Tapenaga o le 75 tausaga o le Fono Faitulafono

Pago Pago - AMERIKA SAMOA

Ua tofia ai nei e ta’ita’i o le Fono le komiti fa’apitoa e to’aono ona totino - e ta’itoatolu mai le Maota Maualuga ma le Maota o Sui e tapena mai a latou lipoti ma fuafuaga mo le faamanatuina o le 75 tausaga talu ona faavae le Fono Faitulafono a Amerika Samoa.

I le tauaofiaga a le Senate i le Aso Faraile ua te’a, na folafola ai e le afioga i le Peresetene o le Maota Maualuga, Tuaolo Manaia Fruean, lona tofia ai o afioga i Senatoa ia Fai’ivae Iuli Godinet, Satele Lili’o Aliita’i ma Malaepule Saite Moliga, ole toatolu a le Maota o le Senate mo le Komiti o tapenaga.

Ma o le’a galulue faatasi ma le to’atolu mai le Maota o Sui, e aofia ai afioga i faipule ia Vailoata E. Amituana’i, Sam Meleisea  ma Malaeoletalu Melesio Gurr.

O le komiti lea ua tuu atu iai le avega i se latou lipoti, o le tapenaga mo le Fono e Iloilo, faatatau i le Aso Fa’amanatu o le Fono. 

E leai se taimi faatapulaa na ave i le komiti e avane ai le latou lipoti i le Fono.

E $1 miliona ua atofa mo le fa’amanatuina o le 75 Tausaga o le Fono Faitulafono, o loo aofia i totonu o le tala o le Tupe Fa’asoasoa Faaopopo a le Kovana,  e $7.4 miliona. 

Na faailoa e le afioga a Tuaolo i le maota o le Senate ile amataga o le masina o Ianuari, o loo tilotilo taitai ile masina o Iuni, e faia ai le aso fiafia, e o faatasi ma le tatalaga aloaia o le Maota fono fou o loo fausia nei.