Tapunia Starkist Samoa mo le lua vaiaso mo aso fiafia

Ina ua fesiligia e le Samoa News i le vaiaso ua te’a, sa fa’amonia mai ai e Michelle Faist,  le so’oupu a le StarKist Inc., i lo latou ofisa autu i Amerika, e fa’apea o le aso mulimuli o galuega i le StarKist Samoa o le aso 20 o Tesema, ae fa’atoa toe amatalia galuega i le as 6 o Ianuari i le tausaga fou 2020.

I lea lua vaiaso e malolo ai, ua fa’amoemoe le kamupani e faia ai galuega mo le fa’alelei o masini ma nisi tulaga i le kamupani ae le’i toe ‘ae mai galuega i le tausaga fou. E le’i mafai ona fa’ailoa ai e Faist pe o a tonu galuega fa’aleleia o lo’o fuafuaina e le kamupani. Ae peitai e i ai pea na o se vaega itiiti o tagata faigaluega i le kamupani.

O le vaitau e tapunia ai le StarKist Samoa, e aafia atu ai ma isi pisinisi o lo’o tautuaina kamupani ‘ia, e pei o pasi la’upasese ma le kamupani gaosia apa i Satala, le Talofa Systems American Samoa, lea galulue ai tagata e tusa ma le 200.

Ma o le taimi foi e malolo ai galuega i lenei vaitau o le toatele o i latou mai le StarKist Samoa e malaga i Samoa mo aso fiafia. Ae talu ai nisi o tulafono a le malo o Amerika Samoa mo tagata malaga i Samoa ona o le misela, e le o mautinoa pe toatele nisi e malaga i Apia i lenei tausaga.

I se lipoti mai le Malae Va’alele i Tafuna o lo’o fa’ailoa mai ai le tau le i ai o ni tagata malaga mai Samoa, ona o tulafono a Amerika Samoa mo tagata malaga mai Samoa, ona o le pepesi o le misela.

I malaga a le va’a a le malo o Samoa, le Lady Naomi, ua le toe i ai ni tagata e malaga mai Apia e pei o se fa’aiuga a le Samoa Shipping Corporation ona o tulafono a Amerika Samoa mo lenei vaitau i le pepesi o le misela.

Ae ua fa’amonia mai e le Polynesian Shipping i Amerika Samoa, o lo’o mafai pea ona malaga le Lady Naomi i Apia ma ave pasese, e pei o le malaga i le aso Tofi ua te’a.

Mo le vaiaso lenei, o le a leai se malaga a le Lady Naomi, ae fa’atoa fa’ataunu’uina i le vaiaso muamua o Ianuari i le tausaga fou.