale, ae le taulia ai e na galulue fua e le totogia, o mea na foa’i mai e Kamupani e le totogia, o taimi o tagata faigaluega e le’i totogia ae na ofo mai ai Kamupani tumaoti ma tagata faigaluega ale Malo, o le tinoitupe lava na maua e $174,156.74.

Peita’i, a’o le’i mae’a le tautalaga a le Taitaifono o le Komiti Fa’afoe - Vaito’a Hans Langkilde, sa ia toe fa’ailoa mai ai, le faleteuoloa a le Koluse Mumu o lo’o tutula’i i lea lava lotoa, ua tutulu fo’i ma ua mana’omia ona suia atoa lona taualuga. O lea galuega ua manatu ina ia toe fa’aleleia i le tausaga nei lava, o lea fo’i ua amatalia ae le’i mae’a, o le tinoitupe ua taua’aoina mai e le Koluse Mumu mo lea galuega e $37,900.

Pe afai e mae’a lelei uma nei galuega i le lotoa nei, aua o lea ua mae’a tutula’i le maota mo le Ofisa Tutotonu o le Koluse Mumu, o le tupe aofai e alu ai i lenei tausaga e silia i le $211,000.

O lo ua fa’ailoa mai, o le a toe talatala lelei atoaga o mea uma e oo i kamupani tumaoti ma o latou sao, ae maise ai le Kamupani sa fa’aaogaina mo le fausia o lenei galuega mai lona amataga, Lesa Lolo Pilimai ma le Pacific Refrigeration - sa faia le galuega e aunoa ma se totogi mo i latou, na tele fo’i se sao o le Paramount Builders i tagata faigaluega fa’apea nisi o sapalai o mea na fa’aaoga mo le galuega lenei ua tutula’i fa’apea ma isi kamupani.

Ina ua maea le tala o le galuega sa nafa ma le tofa Vaito’a ona saunoa lea o Victor Roosen mai San Diego e fa’amalo ma fa’afetai i tagata lautele, Kamupani Tumaoti ae maise o le Malo o Amerika Samoa ona o lo tatou sao i le Koluse Mumu.

Sa ia toe fa’atepa le mamalu na aofia i le galuega faifaipea a le Koluse Mumu i so’o se tasi “Ia Fa’asao ma Puipui mai Tagata mai A’afiaga Tuga!” O le mafuaga tonu lena e tuila’i mai ai le Koluse Mumu ma fesoasoani e le fa’atuaoia.

O lana toe upu, “Fa’afetai Amerika Samoa, ua iloga lo outou a’ao foa’i ona o lenei fale ua tutula’i, e fai ma ofisa auto ma le mautu o le Koluse Mumu i lo outou laufanua nei.”

O se isi vaega o lana tautalaga, sa ia momolita’i mai ai alofa’aga o nisi o i latou sa mua’i oo mai i le 2009, i le Tsunami sa tatou lutia ai, ma ua fa’ailoa mai lo latou fiafia tele ua mautu le Ofisa.

O le tautalaga a le afioga le Kovana Sili sa toe fafagu mai ai le taimi ua tuana’i i le tau amataga o le Koluse Mumu i le atunu’u, sa ia toe fa’atepa ai le to’atele i le galuega sa mafuli i ai le tina o Fa’au’uga Lutu-Achica fa’apea ma le tama matua o Fuimaono Asuemu Ulufaleilupe mo le tele o tausaga. Lea ua tutula’i nei, ua atili ona mautu, ma ua maua fo’i nofoaga lelei e tautuaina le atunu’u.

“Pe ana fai e le mae’a le galuega lenei i le tausaga nei, sa ou fa’ailoa lava i le Taitaifono o le Komiti Fa’afoe, o le a toe to’ese le fanua o le malo, peita’i o lea ua tatou aeae nei manu ua ulu, fa’afetai i le galulue a le Komiti Fa’afoe. Peita’i, ua va’aia ua matutua i latou, ua tatau ona gasolo mai le tupulaga talavou o le atunu’u, e amata ona tautua o tatou tagata, ma fa’ailoa ia i latou le aoga o le tautua e le totogia ma ona fa’amanuiaga e tele, pe afai e faia ma le loto fa’apea ma le fa’amaoni.”

O le afioga le Kovana Sili, a’o le’i filifilia e avea ma Kovana i le tausaga 2013, sa avea ma taita’ifono o le Koluse Mumu, ma o lana lea poloketi na mafaufauina, o se fale mo le Kolusu Mumu.

O pese ma vi’iga o le sauniga sa taina fa’apitoa lea e le Dancing Fingers Production ma lona ta’ita’i o Poe Mageo, o se tasi fo’i o totonu o le Koluse Mumu, ae o vigia sa fofogaina lea e le tama’ita’i Faia’oga o le Arts i le Kolisi Tu’ufa’atasi, Ms. Regina Meredith.

Sa auai fo’i le to’atele o sui faigaluega volenitia a le Koluse Mumu i lea lava sauniga tele ma sa latou fa’asoa mai fo’i taumafa matagofie mo le talisuaga ina ua mae’a asiasia le latou fale fou e le mamalu na auai.