Talosagaina Senate faamaumauga faaopoopo mai i le LBJ i tagata maliu

Pago Pago - AMERIKA SAMOA

Na fa’aalia le le faamalieina o finagalo a afioga i Senatoa, i ripoti mai i le maota gasegase autu a le malo (LBJ) e tusa ai ma le aofaiga o tagata maliliu, i le iloiloga a le Komiti o le Soifua Maloloina lea sa faataunuuina i le aso Tofi o le vaiaso ua mavae, ma na fa’aalia ai e afioga i Senatoa le faafaigata ona o latou malamalama i ripoti mai i le LBJ, ma talosagaina ai nisi ripoti auiliili, ae e le’i toe fa’ataunuuina seisi iloiloga i le lumana’i.

O molimau na auai i lea iloiloga, sa aofia ai le Faatonusili o le LBJ, le susuga ia Dr. Akapusi Ledua faapea le CFO a le falemai, ia Sefanaia Kaumaitotoya, le sui CMO ia Dr. James Sunia faapea le Faatonusili o le HR a le falemai, ia Stanley Iakopo.

Sa faamaumauina e Dr. Ledua ia fuainumera o tagata maliliu mai i le tausaga e 2020, se’ia o’o mai i le faaiuga o le masina o Iuni 2024, lea sa ia faitauina.

Ma e tusa ai ma faamaumauga a le Faatonusili, o le fuainumera o tagata maliliu mai i le tausaga e 2020 seia o’o mai ia Tesema 2023, e pe a ma le 330-406, i le tausaga.  Ae i le o’o mai i le fa’ai’uga o le masina o Iuni 2024, o le aofaiga o tagata maliliu sa faamaumauina, e 193.

O le auiliiliga o tagata maliliu, e 50% i latou na maliliu a’o fa’ata’otolia i le falema’i, ae o leisi 50% na faamaonia ua maliliu, ina ua taunu’u i le falemai.  O lona uiga, sa maliliu mai o latou aiga ma nu’u, po o luga o le alatele, a’o aga’i atu i le falemai.

A taga’i i le fuainumera o tagata maliliu i so’o se mafuaaga (crude death rate), e vaevaeina i le aofaiga o tagata o le atunu’u, ta’i 1,000 pe 10,000.

Na ta’ua e Dr. Ledua, o le ‘crude death rate’ mo Amerika Samoa, e faavae i faamaumauga, e ta’i 6 i le 1,000 aofaiga o tagata o le atunu’u.  Ma ia faamanino atili mai e faapea, i le tausaga e 2020, o le ‘crude death rate’ i le lalolagi atoa, e ta’i 7.7 i le faitau aofai o tagata, e 1,000

I le Iunaite Setete, sa ta’i 8.3 i le faitau aofai o tagata e 1,000 ma o nei fuainumera, e faavae i se taumatega e 50,000 i le 55,000 faitau aofai o tagata i Amerika Samoa.

I se auiliiliga atili o nei fuainumera, o le aofaiga o tagata maliliu i le tausaga, ua fa’ailoa mai ai, i le tausaga e 2020, e to’a 330 tagata na maliliu.  I le tausaga e 2021, e to’a 336 tagata na maliliu ai.  E to’a 406 tagata maliliu na faamaumauina, i le tausaga e 2022 ona o le Koviti 19 ae i le tausaga e 2023, e to’a 361 le fuainumera faamaumauina o tagata na maliliu ai.  Mai ia Ianuari se’ia o’o mai i le masina o Iuni, o le 2024, e to’a 193 tagata na maliliu sa faamaumauina.

Sa fa’ailoa atu e le afioga Senatoa Satele Aliitai Lili’o i le Taitaifono o le Komiti a le Senate, le afioga Senatoa Tuiasina Dr. Salamo Laumoli, le atoa o le fa aso talu ona talosagaina e le Senate le lisi lea na fa’ato’a fa’ao’oina atu e le Faatonusili ale LBJ.  Ae peitai, e na te le malamalama i le tele o fuainumera o lo’o i totonu o lea ripoti.t

Na saunoa le afioga i le Senatoa a le Vaifanua, o lo’o ona malamalama i le atugalu o le pulega a le LBJ ma le taitaifono o le Komiti o le Soifua Maloloina a le Senate, i lenei mataupu talu ona ia fa’atula’ia mai i le vaiaso ua mavae, ona o faamatalaga a tagata lautele, ua tau afaina ai le falema’i.

Sa fa’atatau le saunoaga a le afioga i le Senatoa, i faamatalaga a tagata, i le le fiafia ona o le maualuga tele o le fuainumera o tagata e maliliu mai i le falemai, ma ua fa’aigoaina ai le falema’i autu a le malo, o le Fale Maliu.

Sa ta’ua e Satele, lona mana’o e faamanino i le pulega a le falema’i, o lo’o manatu le taitaifono a le komiti, e le auai manatu o le Senate i faamatalaga a tagata, ae peitai, sa saunoa le afioga i le Senatoa, o lo’o lagolagoina e sui o le maota maualuga ia le faaigoaina e le toatele o tagata ia le LBJ, o se fale o sulufa’iga.

