Tapa e le Ofisa Loia Sili faamaumauga i le malaga ese atu o le vaa o le KITE RUNNER mo Samoa

Pago Pago - AMERIKA SAMOA

E o’o mai lava i le Aso Gafua o le vaiaso ua mavae, Iuni 26, o lo o faatalitali lava le Ofisa o le Loia Sili i faamaumauga mai i le Ofisa o Uafu ma Malae Vaalele faapea le Ofisa o lo o mataituina le saogalemu o tuaoi o Amerika Samoa (Dept. of Homeland Security), i faamaumauga e faatatau i le faimalaga ese atu o le va’a o le Kite Runner, mai Amerika Samoa mo le malo Tutoatasi o Samoa.

O le aso 23 o Iuni, 2023, o le aso faatulagaina lea e faamuta ai le faauluina mai o se ripoti e tusa ai ma lenei mataupu, e pei ona faamautuina mai e le sui Loia Sili ia Roy J.D. Hall, i sana imeli na faaooina atu i Faatonusili o matagaluega e lua, i le aso 16 o Iuni, 2023.

Ua mafua lenei suesuega a le Ofisa a le Loia Sili, ona o se tala sa lomia i le Samoa Observer, lea na ta’ua ai le sopoia e se va’a o lo o resitala i Amerika Saamoa, o le Kite Runner, ia ogasami o Samoa ia Aperila o le tausaga nei, ma pueina e leoleo a Samoa.

E tusa ai ma se ripoti a le Observer, sa o latou maua se faamatalagaa mai i se sui o le malo o Samoa, e tusa ai ma le masalomia o se tasi o Minisita o le malo o Samoa, i le faia o faamaumauga lea na mafai ai ona ulufale atu lenei va’a i ogasami o Upolu ma Savaii.

O le va’a lenei o le Kite Runner, o se meatotino a le susuga Papalii Laulii Alofa ma sa faimalaga atu i Samoa ia Aperila 2023 ma se uta mo se faalavelave a lona aiga i Savaii. Ae peitai, na taofia e leoleo i Savaii ona o le leai o ni faamaumauga manaomia mo le faigamalaga, ae peitai na toe tatalaina le va’a i se taimi mulimuli ane.

Na ta’ua e sui o le Ofisa o Uafu a Samoa, o le mafuaaga na taofia ai le vaa i le uafu i Apia, ona e le i iai se kilia mai Pago Pago.  O le kilia lea e saini e le Ofisa o Uafu ma le Ofisa o le Customs, ma sa faato’a maua ina ua taunuu le vaa i Apia.

O iina la lea na tapa ai loa e le Ofisa o le Loia Sili ia faamaumauga o lenei mataupu, ae le gata i lea, o le iloiloina o tulafono faalauaitele mo vaa e ulufale mai ma ulufafo atu mai i uafu o Pago Pago.

Na ta’ua e le sui Loia Sili ia Hall i lana imeli, le faatonuina o lo latou ofisa ina ia fesoasoani i suesuega o le tu’ua e le Kite Runner o le uafu i Pago Pago ma agai atu i le uafu i Apia faapea ma le toe taliu mai o le vaa i Pago Pago.

O faamaumauga sa tapaina pe sa talosagaina e Hall mai ofisa o le malo, e aofia ai faamaumauga i le pule resitala o le va’a, o laisene o le va’a, o ata o le va’a, o faamaumauga i le taimi na tuua ai e le vaa ia le uafu i Pago Pago ma le kilia mai le uafu i Apia.  Sa talosagaina foi faamaumauga po o kilia i le taimi na tuua ai e le vaa ia le uafu i Apia mo le toe foi mai i Pago Pago.  Faatasi ai ma kilia i le taimi na taula ai le vaa i le uafu i Pago Pago.

O isi faamaumauga sa tapaina e Hall ma le Ofisa o le Loia Sili, o le igoa o le kapeteni o le va’a ma lana laisene ave va’a po o lana laisene e na te faafoena ai so’o se va’a.

Na auiliiliina le talosaga a Hall i lana imeli, e ala lea i lona tapaina o faamaumauga o lo o faailoa mai ai kilia mo le Kite Runner, le aso ma le taimi na tatau ai ona tu’ua le uafu i Pago Pago mo le uafu i Apia, ma le aso ma le taimi sa tatau ona taunuu pe malaga ese mai ai mai I le uafu i Apia.

E le gata i lea, o faamaumauga i taimi ma aso na kilia ai e le aufaigaluega a le uafu a le teritori ia le vaa mo lona faimalaga ese atu mai i le uafu i Pago Pago mo le uafu i Apia, e tusa lava pe na faia ia faamaumauga, ae ua mae’a ona faimalaga ese atu le vaa mai Pago Pago, ma tu’uina atu i le aufaigaluega o le uafu a Apia.

O lo o finagalo foi Hall i igoa uma o i latou sa kiliaina le va’a, mai ofisa uma o le malo (DPA, DOH ma le DOT ofisa o le Custom) ina ua taunuu mai ma ulufale mai le va’a i le uafu i Pago Pago, ina ua taliu mai i lana faigamalaga mai i Apia.

Na ta’ua e Hall, i se fonotaga a le malo sa faia ia Iuni 6, 2023, o tulafono lava ia ma laasaga mo le kiliaina o vaa e ulufale mai, pe ulufafo atu ma uafu o Amerika Samoa, e tatau lava i kapeteni o va’a ona fa’afesootai mai le Ofisa o Uafu ma Malaevaalele (DPA) a Amerika Samoa, i le taimi tonu lava e taunuu mai a le vaa (ae le i tuua le uafu, po o se taimi puupuu ane talu ona tu’ua le uafu, o lo o faimalaga mai ai), po o le taimi e malaga ese atu ai mai i uafu o Amerika Samoa; ma o so o se va’a lava e ulufale mai i totonu o uafu a Amerika Samoa e aunoa ma se faailoa mai i le DPA, o le a faapea loa ona taofia i le mea ua ta’ua o le ‘quarantine buoy’ (Tagai, ASCA § 20.1201(a)-(b) ma le § 20.1202.).

O le a faatonuina ai iina ia le kapeteni ina ia maua mai se kilia mai i ofisa a le malo e gafa ma lea matafaioi ma suesueina ai loa le va’a, ae le i faatagaina le vaa ma lana auva’a ona ulufale mai i totonu o Amerika Samoa.

Afai o se vaa e taunuu mai pe malaga ese atu i aso malolo po o faaiuga o vaiaso, o le a faapea ona pili le kapeteni ma le vaa i itula ovataimi ma afai ae iai se mafuaaga e faatuai ai ona kilia le va’a e le DPA, ona faatonuina foi lea o le vaa e taula i le ‘quarantine buoy’, seia maea lelei ona faatinoina gaioiga a ofisa a le malo o Amerika Samoa.

O le DPA e gafa ma le faatonuina o le kapeteni ina ia leai seisi o le auva’a po o tagata i luga o le vaa, e mafai ona tu’ua le vaa seia maea lelei ona faia suesuega a ofisa a le malo ma ua kilia lelei le vaa. (Tagai I le ASCA 20.1308(a)-(b).  O a lava ovataimi o le a pili ai le kapeteni ma le va’a, e le mafai ona faimalaga ese atu le va’a, seia maea ona totogi uma nei pili.