Tatala aloaia vaega mulimuli o le tauaofiaga lona 38 a le Fono Faitulafono

Pago Pago - AMERIKA SAMOA

O le taeao o le aso Gafua na se’i mavae atu nei, sa toe tatalaina aloaia ai le vaega mulimuli, o tauaofiaga lona 38 a le Fono Faitulafono a Amerika Samoa, i le Fale Laumei i Utulei.

Ma na fa’alauiloa ai e le afioga i le Fofoga Fetalai, ia Savali Talavou Ale se maliliega ma le Peresetene o le Senate, le afioga Tuaolo Manaia Fruean, le avea o lenei vaega o fonotaga ma vaega mulimuli o le Tauaofiaga lona 38 a le Fono Faitulafono.

Ma o le mafua’aga lea o le fa’ataunu’uina o le sauniga tu’ufa’atasi i le aso Gafua, Iulai 8, 2024, aua le saunoaga fa’alemalo a le kovana, mo le fa’alauiloaina mai o nisi o mataupu o le a iloiloina i fonotaga o loma nei a maota e lua, e aofia ai ma le paketi o le 2015.

Na aofia potopoto afioga i Senatoa ma Faipule i le taeao o le aso Gafua faatasi ai ma taitai o le malo, atoa ai ma le tofa ia Fata Brian Kaio, le Konesula a Samoa i totonu o Amerika Samoa.

I le saunoaga a le Fa’aao o le malo, le afioga Lemanu P. S. Mauga, sa ia fa’alauiloa mai ai e faapea, “O le taua o lenei tauaofiaga faaletulafono, ona o le ta fa tausaga taufa’ai’ui’u.  Sa amata mai lava i le Koviti 19, le matuia o lea faama’i, na maliliu ai le toatele o le atunu’u, sa saisaitia ai le to’atele o le atunu’u, ua le mafai ona toe fo’i mai fanua ma eleele ona ua tapunia malaevaalele, aemaise o le tele o saisaitiaga.”

Sa saunoa foi le afioga i le Kovana le “faatupula’i mai ai le tele o fuafuaga a le ta malo ile vaitaimi lenei ile agai i luma.  O le tele o tapenaga ma fuafuaga ua aooga mai ma outou silafia, e iai se suiga, iai laasaga fou, e tatau ona o’o iai le faigamalo, aua le tautuaina o le atunuu.  Soifuaga sa o’o iai le nofoaiga, le mamalu o si o tatou atunuu ma o lo’o tatou soifua ai pea i isi o nei suiga.”

 Na fa’alauiloa mai foi e le Fa’aao o le Malo e faapea, “Sa toe ola mai le atunuu i lona malosi, ona o tapenaga faaletino a la ta faigamalo.  Ma o lea lava e tau faauma le tele o isi fuafuaga, e toe ta’u atu ai i le atunuu, e le o mate le faigamalo ae o lo’o malosi le faigamalo a Tutuila ma Manu’a, i so’o se itu.  I lana tautua fa’aolaola, ae o le lumanai manuia o Amerika Samoa.”

Saunoa le afioga Lemanu i le “mamalu o le fono faitulafono, o lenei fa 4 tausaga tau fa’ai’ui’u, sa ta galulue faatasi e fofo faafitauli matuia, sa saili tulaga o le alamanuia, ala puipuia, soifua maloloina aemaise le tapenaga o fanau aua le lumanai, o si o tatou atunu’u.  A toe ta tepa i tua i nisi o pili fa’aofi sa pasia ma isi o tele o anoano o pili sa fa’aulu.  E momoli atu ai le agaga fa’afetai.”

Sa faapea foi ona ia fa’aleoina nisi o galuega taua na mafai ona fa’atinoina e ala i le galulue faatasi a le Faigamalo ma le Fono Faitulafono, na aofia ai “Pili sa pasia e fa’aitiitia ai totogi 160 kolisi ma iunivesite a Amerika i fanau a Amerika Samoa.  Faalaiseneina o vaa fagota i Amerika Samoa, mo le fa’aolaolaina o le tatou gatafaile (vaa purse seiners).  Faasaina o ‘styrofoams’ aua le puipuia o le lotoifale ma le siosiomaga.  Fatulafonoina o tatou tuaau e fai ma vaega taua, mea totino ale malo e mafai ai ona faasaoina mai ia nei tuaau pe iai ni faalavelave e fa’aleagaina ai, fesoasoani mai foi le malo tele e ala i le FEMA.”

Sa ta’ua foi e Lemanu, le ‘iai foi o le tele o isi pili taufa’aofi ua pasia e le maota fono aua lava le faamoemoe a Amerika Samoa.  O isi [o] fuafuaga tetele aemaise faamanuiaga lautele mo le atunu’u.  Tele o galuega ua uma, tele o galuega o lo’o tau fa’auma.”

“Tafatolu o le Faigamalo, o lo’o tau fa’auma pea le maota fono i nofoaga a le malo, lea o le a tatala maota o faamasinoga, tau faauma pea le maota faamalosi tulafono, faapea le maota o le malo faalotoifale, i Utulei.”

