Taofia e Leoleo i le faamisa ae mapuna a’e ai ma isi tu’uaiga mataga

Pago Pago - AMERIKA SAMOA

Ova le ‘ona, toe malamalama ifo ua ia sasaina le ulu o lana lava uo I se paipa u’amea

Ua mae’a nei ona faila e le malo moliaga mamafa o le faia o uiga mataga i se tamaitai talavou, e faasaga i se ali’i e 35 tausaga le matua mai Malaeimi, ina ua pu’e faapagota o ia e Leoleo i le masina na te’a nei i le ‘ona ma le faatupu misa i nofoaga faitele.

O le masina lava fo’i na te’a nei na tula’i ai le susuga a Faletusi Fa’aaliga, po o Tusi Fa’aaliga, e pei ona iloa ai e le to’atele, i luma o le Fa’amasinoga, mo lana ulua’i iloiloga.

E 2 tagi ua faila e le malo faasaga ia Fa’aaliga.

I le tagi muamua, ua molia ai Fa’aaliga i le moliaga e tasi o le talepe fale i le tulaga muamua faapea ai ma le moliaga e tasi o le tagofia o itutinosa o se tamaitai i le tulaga muamua, o le vaega C lea o solitulafono mamafa, lea e mafai ona faasala ai se tasi i le Toese mo le umi e le silia i le 7 tausaga, pe faasala foi i le salatupe e le silia i le $5,000, poo le faasala fo’i i faasalaga uma ia e lua.

Faapea ma le moliaga e tasi o le soli fua o le fanua o le isi tagata, o le vaega A lea o solitulafono mama.

I le tagi lona lua faasaga i le ali’i ua molia, ua tu’uaia ai o ia i le moliaga o le umia faasolitulafono o vaega o le pauta faasaina o le aisa, faapea ai ma le moliaga e tasi o le umia faasolitulafono o vaega o le laau faasaina o le mariuana, o vaega ia o solitulafono mamafa e mafai ona faasala ai se tasi i le Toese mai le 5 e oo atu i le 10 tausaga, poo le faasala i le salatupe e oo atu i le $20,000; faapea ai ma moliaga mama e 2 o le faaoolima i le tulaga tolu atoa ai ma le faatupu vevesi i  nofoaga faitele. 

E $20,000 lea ua faatulaga e tatala ai Faaaliga i tua mai le Toese i Tafuna. Afai ae tatala o ia i tua, e le mafai ona ia taumafai e faafesoota’i molimau a le malo, e aofia ai ma i latou o loo aafia i lenei mataupu. E le mafai fo’i ona toe o’o i le nofoaga o loo masalomia na tula’i mai ai le solitulafono.

TU’UAIGA A LE MALO

O le aso 9 o Me, 2022, i le itula e 11:20 i le po, na faafesootai ai e se ali’i le Ofisa o Leoleo i Tafuna mo se fesoasoani, faasaga i ni alii se to’atolu o loo faia se latou inugapia i le fale a le latou tuaoi ma pisapisao ai. Na taua e le ali’i lea i Leoleo, le palalauvale o isi alii e to’alua ma tau’ai solo atigi fagu pia i luga o le alatele, ma le leotele naua o le musika, ae ua leva le po ma ua momoe fo’i tagata o le pitonu’u.

Na taua atili e le ali’i lea i Leoleo lona vaaia o le isi alii e to’atasi mai le inugapia o loo fealualu solo i fafo o le fale ma se agaese i lona aao taumatau, ae o loo fa’aauau pea lava lona laulau vavale ma pisapisao solo.

Na taunuu Leoleo ma latou molimauina ai alii e to’alua o loo saofafa’i i tua o le keli o se pikiapu lanu uliuli o loo paka i luma o le fale, ma se alii e toatasi o loo taatia i luga o le mutia i fafo o le fale, ae o le isi alii o loo fealua’i i luma o le alatele ma le agaese i lona lima. 

