Talosagaina e le Faigamalo se $15 miliona mai i le ARPA

Pago Pago - AMERIKA SAMOA

O le aso 27 o Me, 2025 sa faapea ona fa’ao’oina atu ai e le Faigamalo a Amerika Samoa ia sa latou tusi talosaga i le Ofisa o le ARPA (American Samoa Rescue Plan Act), mo se fesoasoani tau tupe e $15 miliona, ona o faafitauli tau tupe o lo’o feagai ma le faigamalo.

O lenei tusi talosaga na faapea ona sainia e le susuga ia Satia Aokuso Satia, a’o avea o ia ma sui pule o le Ofisa o Paketi, ma fa’ao’oina atu i le Faatonusili o le ofisa a le ARPA, le susuga ia Robert Uti Gebauer.

E tusa ai ma le talosaga a Satia, ua avea fa’afitauli tau tupe a le malo ma tulaga na fa’avaeina ai se taualuga e gata mai ai paketi mo ofisa ma matagaluega uma a le malo, mo le Tausaga Tupe 2026, i le $135 miliona, o se pa’u lea e $30 miliona (pe 18.6%) mai i le Tausaga Tupe 2025.

Sa ta’ua e Satia, ona o tulaga le mautonu ua tula’i mai i tupe mai i le malo feterale, ua fa’apea ona a’afia ai tulaga o tupe maua i totonu o Amerika Samoa.  E le gata i lea, ona o le ‘taua o lafoga’ o lo’o faapea ona feagai ma le Peresetene o le Malo Tele, ua faapea ona va’aia ai le si’itia o tau o oloa ma auaunaga, i totonu o le teritori.

Ma na fa’aalia e Satia, o le taumafaiga a le malo o Amerika Samoa, e fa’aaogaina uma vaegatupe o lo’o maua mai i le ARPA, o le a mafai ona fesoasoani e fofoina ai le fa’afitauli, i le fa’aitiitia o tupe mo le Tausaga Tupe 2026.

Sa ia ta’ua foi le tele o aitalafu o lo’o feagai nei ma le malo, aemaise o le aitalafu a le malo i le Teugatupe o Litaea a tagata faigaluega a le malo.

Na faapea foi ona fa’amatalaina i le tusi a Satia ia le tulaga o iai le malo o Amerika Samoa ma le ave o le fa’amuamua, a’o feagai ai ma le tapenapenaga o le Paketi mo le Tausaga Tupe 2026, ina ia fa’amautuina galuega mo tagata faigaluega uma e la malo.

Ma sa fa’amanino e Satia, o nisi o ofisa ma matagaluega, e na’o le pau le latou vaegatupe o iai, e mo totogi o a latou tagata faigaluega, ae leai se tupe mo le faagaioiga o ofisa.

O lea tulaga, e pei ona sa ta’ua e Satia, e tele ina molimauina i ofisa a pei o le Ofisa o Aoga, Ofisa o Galuega Lautele, Ofisa o Leoleo ma isi lava ofisa ma matagaluega, e tele ina fa’alagolago i tupe maua mai lotoifale.

Na fa’aalia foi e Satia e faapea, e tusa lava pe maua le $30 miliona (mai i le ARPA) e faatumau ai le paketi a le Tausaga Tupe 2026, i le tulaga o iai le Tausaga Tupe 2025, ae o lea talosaga, o lo’o saili ai se $15 miliona, ina ia fa’asoasoa i ofisa ‘ese’ese ale malo o Amerika Samoa.

O lenei tupe o le a faapea foi ona fesoasoani i le faagaioiga o le tele o ofisa ma matagaluega, aemaise lava ofisa tetele, e aofia ai ma Polokalama Faapitoa, lea o lo’o faasino tonu i galuega mo le toe faaleleia o le teritori.  

Sa fa’amalamalama foi i le tusi a Satia, ia le pa’u tele o tupe aoina, i le va o le Tausaga Tupe 2023 ma le Tausaga Tupe 2024, ona o le koviti-19, faapea ai ma le toe fa’afo’iina o tupe sa le’i fa’aaogaina.

Na ta’ua e Satia le tele o se popolega, o le a fa’auau ona itiiti tupe aoina mo le Tausaga Tupe 2026, ona o le siitia o tau o le soifuaga, o faaopoopoga o totogi o tagata faigaluega, o le pa’u i tupe maua mai i le malo feterale, o faaopoopoga ma le fa’aitiitia o tupe mo polokalama ona o fa’ai’uga faia e le Peresetene o le Malo Tele, ma le ave’esea o le $30 miliona mai i le paketi o le Tausaga Tupe 2025, atoa ai ma le si’itia o le fuainumera o tagata ua leai ni galuega.