O nisi o galuega o lo’o foufou mai, e aofia ai maota mo kovana fa’aitumalo, i Fagaitua mo le itu i Sasa’e, ae i Leone mo le itu i Sisifo.  Atoa ai ma le fa’aauau pea ona tapenapenaina maota o le malo o lo’o faamautu iai le Kovana ma le Lutena Kovana.

Sa ia ta’ua foi le amataina o le galuega i Taumeasina i Samoa, aua le ofisa o le malo a Amerika Samoa.

Sa saunoa foi Lemanu, “Leai se nu’u ma se afioaga o tu ai se a’oga, e le’i o’o iai le faigamalo…ua aofia ai ma Manu’a.”

“Tele o galuega ua uma, ae o lo’o tau faauma le tele o isi galuega,” e aofia ai foi ele ofisa autu a le DOE, o le fale tele a le School Lunch, faapea ma le tele o isi galuega fuafuaina mo potu aoga fou ma ni isi o fuafuaga mo le tele o aoga, e aofia ai ma a’oga tua (private schools), faapea ma le Kolisi a Amerika Samoa (ASCC).

“E ui ina o lo’o tau fa’amae’a le tele o galuega a le matagaluega o aoga ma le Kolisi, o lo’o sologa manuia lava tulaga o aoga a le atunu’u,” o a Lemanu lea.

“O ni isi galuega lautele aua le malu puipuia ma le faaleleia o le atunu’u, o auala, o auala savali, taligalu ma auala laupapa, uafu, malaevaalele, fale o le malo, paka taalo a le malo…o la ta nofoaiga lenei, i le fa tausaga.”

Faapea foi le fa’aleleia o auala tele i le tele o nu’u ma afioaga faapea i Manu’a, o lo’o tau faamae’ae’a. 

“O lo o taumafai pea lava ona fa’aolaola ma puipuia tulaga o mea taumafa mo le atunu’u, I aso uma ma aso faigata.  Sa tatou a’o’oga mai foi i lea tulaga i le vaitaimi o le koviti.  Sa taitasi va’a ona agai mai i Amerika Samoa.  Sioki le tele o meaai.”

Na saunoa Lemanu, “E pei ona silafia taumafaiga o lenei faamoemoe, le fesootaiga faavaomalo a Amerika Samoa ma Samoa, po o le Atoa o Samoa, o lena o lo’o iai le maliliega ma le fesoasoani fegalegalea’i, e le gata i figota o le sami, ae faapea foi fua o fa’aeleeleaga, aua le toe toe atina’eina o le Food Security a Amerika Samoa.”

“O nei lava fuafuaga, o le toe tagai i le Gataifale ma le eleele>”

Sa ia ta’ua foi le taunuu mai o le Super Alia i le masina ua tuanai, aua le toe atinae ma faaolaolaina o tiute a le au faifaiva, “aua lo latou foi pito laau i tulaga o le taumafa a le atunuu aemaise i’a faatau mo i latou.”

E tusa ai ma le Fa’aaliga o Tu ma Agaifanua a le Pasefika lea na fa’ato’a mae’a atu, i Hawai, sa fa’aalia e le afioga i le Kovana lona agaga mitamita ma le fa’afetai, ina “ua logologoa le vasa pasefika ae o le lalolagi i le manaia o faafiafiaga ae o pesepesega sa tapena atu iai le atunuu i lea faamoemoe.”

E le gata i lea o le ‘Samoa Heritage’ lea na soso’o mai ai, lea sa mafai ona auai atu ai le Tamaitai Palemai mai Samoa ma le to’atele o le malo ma le atunu’u, “sa momoli mai ai o latou lagona ma agaga galulue faatasi a Samoa ma Amerika Samoa.  Momoli mai ai le agaga faafetai ia Amerika Samoa ona o lenei tapenaga ma le faamoemoe, ua le na o Amerika Samoa ae o Samoa atoa.”

Sa saunoa foi le afioga i le Kovana, i le faamanatuina o le 30 tausaga o le polokalama a le ASNAP (American Samoa Nutrition Assistance Program) i lenei masina.  O se polokalama feterale sa mafai ona feutaga’i e le afioga i le Kovana A. P. Lutali ma le afioga ia Faleomavaega Eni Hunkin ia Ianuari 1993, ma le malo feterale.

Ae o le masina o Iulai 1994 sa tatalaina ai loa lenei polokalama i totonu o Amerika Samoa.

Sa faapea foi ona saunoa fa’alaua’itele le afioga i le Kovana i fuafuaga tau atina’e a le ASPA, e talifuaitau i le taugata o le suau’u, atoa ai ma auala mo le fa’aleleia atili o le tautua tau i le suavai ma le suavai lafoa’i.

O tautua faalesoifua maloloina i le LBJ, sa faapea ona aofia i le saunoaga a le Kovana ma le tele o polokalama ua faamoemoe e amataina i se taimi lata mai, e ala mai i tupe maua ua faamanuiaina ai le LBJ ma le DOH.

I le faaiuga o lana tautalaga, na toe faaleoina ai e le afioga i le Kovana, lona agaga faafetai i le Fono Faitulafono faapea le vaega o Faamasinoga, mo la latou fesoasoani i lana Faigamalo, i le fa tausaga ua mae’a atu.