Talosagaina Konesula a Filipino i Honolulu se fesoasoani a le Loia Sili

Ua talosagaina e le Konesula a le malo o Filipaina i Honolulu, susuga Joselilo A. Jimeno se fesoasoani a le Loia Sili a le malo o Amerika Samoa, Talauega Eleasalo Ale, mo se avanoa e toe fa’afo’i mai ai le fafine Filipino ma’itaga lea na tipoti ese atu mai Amerika Samoa i le masina na te’a nei ma poloka ai i Samoa i le taimi nei, ina ia mafai ai ona tu’u eseeseina o ia ma lana pepe i le falema’i i Fagaalu.

E lua tusi sa tuuina atu i le Loia Sili e uiga i lenei mataupu. O le tusi mai le Konesula atoa ai ma le tusi mai le Ta’ita’i o le Ofisa e Sulufa’i i ai tagata mafatia (Victims Advocate) ia Ipu Avegalio Lefiti.

E pei ona taua i tusi uma ia e lua, o Gerin Lloren ua 7 ma le afa masina lona ma’itaga, atoa ai ma lana tama e 5 tausaga le matua, na tipoti fa’amalosi ese mai ma Amerika Samoa i le aso 1 Mati 2018 ina ua fa’ailoa e le Ofisa o Femalagaaiga ua mae’a le aoga o ona pepa nofomau.

Na aga’i atu i laua i Apia ma le fa’amoemoe e pu’e ai le la va’a e fa’aauau ai le la malaga i Manila i Filipaina. E le i taliaina e le va’a o le Fiji Airways le fafine ona e ma’itaga, ma poloka ai loa i laua ma lana tama i Apia.

O le taimi nei, e le o i ai se aiga o lo o nonofo ai i laua, e leai se tupe e faia ai ana talavai mo lona ma’itaga, atoa ai ma le aafia atu ai o lana tama mai le le mafai lea ona ave i le aoga.

Na taua e le Konesula i lana tusi i le loia sili e fa’apea, o le itu o lo o pito sili ona popole i ai lona mafaufau o le saogalemu o le pepe e le i fanau mai a le tina. Ua ia talosagaina ma le agaga fa’aaloalo le loia sili mo se avanoa e talia ai le toe fo’i mai o le tina e fanau i Amerika Samoa, ona o lea fo’i o loo i ai pea i le teritori lona to’alua e mafai ona fesoasoani ia te ia.

O fa’amatalaga uma lava o lo o taua i le tusi a le Konesula o lo o taua fo’i i le tusi a Ipu e fa’atatau i le tulaga pagatia ua aafia ai le tina ao i ai i Samoa.

Na taua e Ipu e fa’apea, e le tatau ona faia e Amerika Samoa nei ituaiga faiga i tagata mai fafo e ulufale mai i le teritori, aua e atagia ai faiga faapologa ma le saua. Sa ia taua fo’i e fa’apea, o le tina ua toe tipoti i Samoa, sa malaga mai o ia i se pemita na sainia e le to’alua o se ali’i e faigaluega i le Ofisa o Femalagaaiga.

O le taimi na faia ai fesuiaiga mo lana sponsor na tula’i mai ai loa le fa’alavelave e pei ona faia ai le fa’aiuga e toe tipoti o ia i lona atunu’u.

O le taimi nei o lo o i ai pea o ia ma lana tama i Samoa, ma ua manaomia le toe fia fa’afo’i mai.