Talosaga tamaitai tusi solo Samoa o lo’o molia i le fasioti tagata ina ia totogi tupe e tatala ai i tua

Apia - SAMOA

Ua i luma nei o le Faamasinoga Maualuga a Samoa ia se talosaga sa faaulu e le loia a le tamaitai tusi solo Samoa, o Sia Figiel ia se talosaga, mo se vaegatupe faatulagaina e mafai ona ia totogia, e tatalaina ai o ia i tua, e faatalitali ai lona faamasinoga.

O Figiel o lo’o molia i le maliu o se polofesa Samoa, o Carolyn Sinavaiana Gabbard ma ua mae’a ona ia faalauiloa sana fuafuaga ina ia tali ioe i moliaga o le fasioti tagata.

Sa toe fa’amaonia e Figiel lona mana’o, tauala atu i lana loia ia Unasa Iuni Sapolu, ina ua tula’i i luma o le Faamasinoga Maualuga i le aso Gafua (i Samoa), i le amataga o le vaiaso.

Na fa’aalia e le loia a le malo, le susuga ia Maiavatele Timothy Fesili, i le faamasinoga, i le mae’a ona o latou iloiloina lenei mataupu, o le a o latou fa’agasolo ai ma moliaga uma, e aofia ai le fasioti tagata.

Ae tali mai le itu tete’e, o lo’o taofi mau pea le ua molia i lana tali, e na te le’i solia se tulafono, ma toe fa’atula’i mai ai lona mana’oga mo le faatulagaina o se vaegatupe totogi e mafai ona tatalaina ai o ia, e faatalitali ai lona faamasinoga.

 Le aso 9 o Setema lea ua fa’akalenaina ai e le afioga i le Faamasino ia Fepuleai Ameperosa Roma, ia le iloiloga mo le talosaga a Figiel, i luma o le alii faamasino sinia, ia Vui Clarence Nelson.

O Figiel, sa lokaina talu mai le masina o Me, lea na tupu ai le faalavelave lea na maliu ai Gabbard.

I le lua vaiaso talu ai, na fa’aalia ai e le loia a Figiel le manatu o le ua molia, e toe ave i tua lana talosaga mo se vaegatupe totogi e tatalaina ai o ia i tua, ma se manatu o le a sui lana tali i ona moliaga.

Ua ripotia mai foi e le Samoa Observer e faapea, o lo’o mana’o le ua molia ina ia faia se fetu’una’iga ma le malo, ina ia ave’esea le moliaga o le fasioti tagata, ae toe Iloilo se maliliega mo le moliaga o le fasioti tagata le fuafuaina.

Ae mo le taimi nei, ua mae’a ona fa’akalenaina e le faasminoga ia le faataunu’uina o iloiloga ia Mati o le tausaga fou.

E le o manino po o le a le mea na tupu i le su’esu’ega o le mafaufau, lea na talosagaina e Figiel.