Taofi Fa’amasinoga le poloaiga e toe fa’afo’i ai Oliva Toimoana i Samoa

Ua taofi e le Fa’amasinoga Maualuga le fa’ataunu’uina o lana poloaiga e toe fa’afo’i ai le ali’i o Oliva Toimoana i Samoa, ae sei mataituina pea tulaga o lana nofovaavaaia e 5 tausaga, pe i ai lava se tuutuuga na te toe solia.

I le ta’usala ai e le Fa’amasinoga Maualuga o Toimoana i le solitulafono mamafa o lona umia faasolitulafono lea o vaega o le pauta fa’asaina o le aisa, na saunoa ai le afioga i le ali’i Fa’amasino Sili ia Michael Kruse e fa’apea, na pau lava le faaiuga e tatau i le fa’amasinoga ona faia mo tagata mai fafo ua ta’usala i le soliina lea o tulafono tau Fualaau Fa’asaina, o le toe fa’afo’i lea o i latou i o latou atunu’u na malaga mai ai.

O le vaiaso na te’a nei na tula’i ai Toimoana i luma o le Fa’amasinoga mo le lauina o lana fa’asalaga. O le ali’i Loia Fautua lagolago ia Rob McNeill na tula’i mo ia, ae o le ali’i Loia Sili lagolago ia Doug Lowe na tula’i mo le itu a le malo.

Na ulua’i tu’uaia Toimoana i le moliaga mamafa o lona umia fa’asolitulafono o vaega o le pauta faasaina o le aisa. Ae i lalo o se maliliega na sainia e le ua molia ma le malo, lea fo’i na fa’amaonia e le Fa’amasinoga i ni nai masina e le i mamao atu, na tali ioe ai le ua molia i le moliaga muamua lea ua toe teuteu e le malo lona mamafa, le moliaga o le umia faasolitulafono o vaega o le pauta faasaina o le aisa, lea e mafai ona fa’asala ai o ia i le toese mo le umi e oo atu i le 5 tausaga, fa’asala i le salatupe e mafai ona oo atu i le $5,000, poo le fa’asala fo’i i fa’asalaga uma ia e lua.

I le tali ioe ai o Toimoana i le moliaga e pei ona ta’usala ai o ia, sa ia ta’utino ai e faapea, i le masina o Me 2018, sa ia umia faasolitulafono ai se paipa tioata sa i ai vaega o le pauta fa’asaina i totonu.

Ina ua maua lona avanoa mai le Fa’amasinoga, na fa’atoese ai loa le ua molia i le Fa’amasinoga faapea ai le malo o Amerika Samoa e tusa ai o lana solitulafono sa faia. Sa ia fa’atoese fo’i i lona Tina, o lona faletua faapea lana fanau, i lona le fa’alogo i a latou fautuaga sa tuuina atu mo le lelei o lona olaga.

Na talosaga le ua molia i le Fa’amasinoga mo se avanoa e toe fo’i atu ai e tausi si ona Tina ua matua lona soifua, faapea ai le fa’atinoina o ona tiute e tausi ai lona to’alua ma lana fanau.

Na talosaga e McNeill le Fa’amasinoga mo se faasalaga faanofovaavaaia, ina ia maua ai le avanoa e toe fo’i atu ai i tua le ua molia e tausi lona aiga ma lana fanau. Na faailoa e McNeill ua matua salamo moni lava Toimoana e tusa ai o lana solitulafono sa fai, ma ua ia a’oa’oina se lesona taua mo lona olaga i le lumana’i, talu mai masina e 8 na taofia ai o ia i le falepuipui i Tafuna.

E pei ona taua e McNeill i le fa’amasinoga, o Toimoana, o se tagatanu’u o Samoa, ua faaipoipo atu i lona faletua, o se tagatanu’u o Amerika Samoa, ma ua toalua ona alo na fananau uma i Amerika Samoa.

