Tatala aloaia vaiaso fa’apitoa e fa’atauaina ai le sao o tupulaga i le atunu’u

I le fa’aauauina ai pea o polokalame a le malo e fa’atauaina ai tupulaga talavou i totonu o le atunu’u i le masina lenei o Iulai, o le taeao ananafi na tatala aloaia ai le polokalame fa’apitoa mo tupulaga talavou i lenei tausaga, i le maota o Tupulaga Talavou i Pago Pago.

E silia i le to’a 200 tupulaga talavou ua mafai ona lesitalaina mo lenei polokalame, lea o lo o filifilia mai i fanau e to’a 800 ua mae’a ona lesitalaina i le polokalame a le malo, lea e galulue ai fanau aoga i matagaluega a le malo ma kamupani tua (summer youth employment program - SYEP).

Sa auai i le tatalaina o lenei polokalame le afioga i le ali’i kovana ia Lolo Matalasi Moliga ma sui o lana Kapeneta. Sa fa’apea fo’i ona auai sui mai le Ofisa o Mataupu Tau Samoa, e aofia ai le Failautusi, le afioga i le Maoputasi ia Mauga Tasi Asuega ma le Kovana o le Falelima i Manu’a, le afioga i le Fa’atui ia Laolagi Fonoti Savali Vaeao.

O le sauniga lotu e tatala aloaia ai le polokalame na saunia lea e le susuga i le ali’i Faifeau ia Pastor Lauli’i Anapu, o le Feagaiga o le Ekalesia Aso Fitu o le Toe Afio mai i Pago Pago, lea sa ia fa’atauaina ai le tatau lea i tupulaga talavou ona fa’alagolago o latou olaga i le Atua, pau lea o le auala e mafai ai ona fa’amanuiaina a latou taumafaiga i le lumana’i.

O le Faatonusili o le Matagaluega o Tupulaga Talavou, Tina ma Tama’ita’i a le malo, susuga Jonathan Fanene na saunoa i le saunoaga amata o le aso, lea na ia fa’afetaia ai le afioga i le ali’i kovana ia Lolo, ona o le polokalame ua mafai ai ona fa’ataua le sao o tupulaga talavou i le atunu’u.

“O le fa’aauau pea o galuega a le malo e fa’atutu atina’e atoa ai ma le fa’atinoina o polokalame e fesoasoani ai i le atina’eina o tupulaga talavou i le atunu’u, o le ata vaaia lea o le naunau pea o le malo e ave lana fa’amuamua i le fa’atauaina o tupulaga talavou, aua o i latou ia e tua i ai le lumana’i o le atunu’u”, o le saunoaga lea a Fanene.

I le autu ai o le polokalame mo tupulaga talavou i lenei tausaga i le manatu filifilia “Fa’amalosia a’u ina ia ou Fa’aosofia ai oe” (Empower me to Inspire you), na saunoa ai le ali’i kovana e fa’apea, soo se malo lava e naunau e tapu’e olaga o ana tupulaga talavou ina ia manuia, o le malo atamai lena.

“E mafua ona fa’aalu e se malo meatotino e tele e tapu’e ai olaga o tupulaga talavou, aua fo’i o tupulaga talavou o le lumana’i lea o soo se malo. Afai la e lelei ma manuia olaga o tupulaga talavou, o le a manuia fo’i ma lelei le malo”, o se vaega lea o le saunoaga a le ali’i kovana.

“O le a’oa’oina o fanau ma tupulaga talavou ina ia lelei ma manuia o latou olaga, e amata mai lava i le aiga, lotu ma le nu’u, ona mafai ai loa lea ona avea i latou ma fetu pupula i totonu o le malo”.

“E fa’apefea la ona tapu’e olaga o fanau, o le tali, e amata mai i le galuega a matua, aoao fanau i ala o le Atua, sosoo atu ai ma Ekalesia, totonu o potu aoga, seia oo lava ina faamanuiaina la latou taumafaiga, ma avea ai loa ma auala e manuia atu ai ma le malo, aua ne’i galo, o tupulaga talavou e fa’alagolago i ai le manuia o le malo, afai e fa’aletonu la tatou pito laau, o le a fa’aletonu fo’i le lumana’i o tupulaga talavou, fa’aletonu atu ai ma le malo”.

Na taua e le afioga i le kovana e fa’apea, e afua loa ona le manuia fuafuaga fa’ataoto a le malo, e mafua mai ina ua le lelei le a’oa’oina atoa ai ma le tapu’eina o olaga ma mafaufau o tupulaga talavou.

O ni isi o vaega o le polokalame mo tupulaga talavou mo le 2 vaiaso ua amataina nei, e aofia ai le maua o le avanoa e a’oa’oina ai i latou i auaunaga eseese i totonu o le malo, ina ia mafai ai ona fa’aa’upegaina i latou i metotia eseese o loo fa’atautaia ai tautua i totonu o le malo mai matagaluega eseese atoa ai ma pisinisi tua.