Taofi le ta’avale i le solitulafono i luga o le alatele ae maua ai fualaau faasaina

Pago Pago, AMERIKA SAMOA

O le ave ta’avale o le taavale pikiapu lea na taofia e Leoleo i le masina na te’a nei i se vaega o Nuuuli i lona le usitaia o tulafono i luga o le alatele, ua molia nei o ia i lona solia o tulafono tau Fualaau Faasaina a le teritori, ina ua maua e Leoleo i totonu o le ta’avale fualaau faasaina e pei o le aisa ma mariuana.

O le masina lava na te’a nei na tula’i ai le ali’i ave ta’avale, le susuga a Kamuta Vaega i luma o le Fa’amasinoga Faaitumalo mo lana ulua’i iloiloga.

O moliaga faasaga i le susuga a Vaega e aofia ai le moliaga e tasi o le umia faasolitulafono o vaega o le pauta faasaina o le aisa; tasi le moliaga o le umia faasolitulafono o vaega o le laau faasaina o le mariuana, o ni solitulafono mamafa e mafai ona faasala ai se tasi i le Toese mai le 5 e oo atu i le 10 tausaga, pe faasala i le salatupe e le mafai ona sili atu i le $20,000, poo le faasala foi i faasalaga uma ia e lua.

E ese mai i moliaga mamafa faasaga ia Vaega, ua molia fo’i o ia e le malo i moliaga mama e pei o le ave ta’avale ‘ona; ave taavale faatautala, atoa ai ma le ave ta’avale e aunoa ma se laisene, o le vaega A lea o solitulafono mama, lea e mafai ona faasala ai se tasii le Toese mo le umi e le silia i le 1 le tausaga, pe faasala foi i le salatupe e le silia i le $1,000, poo le faasala fo’i i faasalaga uma ia e lua.

E $10,000 lea ua fa’atulaga e le Faamasinoga Faaitumalo e tatala ai i tua Vaega mai le Toese i Tafuna. 

TAGI A LE MALO

E pei ona taua e le malo i le latou tagi e fa’apea, o le afiafi o le aso 7 o Novema na te’a nei pe tusa o le itula e 6:12, ao tiute ni Leoleo se to’alua i luga o le alatele a le malo i Nu’uuli, na la vaaia ai se taavale pikiapu lanu pa’epa’e o lo o aga’i mai i luma o le Laufou e aga’i atu i le itu i Sisifo i se saoasaoa e le tusa ma le tulafono.

Sa maitauina fo’i e Leoleo i lea lava ta’avale pikiapu le eseese o numera o laisene o loo faapipi’i i le itu i luma ma tua o le ta’avale. O le laisene ave ta’avale i le pito i luma o le ta’avale o lo o i ai le numera o le 558A ae o le laisene i le itu pito i tua o loo i ai le numera o le laisene 8550C.

Na faateletelegese le faaiuga a Leoleo e taofi ai le ta’avale ona o le soona alu saoasaoa i luga o le alatele, ae na fai le faaiuga e siaki muamua numera o laisene i le Ofisa o Faamaumauga o Taavale Afi i Tafuna i le mafua’aga ua eseese ai numera o laisene i luma ma tua o le ta’avale. 

Na maua i faamaumauga a le Ofisa o Faamaumauga o Ta’avale Afi a le Ofisa o Leoleo, o le numera 558A o loo pipi’i i le pito i luma o le ta’avale, o le laisene sa’o lea o le ta’avale, ae na mae’a le aoga i le masina o Me o le tausaga na te’a nei.  O le numera laisene i le pito i tua o le ta’avale a Vaega, e ese le ta’avale ana lea laisene, ma ua soltulafono le gaioiga e pei ona faapipi’i ai i le tino o le pikiapu.

O le maua ai e Leoleo o faamatalaga sa talosagaina, na aga’i atua i loa ma taofi le ta’avale piikiapu e pei ona taua, ma faailoa ai loa i le ave taavale le mafuaaga ua ala ai ona taofi lana ta’avale. E na o le ave taavale lava sa i totonu o le ta’avale, o ia lea o Kamuta Vaega, o le alii o lo o molia i lenei mataupu.

Na fesili Leoleo i le alii ua molia mo lana laisene ave ta’avale peita’i na faailoa e le ua molia, o lo o galo i le fale lona laisene ave ta’avale. O le taimi lea na faailoa ai loa e Leoleo i le alii ua molia le faaiuga o le a faia i lana ta’avale, o le taofia lea i lalo o le vaavaaiga a Leoleo, e le gata e eseese numera o laisene o lo o faapipii i lana ta’avale, ae le o i ai fo’i sona laisene ave ta’avale.

