Taofia paketi tausaga tupe 2024 a le OPM seia taulimaina e le Maota Fono ripoti mai tausaga ua tuanai

Pago Pago - AMERIKA SAMOA

Ua taoto nei i luma o sui faitulafono o le Iloiloga Aufaatasi a le Maota Fono, ia le paketi mo le tausaga tupe 2024, a le Ofisa o lo o mataituina mea totino a le Malo (OPM), e faatalitali ai ia ripoti o faamaumauga o mea totino a le malo mai i le tausaga tupe 2020, 2021 ma le 2022.

I le iloiloga a le Maota Fono ia Aukuso 31, 2023, ma le faatonusili o le OPM, le tamaitai o Poleen Asalele,  na nofo malamalama ai afioga i Senatoa ma Faipule i le leai o ni ripoti a le OPM mai tausaga ua tuanai, seia vagana ai se ripoti afaafa mai i le 2022.

O nei ripoti e aofia ai le faitauga atoa o aseti a le malo, e pei o taavale, meafale, masini ma isi tulaga faapena, ma o lo o iai se popolega o lo o faatauina atu nei aseti ae e mafai ona toe faaleleia ma toe fa’aaogaina.

Na fa’aalia e se tasi o Senatoa se faatau tu’i a le OPM sa ia molimauina, lea na faatau tu’i ai nisi o taavale a le malo ae o le aso na soso’o ai, na ia va’aia ai le feoai o nei taavale i luga o le auala, ua fa’aaoga e tagata lautele.  Na saunoa lea Senatoa, o sona popolega, o le taugata o nei taavale ae na mafai lava ona faaleleia ma toe fa’aaogaina.

Na ta’ua e le alii Senatoa, o nei ta’avale sa fa’aaogaina e le Ofisa o Aoga, ma e $75,000 o latou tau.

Ae peitai, na saunoa Asalele, e leai se inisinia a le OPM e mafai ona toe faaleleia ia taavale a le malo.

Sa faapea ona fa’aalia e le afioga i le sui Fofoga Fetalai o le Maota o Sui, ia Fetu Fetui Jr., o le faatau tu’i ina o taavale a le malo, o se molimau lea i le amioga faalesolitulafono a le malo, lea ua fa’aalia mai i taavale ma isi kamupani.

Na fautuaina e Fetui ia le faatonusili ina ia taga’i lelei i mea totino a le malo, ona i sona talitonuga, o le tele o nei taavale, e le tatau ona faatauina atu i faatau tu’i o lo o faia.  Ma sa ia fa’aalia foi le tatau ona iai se inisinia taavale mo le OPM.

Na fesiligia e le afioga Senatoa Togiola Tulafono ia Asalele i le mafuaaga o lo o ta’ua ai ia faamaumauga mai i le 2004 ma le 2005 i totonu o le paketi mo le tausaga tupe fou.  Na tali le faatonusili, o le sasi.

Na toe fesili Togiola po o faia faamaumauga a lo latou ofisa i mea totino a le malo i tausaga uma, na tali Asalele, o lea lava, seia vagana ai le tausaga na se’i mavae atu nei, e na o ta’avale sa mafai ona faamaumauina.

Sa saunoa Togiola, ua iai se siitaga i le paketi mo totogi o tagata faigaluega, ae e leai se tupe faataatia mo le faatinoina o galuega.  Na fesili le afioga i le Senatoa, pe mafai faapefea ona faatino galuega a le ofisa mo le faamaumauina o aseti a le malo, pe afai e leai se paketi.

Na tali le tamaitai faatonusili, e lima tagata faigaluega a le ofisa o aoga lea ua tu’uina mai e galulue i le OPM, e toafa e galulue i le faia o faamaumauga.

Sa ia faalauiloa foi le iai o se faigamalaga a le Kovana ua fuafuaina mo Manu’a i le masina fou e faia faamaumauga o aseti a le malo o lo o i Manu’a.  O le fuafuaga sa faapea e fai ia Mati ae peitai, sa toe tolopoina.  Na ia ta’ua foi, o le tele o faatau tu’i a le malo e fai i Tutuila.

Ona o le le mautonu o faamaumauga o mea totino a le malo, o lea na faatonuina ai loa e sui faitulafono ia le faatonusili o le OPM ina ia faaooina mai ripoti o faamaumauga mai ia 2020, 2021 ma le 2022, ona fa’ato’a mafai lea ona faia se faaiuga i le latou paketi mo le tausaga tupe fou.