Sa toe saunoa Satele, na mafua ona tapa le Senate i lenei lisi, ona o le fia malamalama i le aofaiga tonu o fuainumera o tagata maliliu, le mafuaaga na maliliu ai, pe na faapefea ona o latou maliliu i le falemai, i o latou aiga po o nu’u, po o le maliliu i luga o alatele a’o aga’i atu i le falema’i.

Ma na fautuaina ai e le afioga i le Senatoa le toe faia mai o seisi lisi po o seisi ripoti, ma tulaga uma o lo’o misi mai i le ripoti muamua, i seisi iloiloga o le a toe faia i se aso o i luma.

Sa ia fesiligia ai foi lea o le sui CMO ia Dr. James Sunia, pe ua maua se CMO tumau, lea na tali mai ai Dr. Sunia, o le aso [ananafi] na amata fa’atalanoaina ai e le komiti faafoe a le LBJ ia tagata mo lea avanoa.

Na fa’aleoina e Satele le agavaa o foma’i i le faatinoina o latou tiute e ala i le faalagolago i masini faaneionapo ma ia toe fesiligia ai Dr. Sunia, po o lelei pea le ‘CT Scan’.  Lea sa tali mai ai Dr. Sunia, ua atoa le lua vaiaso talu na le toe ola le ‘CT Scan’.  Sa ta’ua e Dr. Sunia, o le aso Gafua o le vaiaso ua mavae, na fa’ato’a taunu’u mai ai vaega o le masini sa okaina ma o lo’o galulue ia i latou e iai le tomai faapitoa (technicians), e fofoina lea faafitauli.

Sa fesiligia foi e Satele ia le sui CMO po o le a le mamafa o le tagata e gata mai ai le mafai e le masini ona fa’aaogaina, sa tali Dr. sunia, e 350 pauna.  Na saunoa Satele, o le mamafa o le toatele o tagata Samoa, e 300 pauna, o lona uiga e le o mafai ona fa’aaogaina le masini mo i latou i le va o le 350 ma le 400 pauna, le mamafa.

Sa fia malamalama le sui mai i le Vaifanua pe aisea na le taga’i ai le pulega a le LBJ i lea tulaga, ina ua o latou fa’atauina le ‘CT Scan’.  Sa tali mai Dr. Ledua, o lea o le a faatauina se latou CT Scan fou e mafai ona aoga i le sili atu ma le 500 pauna.  Ma sa ia ta’ua foi le fa’atalitali o le falemai mo se masini MRI lea ua mae’a ona faatauina, ae e le’i taunu’u mai.

Na fa’atula’i e le afioga i le Senatoa ia Alo Paul Stevenson, ia le mataupu i le le lava o avanoa i totonu o le fale maliu, mo tino maliu ma sa ia fa’aalia le si’itia o le fuainumera o tagata maliliu, ua leai ai se avanoa ma ua fa’aaogaina ai nei le falesa a le falema’i e tu’u ai nisi o tino maliliu.

Sa ta’ua foi e Alo, o nisi o tino maliu ua o’o atu i le tolu masina o iai pea i le fale maliu, ma ia fesiligia ai le Faatonusili a le LBJ, pe aisea le mea o tupu ai lenei faafitauli ma po o le a foi se mea o faia e fofo ai lenei faafitauli.

Sa ta’ua e Dr. Ledua, o se tasi o mafuaaga autu ona o lo’o iai nisi o aiga o lo’o fa’atali o latou aiga o lo’o tagi mai ala.

Na fa’aalia e le Faatonusili o le LBJ, o lo’o iai sa latou tulafono e limiti ai i le 30 aso, e mafai ona iai se tino maliu i totonu o le falemaliu.  Ae peitai, e faafaigata ona o latou faamalosia lea tulafono ona o le tele o mafuaaga e mafua ai ona talosaga aiga, ina ia tu’u ai pea a latou tagata maliu i le falemaliu.

Sa ia faamamafaina, le avea o le falemaliu ma le falemai ma galuega pito i taua o iai nei, ma ua amata ona faagaioi tauofoga mo le ata ma le fausia o le falemaliu, ma e faamautuina loa se konakarateina, o le a amataina loa galuega.

Na ia ta’ua foi le fausia muamua o se nofoaga e tu’u ai pusa maliu ma o le a la’u uma iai pusa maliu mai totonu o le falesa, ina ia mafai ona amata galuega mo le toe faaleleia ina ia mafai ona fa’aaoga tatau le falesa.  O lo’o iai se faamoemoega, e amataina galuega ia Setema.

Na fesiligia e le Peresetene o le Senate, le afioga Tuaolo Manaia Fruean pe fia le tupe totogi e tu’u ai se tino maliu i totonu o le falemaliu.

Sa le’i mautonu Dr. Ledua i le aofaiga tonu, pe $30 pe $50, lea na faailoa mai iai e Tuaolo, e tatau ona si’i i le $500 i le aso, ina ia mafai ona ave’ese vave tino maliu a aiga.