Na aga’i atu isi Leoleo ma taumafai faato’afilemu le alii o loo fealua’i solo ma le agaese, mulimuli ane pu’e faapagota o ia ma taofia i lalo o le vaaiga a Leoleo, ae o isi Leoleo na aga’i atu i le alii o loo taatia i luga o le mutia ma latou iloa ai, o loo manu’a le ulu ma foliga o lea alii ma ua lilofia ona foliga i le toto.

Na faafesoota’i le vaega a le EMS ma auina atu ai loa le alii na manu’a i le Falema’i o le LBJ i Fagaalu mo togafitiga, ae auina atu le alii na fealua’i ma le agaese i le Ofisa o Leoleo i Tafuna mo suesuega. O le alii na fealua’i ma le agaese i lona lima, o ia lea o Faletusi Fa’aaliga, lea ua molia nei I lenei mataupu.

Na fesiligia fo’i e Leoleo alii e to’alua na saofafa’i i tua o le keli o le pikiapu sa paka i luma o le fale na tula’i mai ai le faalavelave, ma mafai ai ona maua e Leoleo ni isi faamatalaga e faatatau i le faalavelave sa tula’i imai.

A o le i auina atu le ali’i o Fa’aaliga i le Ofisa o Leoleo mo suesuega, na faia se siaki faapitoa i lona tino mo fualaau faasaina poo ni a’upega mata’utia, ma maua ai e Leoleo i le taga o le ofuvae se pepa iila o loo i ai vaega o le pauta pa’epa’e o le aisa. Na faamaonia I suesuega a leoleo, o vaega ia o le pauta faasaina o le Aisa. 

Na faaauau suesuega a Leoleo ma latou maua ai i le isi taga o le ofuvae a le ua molia se tamai pepa iila o loo afa i lau mamago, lea sa mafai ona faamaonia I suesuega faapitoa, o se vaega o Fualaau faasaina o le Mariuana.

Na fesiligia e Leoleo nisi o molimau sa i ai i le taimi o le faalavelave e tusa ai o le mafua’aga o le vevesi faapea ai manu’a na aafia ai le ulu ma foliga o le ali’i na aafia. 

Na taua e se tasi o molimau i Leoleo e faapea, sa ia faalogoina tagata o loo pisapisao ma laulauvavale mai totonu o le fale sa faia ai le inugapia. E lei umi ae ona vaaia se tagata o aga’i atu i le nofoaga o loo faia ai le inugapia.

O le tagata lea na aga’i i le fale na tula’i mai ai le faalavelave, o se Tamaloa e nofo i le aiga tuaoi, na alu atu e talanoa ia Fa’aaliga, I lona alu atu I lo latou fale ma taumafai e fai ni uiga mataga I lona afafine, e 16 tausaga le matua.

Ae na avea le talanoa atu o le Tamaloa lea ma itu na ita ai Fa’aaliga ma savali ai i tua i le vaega o loo faia ai le inugapia ma toe fo’i mai ma se paipa u’amea i lona lima. Na taua e le Tamaloa le ova o le ‘ona o Fa’aaliga, e iloa gofie lava i lana talanoa ma ana mea e fai. Na vave ona alu ese le Tamaloa ina ua ia mautinoa, e i ai le faalavelave o le a tula’i mai.

Sa ta’ua e Fa’aaliga I leoleo, I lona toe fo’I mai I luma ma le paipa u’amea, sa iai lona manatu o le Tamaloa lea na alu atu ia te ia ma faamisa atu ia te ia, lea o lo’o tu I luma o le fale I le pogisa, ma sa ia sasaina loa le ulu I le paipa u’amea ma kiki ona foliga. 

Ae na te’i Fa’aaliga ina ua ia toe iloa mulimuli ane, o lana uo na latou inupia lea ua manu’a.

Na ioeina fo’i e le ua molia fualaau sa maua ia te ia, o fualaau faasaina sa maua o meatotino a ia na faatau mai i se tasi o ana uo ave pasi mai Tafuna.