Taofi Kovana le toe fa’amatu’u atu o siaki o lafoga i lalo talosaga fa’apitoa

Ua taofia nei e le afioga i le ali’i kovana ia  Lolo Matalasi Moliga se gaioiga le manuia sa fa’atinoina e le Ofisa o Tupe a le malo, i le taliaina lea o talosaga a ni isi o le atunu’u mo le fa’amatu’uina atu o a latou siaki o lafoga mo fa’alavelave ma fuafuaga fa’aleaiga, tusa lava pe le i taitai o o i le aso e tatau ona maua ai lafoga.

O le masina na te’a nei na tu’uina atu ai e le afioga i le ali’i kovana sana tusi i le Teutupe a le malo ia Ueligitone Tonumaipe’a, ma ia fa’ailoa i ai lana fa’aiuga ua faia ina ia taofia ai le toe fa’aauauina o lea tulaga le manuia, i le mae’a ai lea ona tauaao e lon Ofisa o le tele o fa’asea mai ni isi o le atunu’u, i le le talafeagai o le tulaga sa faia

Saunoa Lolo i lana tusi e fa’apea, talu ai le tele o fa’asea i le le talafeagai o le faiga o lo o faia i le fa’amatu’uina atu lea o siaki o lafoga ae lei oo i le taimi e tatau ona maua ai, ua mafua ai loa ona ia tusia lenei tusi ina ia taofia ai le toe fa’aauauina o lea faiga le sa’o.

Sa ia taua atili e fa’apea, o le tulaga fa’aletonu o lo o i ai tupe maua a le malo i le taimi nei, atoa ai ma le tuai ona taunu’u mai o tupe mai le Ofisa o Lafoga a le Malo Tele (IRS) e totogi ai lafoga, ua mafua ai ona tula’i mai tulaga e pei ona tu’uina atu ai avanoa fa’apitoa i aiga ma uo e maua ai a latou lafoga, ma fesiligia ai loa e i latou o lo o a’afia le fa’amaoni o le faigamalo e tusa ai o le maua e tagata uma o avanoa tutusa i soo se tautua.

“Ona o lea tulaga, o le poloaiga lenei e taofia ai loa le toe taliaina o soo se talosaga e tu’uina atu mo le fa’amatu’uina atu o siaki o lafoga a tagata, ae o le a fa’asolo pea i le tulaga e pei ona i ai le aso tonu e tatau ona maua ai le lafoga ma fa’asolo sa’o ai i le fa’asologa tatau”, o se vaega lea o le tusi a le ali’i kovana

O lenei poloaiga o le a mata’ituina pea e le kovana poo le lutena kovana fo’i pe afai e toesea le kovana, ina ia mautinoa e aloaia pea lenei poloaiga taua.

O le kopi o lenei tusi sa tu’uina atu lea i sui teutupe e to’alua a le malo ia Keith Gebauer ma Tina Va’a, atoa ai ma le ta’ita’i o le Ofisa o le kovana, le tofa Fiu Saelua.

O lenei mataupu ua leva ona tele i ai talanoaga a le atunu’u, e mafua mai i le to’atele o tagata na talia a latou talosaga mo le fa’amatu’uina atu o siaki o latou lafoga e fesoasoani ai ia latou fa’alavelave e pei o maliu.

E to’atolu ni tagatanu’u sa latou fa’amaonia mai i le Samoa News, o latou isi tagata na talia talosaga mo le vave tu’uina atu o a latou siaki o lafoga ae lei oo i le aso e tatau ona maua ai, ina ua latou talosagaina le Ofisa o Tupe mo se fesoasoani mo le latou fa’alavelave o le maliu sa faia.

I le masina na te’a nei, e to’atele ni isi o matua sa latou fa’ailoa mai i le Samoa News a latou fa’asea, ina ua teena a latou talosaga mo le fa’amatu’uina mai o a latou siaki o lafoga e fesoasoani ai i le tapenaina o fa’auuga a latou fanau mai aoga maualuluga i le atunu’u.