Tatala aloa’ia polokalame “Samoan Heritage” i Honolulu

Pago Pago - AMERIKA SAMOA

O le Aso Toana’i o le fa’aiuga o le vaiaso sa tatala aloa’ia ai e le malo o Amerika Samoa lana polokalame o le Samoan Heritage Festival 2023 i le Keehi Lagoon Park i Honolulu. 

I se pepa o fa’amatalaga mai le Ofisa o le Kovana, sa fa’ailoa ai na amata le sauniga i se solo mata’ina na ta’ita’ia e le Fa’aili iloga a le US Marine Corps, sosoo ai ma le Tausala o Samoa-Hawaii ma Miss Samoa Tribal Council - Alaska. O afioaga o Samoa, Autalavou a Ekalesia Samoa i Hawaii, o fanau a’oga e tupuga mai i Samoa o loo aooga i kolisi eseese i Hawaii, ma le anoano o isi, ua faaalia ai lo latou mitamita ma le faamaoni i o latou tofi tuufaasolo.

O le sui failautusi o le Ofisa o Mataupu Tau Samoa ia Tauese V. Sunia na faafeiloaia le mamalu o le auvalaaulia i fa’alupega aloaia ma amata ai loa le tatalaina aloaia o le Fa’afiafiaga.

O le tatalo na fofogaina e le susuga i le Faife’au Toeaina Falelua Lafitaga o le Ekalesia Fa’apotopotoga Kerisiano i Amerika Samoa (CCCAS) Kanan Fou i Kunia, o ia lea na fa’ata’atia ai le fa’atamaoaigaina o le agaga, mo le sailia o fa’amanuiaga mo le lotogatasi ma le fa’asaoina o tu ma aga i le taimi atoa o fa’afiafiaga.

O le afioga i le ali’i Kovana o Amerika Samoa ia Lemanu P. S. Mauga na ia saunoa i se saunoaga fa’amomoiloto e fa’amamafa ai le sootaga le motusia o lo o tu’ufa’atasia ai tagata Samoa, tusa lava po o le a le mamao e valavala ai i latou. “O le saunoaga a le Afioga Tui Atua Tupua Tamasese Efi: ‘O tatou o tagata Samoa e tasi: Tutuila, Upolu, Manu’a, Savai’i, Olohenga, Manono ma Apolima. E tasi lo ta Ali, tasi lo ta fala. E tasi lo ta Aganu’u, tasi la ta Gagana. E tasi fo’i lo ta Atua.’ Po’o Hawaii po’o so’o se mea o le lalolagi, e tasi lava i tatou.”

Na fa’ailoa fo’i e Lemanu le taua tele o lenei fa’atasiga o se avanoa e fa’amalosia ai so’otaga o lo’o fusifusia ai tagata Samoa i le lalolagi atoa, ma fa’atauaina a latou tu ma aga fa’atasi. Na ia ta’ua, “O le Samoan Heritage Initiative e taua tele ona e tautuaina e faamamalu, a’oa’o, ma olioli i tu ma aga ua tuufaasolo mai ia i tatou, ma mautinoa e faasaoina ma faapelepeleina mo le manuia o tupulaga o le lumanai.”

O le kovana o Hawaii, Josh Green, sa auai i lenei sauniga ma ia fa’ailoa le agaga fa’afetai i le atunu’u o Samoa ona o le tele o lo latou sao mo Hawaii, aemaise lava i taimi faigata e pei o le COVID Pandemic. Na ia fa’ailoa le taua tele o le sao o tagata Samoa i totonu o le malo ma olaga o tagata o Hawaii, e fa’aalia ai le agaga o Ohana ma le loto gatasi i le va o tagata Samoa ma o latou uso a tagata Hawaii.

I se fa'ailoga iloga, na sainia ai e Greene se Poloaiga, e fa'ailoa aloaia ai le aso 29 o Iulai, 2023 e o'o atu i le aso 1 o Aukuso, 2023 o le Samoan Heritage Iniative i Hawaii, e fa'amanatu ai le sao taua o tu ma aga a tagata Samoa i le setete. Sa ia tauaaoina atu le Poloaiga ia Lemanu.

Na taua e Lemanu lona agaga fa’afetai i le afioga i le ali’i kovana ia Green, ona o lana lagolago i tagata Samoa e le gata i Hawaii, ae fa’apea fo’i i le teritori. 

I le fa’ai’uga o le sauniga, na fa’ataunu’u ai loa se sauniga fa’ale-aganu’u o le Ava, e fa’ailoa ai se tu’utu’uga paia o le mafutaga fa’alenu’u ma le fa’aaloalo. Mulimuli ane, na faamavae atu ai le Kovana Green e pei ona iai ana fuafuaga mo femalagaaiga. A’o le’i malaga ese atu le ali’i kovana ia Lemanu, na tauaao atu e Kovana Green ni meaalofa mo le malaga ese atu, ma sa auai ta’ita’i fa’aaloalogia i se ata pu’eina o lea fa’amanatuga fa’amanatu.