I le taimi na fesiligia ai e Leoleo le susuga a Vaega e tusa ai o lona laisene, na faalogoina ai e Leoleo le malosi o le manogi ‘ava malosi o loo sau mai totonu o le ta’avale a le ua molia. Na fesiligia e Leoleo le susuga a Vaega pe sa ia tagofia le ‘ava malosi, ma ta’utino ai le ua molia, e 3 ana fagu pia vailima lapopo’a na inu i le fale o lana uo aga’i mai ai loa i luga o le alatele. 

Na talosagaina e Leoleo e to’alua le fesoasoani a isi Leoleo ma mafai ai loa ona auina atu le ta’avale i le Ofisa o Leoleo i Tafuna mo suesuega faaopoopo e uiga i lenei mataupu. O le alii Leoleo na avea le ta’avale a le ua molia aga’i i le Ofisa o Leoleo i Tafuna ae sa nofo le ua molia i le nofoa o le pasese.

Ina ua taunu’u le taavale i le Ofisa o Leoleo i Tafuna, na faailoa ai loa e Leoleo i le alii ua molia, e tatau ona saili uma totonu ma le tino o lana ta’avale e pei o tu ma aga masani o le tulafono, ina ia mautinoa e le o i ai ni fua fualaau faasaina poo ni a’upega mata’utia i totonu.

A o faagasolo galuega a Leoleo, sa molimauina e Leoleo se pepa iila o lo o nana i totonu o se vaega o le ta’avale e latalata i le foeuli o le ta’avale. Na aumai e Leoleo le pepa iila ma iloa ai vaega o le pauta paepae o lo o i ai i totonu. Ina ua faaali e Leoleo le pepa iila o loo i ai vaega o le pauta paepae i le alii ua molia, na lulu lona ulu ma faapea atu i Leoleo, na te le iloa poo ai e ana le pepa iila na latou maua.

Na faaauau le sailiga a Leoleo i totonu o le ta’avale ma latou maua ai se pepa iila laititi o loo i ai ni sikaleti mariuana se 3 ua mae’a ona taai ma sauni e ula. 

Na tu’u e Leoleo fualaau faasaina i le Leoleo Sinia sa i ai i le taimi na saili ai le ta’avale a le ua molia, ona alu lea o le Leoleo Sinia ma fesili i le ua molia poo a mea o lo o i totonu o le pepa iila, na tali fo’i le ua molia, na te le iloa poo a mea o lo o i ai, e le o ia fo’i e ana le pepa iila na latou maua.

O le taimi lea na faafesootai ai loa e Leoleo mai le Ofisa o Leoleo i Tafuna le Vaega e gafa a le suesueina o Fualaau Faasaina e le Ofisa o Leoleo, ma aga’i atu ai loa ali’i Leoleo Lutena e to’alua mo le tauaveina o lenei mataupu.

Na muamua faia e Leoleo Lutena se suega i le pauta paepae na maua i totonu o le pepa iila ma faamaonia ai, o vaega ia o le pauta faasaina o le aisa. Na faia fo’i le suega i sikaleti mariuana ma faamaonia ai, o vaega ia o le laau faasaina o le mariuana.

Ina ua mae’a ona faia le suega i le pauta, na fesiligia ai loa e Leoleo le alii ua molia e uiga i le pepa iila lea na maua i ai vaega o fualaau faasaina o le aisa ma le mariuana, atoa ai ma laisene sese na faapipi’i i le tino o lana ta’avale. Na muamua faatoese le ua molia i Leoleo Lutena e to’alua e tusa ai o laisene sese na faapipii i lana ta’avale. 

Sa ia taua e fa’apea, o le isi laisene o le laisene o le ta’avale a lona uso, ae na tago ma aumai e faapipi’i i le tino o lana ta’avlae, ina ia mafai ai ona ave lana ta’avale i le fale o lona uncle i Vaitogi. A o aga’i atu lana ta’avale i luga o le alatele, na faafuase’i ai loa ona taofia o ia e Leoleo i luga o le alatele.

I le pepa iila sa maua i ai vaega o le pauta faasaina o le aisa ma mariuana, na matua teena e le ua molia le i ai o sona iloa e faatatau i lea pepa iila. Sa ia taua i Leoleo Lutena e to’alua e faapea, sa faigata ona ia iloa lelei atu gaioiga a Leoleo sa faia i totonu o lana taavale i le taimi na latou sueina ai totonu o le ta’avale, ona sa poloka e le isi ali’i Leoleo le vaega e mafai ai ona ia iloa atu gaioiga uma sa faia.

Ae na faateia o ia ina ua alu atu se ali’i Leoleo Sinia ma faaali atu le pepa iila ia te ia, ma fesili atu poo ai e ana lea pepa iila, ae na ia tali i ai na te le iloa poo ai e ana le pepa iila. Na taua atili e le ua molia i Leoleo Suesue, e leai se fesootaiga o ia ma pepa iila na maua i totonu o le ta’avale.