Na lagolagoina e Lowe le talosaga a le itu tete’e mo se fa’asalaga faanofovaavaaia mo Toimoana. Na taua e Lowe e fa’apea, o se tasi o tuutuuga o le nofovaavaaia e manatu le malo e tatau ona faatinoina, o le auai lea o le ua molia i ni aoaoga fa’a faufautua e fesoasoani ai i le fa’afitauli o lona tagofia o vaega o fualaau fa’asaina.

O le mae’a ai ona fa’afofoga o le Fa’amasinoga i fa’afinauga a loia faapea ai le talosaga a le ua molia, na valaau ai loa se malologa puupuu.

A o le i tuuina mai e le afioga i le ali’i Fa’amasino Sili lana faaiuga, sa ia fa’aalu se taimi e faamanino ai mau faamaonia o lenei mataupu.

Saunoa Kruse e fa’apea, o le ua molia na pu’e fa’apagota e Leoleo i le so 5 o Me, 2018 ma tu’uaia i lona umia faasolitulafono o vaega o le pauta fa’asaina o le aisa. Ina ua tula’i o ia i luma o le Fa’amasinoga Fa’aitumalo, sa fa’atulaga ai loa le tupe e $3,000 e tatala ai o ia i tua.

O le aso 7 o Me na tatala ai loa i tua le ua molia ina ua ia totogi le tupe sa fa’atulaga e le Fa’amasinoga. O se tasi o tuutuuga o le tatala ai o ia i tua, e le tatau ona ia toe soli se tulafono a le malo.

Lua masina mulimuli ane ai talu ona tatala le ua molia i tua, ae toe loka o ia e Leoleo ma tu’uaia i le fa’atupu vevesi i nofoaga faitele, e mafua mai i se fa’alavelave na la fufusu ai ma se isi ali’i i le Maketi e fa’atau ai meamata a le aufai fa’atoaga i Malaeimi.

O le toe taofia faapagota ai o le ua molia i le mataupu fou lea, na sui ai loa e le Fa’amasinoga le tupe e tatala ai o ia, mai le $3,000 i le $10,000. Talu mai lava le taimi lea, sa taofia ai pea le ua molia i le toese i Tafuna, ina ua le mafai ona ia totogi le tupe sa fa’atulaga e tatala ai o ia i tua.

Saunoa Kruse e fa’apea, e tusa ai ma le ripoti a le Ofisa Faanofovaavaaia, o le ua molia, o se tagatanu’u o Samoa ua tele tausaga o aumau i Amerika Samoa nei.

E 5 tausaga na manatu le Fa’amasinoga e faasala ai le ua molia i le toese, peita’i ua faamalumalu lona tuliina o lea fa’asalaga, ae ua faanofovaavaaia o ia mo le 5 tausaga i lalo o tuutuuga e ao ona ia usita’i i ai.

O ni isi o ia tuutuuga e aofia ai lona tuliina o masina e 20 i le toese, peita’i, ua manatu le fa’amasinoga e fa’aaoga le 8 masina lea ua mae’a ona tuli e le ua molia e fai ma ana fa’asalaga i lenei mataupu, ae o le umi o loo totoe ai, o le a faamalumalu lona tuliina.

Ua poloaina fo’i o ia e totogi le salatupe e $3,000, aua ne’i ona toe tagofia le ‘ava malosi poo fualaau fa’asaina, o le a mafai fo’i ona faia se suega i lona tino ina ia faamaonia ai na te le toe tagofia fualaau fa’asaina.

Ua poloaina e le fa’amasinoga le ua molia na te tuua le atunuu ae toe fo’i atu i Samoa mo le umi o lana faanofovaavaaia, peita’i o le a taofi le fa’ataunuuina o lea tuutuuga, fuafua lava i le usita’i o le ua molia i poloaiga a le fa’amasinoga.

O afioga i ali’i Fa’amasino Lagolago ia Fa’amausili Pomele ma Muasau T. Tofili na lagolago i le afioga i le Fa’amasino Sili i le iloiloina o se fa’aiuga mo lenei mataupu.