Taofi e Trump ia tupe mo polokalama a a’oga, su e setete

AMERIKA

Ua iai nisi o setete o Amerika, ua fuafuaina le fa’auluina o ni a latou tagi e fa’asaga i le faigamalo a Trump, ina ia toe tu’uina ia le faitau piliona o tupe, i totonu o vaegatupe mo a’oga feterale, e aofia ai ma tupe mo polokalama i tua atu o taimi o a’oga, faapea ma polokalama i taimi o malologa i le tau mafanafana.

O se faalapotopotoga o loia sili faaTemokarasi, o lo’o avea ma sui o setete e 24 atoa ai ma le Itumalo o Columbia, sa fa’aulufaleina ia se tagi i le aso ananafi, i le faamasinoga feterale i Rhode Island.

I la latou tagi, o lo’o ua ta’ua ai e loia maualuluga o le tele o setete lanu moana, le solia o le faavae i le taofia o lenei vaegatupe ma talosagaina ai le faamasinoga, ina ia fa’atonuina le toe tu’uina o ia vaegatupe i totonu o a latou setete, i se taimi vave.

O le lua vaiaso talu ai sa faia ai se fa’ai’uga a le Ofisa o A’oga a le Malo Tele, e taofia lenei vaegatupe – lea sa tufatufaina i a’oga uma i tausaga taitasi, e aunoa ma se faafitauli, i le sefulu tausaga – ae peitai, talu lava ona faia lenei faaiuga a le ofisa o aoga, ua tele ni faafitauli tau tupe ua tulai mai i totonu o itumalo e tele.

I nisi o setete, ua faapea ona tapunia polokalama tau a’oa’oga i vaitaimi o malologa o le tau mafanafana, e pei ona saunoa ai le loia sili a Kalefonia, o Rob Bonta, i sa latou fa’aaliga mo vaega fa’asalalau.  I nisi o setete, ua fa’alauiloa ai e taitai o aoga le taofia o le toe fa’afaigaluegaina o ni tagata faigaluega fou.  

Ma ua le mautonu foi paketi ma fuafuaga mo tagata faigaluega, mo le tausaga a’oga fou, i le tele o a’oga, e pei ona saunoa ai Rob Bonta.

Sa ia ta’ua foi le tulaga pagati aua feagai ma a’oga, ona o lenei faaiuga ua faia e le alii Peresetene faapea le Failautusi o le Ofisa o A’oga, ia Linda McMahon, a’o sauna atu a’oga i a latou tapenapenaga, mo le toe amataina o le tausaga a’oga fou.

E leai se tala na maua mai i le Ofisa o A’oga e tusa ai ma lenei mataupu.

O le aso 30 o Iuni, na amata tula’i mai ai lenei faalavelave, ina ua tusi atu ia se tasi o sui o le Ofisa o Aoga, ia Brandy Brown, i le aufaigaluega a le Konekeresi, ma lapata’ia i latou, e tusa ai ma nisi o aoga o le a le mauaina vaegatupe e pei ona masani ai, i le tausaga aoga fou.

O polokalama a a’oga o lo’o a’afia i lenei faaiuga a le faigamalo a Trump, e aofia ai le ‘Migrant Education Program”, lea e faatupeina ia a’oga, e fesoasoani i fanau aoga, a matua o lo’o galulue i galuega fa’avaitaimi.  O se poloalama e faatupeina le aoaoina o faiaoga.  O se polokalama e faasino tonu i le aoaoina o le Gagana Peretania i totonu o aoga, mo fanau aoga e vaivai i le Gagana Peretania.

E le gata i lea, o le polokalama o lo’o fesoasoani malosi i le atina’eina o mataupu tau tekonolosi ma le faaleleia o le soifua maloloina fa’alemafaufau.  O polokalama pe a tu’ua a aoga ma taimi o malologa i le tau mafanafana, lea e tele ina aofia ai aoga mo fanau aoga vaivai.  Fapea ia poloalama, o lo’o fesoasoani i le aoaoina o le faitau tusi i tagata matutua.

Afai ae ioe se faamasino, e taofia ia le iloiloga o vaeega tupe a le faigamalo a Trump, o le a u’una’ia ai loa le malo feterale, ina ia toe tatalaina o se vaegatupe pe a ma le $3.6 miliona, mo a’oga I totonu o setete e 24 e aofia ai ma le Itumalo a Columbia.

Sa ta’ua e le loia sili a le itu Ripapilikana, o Rob Bonta, o le a latou tutula’i e finau mo vaegatupe ua alagatatau mo a latou setete, a leai, lona uiga e tatau ona o latou faamalamalama i alo ma fanau le mafua’aga.