Taofi i le solitulafono i luga o le alatele ae maua ai fualaau faasaina

Pago Pago - AMERIKA SAMOA

E 45 tausaga le matua o se alii ave ta’avale ua molia e le malo i lona umia faasolitulafono o vaega o le pauta faasaina o le aisa, ina ua taofi e Leoleo i le masina na te’a nei lana ta’avale i le soona alu saoasaoa i luga o le alatele, atoa ai ma le ave ta’avale faatautala, ae maua ai ma fualaau faasaina i totonu o lana ta’avale.

Ina ua fesiligia e Leoleo le susuga a Tasele Ualesi e tusa ai o fualaau faasaina na maua i totonu o lana ta’avale, sa ia taua i Leoleo, o fualaau faasaina na faatau mai i se tasi o ana uo ma le faamoemoe e fa’aaoga mo ia lava.

O le masina na te’a nei na tula’i ai le susuga a Ualesi i luma o le Fa’amasinoga Fa’aitumalo mo lana ulua’i iloiloga ma ia talosagaina ai le Fa’amasinoga, tauala atu i lana Loia Fautua e faatulaga se aso e faia ai lana Iloiloga autu.

O Ualesi, lea o lo o nofovaavaaia mo le 7 tausaga ina ua ta’usala o ia e le Fa’amasinoga i le solitulafono o le gaoi ma le talepe fale i le tausaga e 2019, ua molia nei o ia i le moliaga e tasi o le umia faasolitulafono o vaega o le pauta faasaina o le aisa; tasi le moliaga o le umia faasolitulafono o lau laau o le mariuana, o ni solitulafono mamafa e mafai ona faasala ai se tasi i le Toese mai le 5 e oo atu i le 10 tausaga, pe faasala foi i le salatupe e mafai ona oo atui le $20,000, poo le faasala foi i faasalaga uma ia e 2; o le moliaga o le tete’e atu i Leoleo ao taumafai e pu’e faapagota o ia, o le vaega D lea o solitulafono mamafa; atoa ai ma moliaga tau taavale afi e pei o le ave ta’avale ‘ona, ave ta’avale faatamala, faapea ai ma le ave ta’avale ae leai se laisene ave ta’avale. 

E $10,000 lea ua fa’atulaga e tatala ai i tua Ualesi.

Afai ae mafai ona tatala o ia i tua, ua poloaina o ia ina ia fesoota’i vava lalata ma lana loia, auai i soo se taimi e valaau ai lana mataupu, aua nei ona taumafai e tuua le atunuu pe sola faamalosi ese foi ma le atunuu, a ia avea o ia ma tagatanu’u lelei e tausisi i tulafono a le malo i taimi uma. 

Ua poloaina fo’i e le Fa’amasinoga ia Ualesi ina ia aua ne’i ona toe faafoeina se ta’avale i luga o alatele a le malo a o faagasolo ai lana mataupu, e le mafai fo’i ona ia toe tago i se foeuli o se ta’avale se’i vagana ua i ai sona laisene ave ta’avale e tuu aloaia mai e le Ofisa o Ta’avale Afi a le malo i Tafuna (OMV).

TAGI A LE MALO

E pei ona taua e le malo i le latou tagi e faapea, o lenei mataupu na alia’e mai i se vaega o le alatele a le malo i Tafuna i le taeao segi segi o le aso 10 o Setema 2022, ina ua maitauina e ni ali’i Leoleo se to’alua sa tiute i luga o le alatele i lea taimi se ta’avale pikiapu o lo o aga’i mai i Tafuna ma le fa’amoemoe e aga’i atu i Iliili i se saoasaoa e uiga ese. E le gata fo’i i lea, sa molimauina e ali’i Leoleo le tifa solo o le ta’avale a o aga’i atu i luga o le alatele, faatasi ai ma le moli o le laisene i le pito i tua e le o ola.

Talu ai tulaga uma e pei ona molimauina e ali’i Leoleo, na la faia ai loa le faaiuga ina ia taofi le ta’avale pikiapu lenei ona ua solitulafono i luga o le alatele. Na faaemo e Leoleo faailoilo o le la ta’avale ma vaaia ai loa le afe o le ta’avale pikiapu lenei i luma tonu o le vaega e paka ai ta’avale i se tasi o Faleoloa Asia i Iliili.

Na aga’i atu Leoleo ma le faamoemoe e fia talanoa i le ave ta’avale, ma mafai ai ona iloa, e na o le toatasi le tagata o loo i totonu o le ta’avale, o ia fo’i lea na faafoeina le ta’avale, o le susuga lea ia Tasele Ualesi, le ali’i ua molia i lenei mataupu. 

A o aga’i atu Leoleo i le vaega o lo o tu mai ai le ta’avale ma le faamoemoe e fia talanoa i le ave ta’avale, na muamua lava valaau mai le ave ta’avale i ali’i Leoleo, poo le a le mafua’aga ua la taofia ai lana ta’avale, a e o ia o loo natinati e ave le ta’avale mo le tapenaina o se malu taeao a lona Tama o lo o ma’i i le fale. 

