Taofia faapagota se ali’i i le talepe fale ma le faia uiga mataga i se tamaitai

Pago Pago - AMERIKA SAMOA

O le masina na te’a nei na pu’e faapagota ai e Leoleo se ali’i e 32 tausaga le matua, ona o tu’uaiga i lona ulufale faamalosi lea i totonu o le fale o se tamaitai i se vaega o Tafuna e aunoa ma se faatanaga ma ia aveese faagaoi ai nisi o meatotino mai totonu o le fale. Ae le gata i le talepe fale ma le gaoi e pei ona taua e le malo, ae na taumafai fo’i lenei ali’i e faia ni uiga  mataga i le tamaitai e ana le fale na ia osofaia.

O le masina lava fo’i na te’a nei na tula’i ai le susuga a Albert Soketi i luma o le Fa’amasinoga Faaitumalo. O le tausaga e 2014 na ta’usala ai o ia e le Fa’amasinoga i le solitulafono o lona tagofia lea o itutinosa o se tamaitai e laititi i lalo o le tulafono, ma faasala ai o ia i le Toese mo le umi e 20 masina, o se tasi lea o tu’utu’uga o lana nofovaavaaia e 5 tausaga.

O moliaga ua faila faasaga ia Foma’i Ropeti e aofia ai le moliaga e tasi o le umia faasolitulafono o vaega o le pauta faasaina o le aisa ma le moliaga e tasi o le umia faasolitulafono o vaega o le laau faasaina o le mariuana, tasi le moliaga o le talepe fale i le tulaga muaua, tasi le moliaga o le gaoi, atoa ai ma le moliaga e tasi o lona taofia faapagota lea o se tagata i se auala faasolitulafono, o solitulafono mamafa uma ia, atoa ai ma moliaga mamafa o le faatupu vevesi i nofo’aga faitele, faaoolima i le tulaga 3 faapea ai ma le tu fua i le fanua o le isi tagata.

E $15,000 le vaega tupe lea ua faatulaga e tatala ai i tua le ua molia. Afai ae mafai ona tatala o ia i tua, ua poloaina o ia e le Faamasinoga ina ia tausisi i tulafono a le malo i taimi uma, auai i soo se taimi e faatulaga ai ana iloiloga, ma ia fesootai vava lalata ma lana loia fautua.

Ua faatonu e le Faamasinoga le ua molia ina ia aua nei toe alu i le fale o le tamaitai na aafia pe toe taumafai i soo se auala e faafesootai le tamaitai na aafia.

O le vaiaso fou lea ua faatulaga e faia ai le ulua’i iloiloga o lenei mataupu.

TAGI A LE MALO

O le vaveao o le aso 12 o Fepuari, 2022 na tali atu ai se vaega to’atele o Leoleo i se valaau mai se vaega o Tafuna ina ua talosagaina e se tamaitai se fesoasoani i lona fale, ona o se ali’i na ulufale faamalosi i totonu ma taumafai e faia ni uiga mataga ia te ia. Na taunu’u Leoleo ma latou feiloa’i ma le tama’ita’i na aafia i luma o lona fale, ma vaaia ai e Leoleo foliga fefe ma le gatete o le tamaitai i le taimi na latou talanoa ai.

Na taua e le tamaitai na aafia i Leoleo e faapea, pe tusa o le ta tonu o le itula e 4:00 i le vaveao o le aso na tula’i mai ai le faalavelave, na ia faalogoina ai se pao i totonu o lona fale, e foliga mai o se tagata o loo savali i totonu o lona fale. Sa ia taumafai e autilo i totonu o le fale pe na te iloa atu ai se tagata peita’i sa faigata ona manino lana vaai i le pogisa o le fale. 

I ni nai minute ao taoto pea i luga o lona moega i totonu o lona potu, na faateia o ia ina ua ia vaaia se tagata o loo tu i le faitoto’a e aunoa ma sona lavalava o faia. Na manino i lana vaai, o le ali’i o Ropeti lea e tu mai i le faitotoa o lona potu ona e masani lelei i le ali’i lea, e nofo fo’i i le isi pitonu’u.

Na taua atili e le tamaitai na aafia i Leoleo e faapea, e le o se taimi muamua lenei ua ulufale faamalosi ai lenei alii i lona fale i le leva o le po e aunoa ma sana faatanaga, ma taumafai e fai uiga mataga ia te ia. E faatolu ona ulufale faamalosi Ropeti i totonu o le fale o le tamaitai na aafia.

O le taimi muamua o le po o le Kerisimasi o le tausaga na te’a nei, lea na ia ulufale faamalosi ai i totonu o le fale ma aga’i atu ai i le potu moe o loo moe ai le tamaitai na aafia, ma ia tagofia ona itutinosa. Na ala i luga le tamaitai ma ia vaaia ai le ua molia o loo tu i tafatafa o lona moega, ona ia ee atu lea i le alii ua molia ma faatou e alu ese i fafo ma le fale. 

