Taofi e Leoleo le ta’avale i le saosaoa ae maua ai tupe ma fana

O le fa’aiuga o le vaiaso na te’a nei na tula’i mai ai se fa’alavelave i Tafuna, ina ua taofi e Leoleo se ta’avale ina ua masalomia le tagofia e le ave ta’avale o le ‘ava malosi, ae maua ai fana ma se vaega tupe tele lava i totonu o le ta’avale.

O le fa’aiuga o lea mataupu, ua molia ai nei le ali’i o Fa’afetai Jr Lefatia i le moliaga o le ave ta’avale ‘ona, fa’apea ai moliaga mama e 2 o le umia fa’asolitulafono o laau malosi.

O ia moliaga uma e 3, o moliaga o le vaega A o solitulafono mama, lea e mafai ona fa’asala ai se tasi i le toese mo le umi e le silia i le tasi le tausaga, pe fa’asala fo’i i le salatupe e le silia i le $1,000, poo le fa’asala fo’i i fa’asalaga uma ia e lua.

O le aso Gafua na te’a nei na tula’i ai Lefatia Jr i luma o le fa’amasinoga fa’aitumalo, ma ia teena ai tu’uaiga fa’asaga ia te ia. O le tama’ita’i loia fautua lagolago ia Anna Wells o loo tula’i mo ia, ae o le ali’i loia sili lagolago ia Jason Mitchell o loo tula’i mo le malo.

E $500 lea ua fa’atulaga e le fa’amasinoga e totogi ona fa’atoa mafai lea ona tatala le ua molia i tua e fa’atalitali ai taualumaga o lana mataupu.

Afai ae mafai ona tatala o ia i tua, ua fautuaina o ia e le fa’ amasinoga ina ia avea o ia ma tagatanu’u lelei e tausi i tulafono uma a le malo, aua ne’i taumafai e sola ese ma le atunu’u, ma ia tuuina atu lona tusi folau e taofi e le loia a le malo. Ua fautuaina fo’i o ia e aua ne’i ona taumafai e fa’afesoota’i molimau a le malo e aofia ai ma Leoleo sa taofia ma su’eina lana ta’avale.

TAGI A LE MALO

E pei ona taua i le tagi a le malo e fa’apea, o le po o le aso Faraile o le vaiaso na te’a nei na tula’i mai ai le fa’alavelave e pei ona molia ai Lefatia. A o fa’atinoina tiute masani a Leoleo i luga o le alatele i le po o le aso Faraile na te’a nei, sa molimauina e Leoleo se ta’avale o loo aga’i atu i sasa’e mo sisifo i se saoasaoa uiga ese.

Ona o le puipuiga o le saogalemu o le atunu’u feafioa’i i luga o le alatele, na mafua ai ona faia le fa’aiuga a Leoleo e taofi le ta’avale sa alu saoasaoa. Ina ua mae’a ona taofi le ta’avale, sa aga’i atu loa Leoleo ma fesiligia le ave ta’avale i le mafua’aga o le soona saoasaoa o lana ta’avale.

I totonu o le ta’avale, sa i ai le ali’i ave ta’avale, o ia lea o Fa’afetai Jr Lefatia, faapea ai ma le isi ali’i. A o talanoa Leoleo ma le ua molia, sa fa’alogoina le manogi pia e sau mai totonu o le ta’avale. Sa faia loa le ta’aiuga e taofi e Leoleo le ta’avale, ae o ali’i e to’alua sa i totonu o le ta’avale, na aumai i fafo ma ave i totonu o le isi ta’avale a Leoleo, ma momoli atu ai loa i laua i le Ofisa o Leoleo mo suesuega.

I tulaga masani i le fa’atinoina o galuega a Leoleo, sa fa’atinoina ai loa le sueina o le ta’avale, ma maua ai ni fana se 2 i le nofoa pito i tua, faapea ai ma se tiniotupe e silia i le $8,000. O fana sa maua e aofia ai le ituaiga o le .357 magnum ma le .22 pistol.

O mea uma sa maua i totonu o le ta’avale, ua taofia nei i lalo o le vaavaaiga a Leoleo, e fai ma mau fa’amaonia o le latou tagi fa’asaga ia Lefatia.