Na vave ona lagona e Leoleo le malosi o le manogi ‘ava malosi sa sau mai totonu o le ta’avale faapea ai ma le tino o le ali’i ave ta’avale i le taimi na ia talanoa mai ai. Na faamalamalama e Leoleo ia Ualesi, ua mafua ona taofia lana ta’avale ona ua ia le usitaia nisi o tulafono i luga o le alatele, e pei o le soona alu saoasaoa o lana ta’avale, pe le moli o le laisene pito i tua o le ta’avale, alu faatamala lana ta’avale i luga o le alatele, atoa ai ma masalosaloga o loo ia tagofia le ‘ava malosi ma faafoe le ta’avale. 

Sa finau malosi pea Ualesi i Leoleo, e leai se aia la te taofia ai lana ta’avale, na te le i solia fo’i se tulafono tau ta’avale afi. E fai lava tala a Ualesi ma tago atu ua toe faaola lana ta’avale ma sauni o le a alu ese, peita’i na faatonu e ali’i Leoleo Ualesi e tape le afi o lana ta’avale ae se’i o latou talanoa muamua. 

Sa faaauau pea ona finau Ualesi i Leoleo ma ia faapea atu i ai, e mana’omia se poloaiga mai le Fa’amasinoga la te sailia ai lana ta’avale, ae o ia o le a alu i le fale ona o loo faatali mai lona Tama ma’i i lana taumafataga o le taeao. 

A o talanoa Ualesi i Leoleo, na vaaia e Leoleo le fai ma tau aapa le lima o le ua molia i le taga pito i tua o lona ofuvae o loo fai, ma o iina na masalomia ai loa e Leoleo, e i ai mea o loo i totonu o le taga o le ofuvae a le ua molia o loo fai fua i lona taumafai e aapa i ai.

Na faafuase’i ona vaaia e Leoleo le taumafai o Ualesi e faasolomuli lana ta’avale ma le faamoemoe e sola ese mai le nofoaga o loo faatino ai le faatalatalanoaga, o le taimi lea na laga atu ai loa ali’i Leoleo ma taumafai e toso mai Ualesi mai fafo o lana ta’avale, peita’i na tafiti solo le ua molia ma ia aa le fatafata o le isi Leoleo.

Na umi se taimi o fai tauiviga a Ualesi ma Leoleo, seia oo lava ina mafai e Leoleo ona loka lima a le ua molia ma taofia ai loa o ia i totonu o le ta’avale a Leoleo e sauni ai le auina atu o ia i le Ofisa o Leoleo i Tafuna mo suesuega.

A o le i auina atu Ualesi i le Ofisa o Leoleo mo suesuega, na saili muamua e Leoleo lona tino ma maua ai i totonu o le taga o lona ofuvae sa faia se sikaleti mariuana ua uma ona ta’ai. 

Na faasolo le sailiga a Leoleo i totonu o le ta’avale ma laua maua ai se tama’i ato fusi manava lanu uliuli. I totonu o lea tama’i ato uliuli sa maua i ai se paipa tioata o loo i ai vaega o le pauta faasaina o le aisa, faapea ai ma le isi pepa iila o lo o i ai vaega o le lau mamago o le mariuana. Sa maua ai fo’i e Leoleo i totonu o le tama’i ato uliuli ni pepa iila laiti e fa’aaoga e utu ai le pauta o le aisa; o ni afi penisini; o pepa taai faapea ai ma straws ua uma ona tatipi tulimanu.

I le mae’a ai ona faailoa o aia tatau o Ualesi e ali’i Leoleo Suesue, na ia manatu ai loa e faia sana faamatalaga i Leoleo e tusa ai o fualaau fa’asaina sa maua ia te ia. E le i mafai ona faailoa e Ualesi i Leoleo poo fea le nofoaga na ia aumaia ai fualaau fa’asaina nei. Pau lana tala i Leoleo, e mafua ona ia faaaogaina fualaau faasaina, e maua ai lona malosi pe a galue i lana fa’atoaga. 

Sa ia taua atili fo’i i Leoleo e fa’apea, e le o ia o se tagata e tuleia fualaau fa’asaina, se’i vagana ai lava le umia o fualaau fa’asaina ma le faamoemoe e fa’aaoga mo ia lava.

O le tausaga e 2018 na ta’usala ai Ualesi i le solitulafono o le gaoi ma le talepe fale, ma nofovaavaaia ai o ia mo le 7 tausaga i lalo o tuutuuga e ao ona ia usita’i i ai.

O nisi o ia tuutuuga e aofia ai lona tuli o masina e 28 i le Toese i Tafuna, ma totogi le salatupe e $1,000 i totonu o le ulua’i 12 masina o lana faasalaga faanofovaavaaia.