A o le i alu ese le ua molia ma le fale, sa ia toe valaau i le tamaitai na aafia pe i ai sana tupe sei faatau ai lana pia, na tali i ai le tamaitai na aafia, e leai sana tupe o i ai, ae sili pe a alu ese i fafo ma le fale ao lei valaau i Leoleo. Na tula’i filemu le ua molia ma savali i fafo ma le fale e aunoa ma se isi gaioiga na ia faia.

O le po lona lua na ulufale faamalosi ai le ua molia i totonu o le fale o le po o le Tausaga Fou pe tusa o le itula e 2:00 i le vaveao. Na taua e le tamaitai na aafia i Leoleo e faapea sa faia sa latou fiafia ma ana uo i le fale o lana uo, ona alu ai loa lea i le fale ua te’a le 1:00 i le vaveao. 

O lona vaivai tele a mafua ai ona alu atu loa ma taoto i luga o le nofoa i luma o le potu malolo ma moe ai loa. E pei o sana miti na fai na mafua ai ona te’i i luga ina ua ia faalogoina se tagata o tago atu i lona tino. Na ala i luga le tamaitai na aafia ma ia vaaia ai le ua molia o loo tu i vae o le nofoa o loo moe ai ma lona boxer o loo fai ae leai se miti afu. Na ita le tamaitai na fai i le alii ua molia e alu i fafo o le fale, peita’i na augani atu le ua molia ia te ia pe maua se avanoa la te talanoa ma eva ai.

O le avaavau atu o le tamaitai na aafia i le alii na aafia e alu ese ma le fale, na mafua ai loa ona faliu le ua molia ma toe savali i fafo ma le fale. Na lagona e le tamaitai na aafia le malosi o le manogi ‘ava malosi i totonu o le fale i le taimi sa i ai le ua molia.

Ae o le faalavelave lea na tula’i mai, na taua ai e le tamaitai le faateia o ia ao moe i lona faalogoina o se leo e sau mai tua o le umukuka i totonu o lona fale. Na fiu le tamaitai e autilo solo pe na te iloa atu se isi peita’i e le’i manino lana vaai ona o le pogisa o le po. A o taoto i lona moega, na faateia o ia ina ua tago atu se tagata i ona vae ma faasolo a’e ai i luga i lona itutinosa. 

Na faafuase’i ona nofo i luga ma tau lana vaai i le alii ua molia o loo tago atu ia te ia. Na ia tulia i fafo peitai na talosaga atu le alii ua molia ia te ia pe i ai se meaai ma se tupe mo ia. Na savali i tua o le umukuka ma aumai le meaai sa i ai ma ave i le ali’i ua molia ma fai ai loa e alu i fafo ma le fale.

Sa lilo i lona mafaufau se mea laa tupu i le ato o loo i ai uma lana faatau o loo taatia i luga o le laulau, lea e silia i le $100 le tupe na alu i le faiga o le fa’atau. Ina ua maea ona tuu e le tamaitai le meaai i le alii ua molia, na alu ese ai loa o ia ma le fale ae toe foi le tamaitai na aafia e moe. 

Na faafetaia le tamaitai ina ua saili atu lana faatau ua aveese e le tagata le aso sa i ai le faatau i luga o le laulau. Na fiu le tamaitai e tau saili le ato i totonu o le fale peita’i na te lei maua. Sa ia mautinoa, o le alii na alu atu i totonu o le fale mo se tupe ma se meaai lea na alu ma le ato o loo i ai lana faatau. 

Na fiu Leoleo e saili le ua molia i lona aiga faapea ai fale o ana uo na faailoa ane e lona aiga peita’i e lei maua ai o ia. Na talitonu Leoleo, ua sola sola le ua molia ona o lana gaioiga sa faia.

I le masina na te’a nei, na taofi ai e Leoleo se pikiapu lanu uliuli i le soona alu saoasaoa i luga o le alatele. O le ave ta’avale o le pikiapu, o le susuga a Ropeti, le ali’i ua molia nei i le talepe fale, gaoi ma le faia o uiga mataga i se tamaitai i se auala faamalosi. Na pu’e faapagota e Leoleo le ua molia ma auina atu loa i le Ofisa o Leoleo i Tafuna mo suesuega.

Ao lei auina atu le ua molia i le Ofisa o Leoleo i Tafuna mo suesuega, na saili e Leoleo lona tino ma laa ta’avale poo i ai ni aupega mata’utia atoa ai ma ni fualaau faasaina. I le taga o le ofu a le ua molia sa faia, na maua ai e Leoleo se pepa iila o loo i ai vaega o le pauta faasaina o le aisa. I totonu o le ta’avale ina ua saili e Leoleo, na maua ai se sikaleti mariuana ua uma ona taai.

Ina ua fesiligia e uiga i lenei mataupu, na taua ai e le ua molia e faapea, o fualaau faasaina na maua ia te ia, o mea na aumai i se tasi o ana uo. O le mataupu i le tamaitai na aafia ma lona fale na ia osofaia, e leai se manatu na te faatupu ni gaioiga e ono lamatia ai le ola o le tamaitai, ae na alu i ai e saili se tupe ma se meaai mo ia.