Talosaga se alii o lo’o molia i taupulepulega e fasiotia Sailele ina ia talia ni isi molimau fou

Apia - SAMOA

Sa faaulufaleina e le loia a se alii o lo’o tuli nei lona fa’asalaga i le falemai mo le fa tausaga ma le ono masina, ona o moliaga i taupulepulega e fasioti le sa avea ma Palemia o Samoa, ia se talosaga i le Faamasinoga o Apili mo le taliaina o se molimau fou.

O le susuga ia Lemai Faioso Sione, o se tasi e atoa iai le to’atolu o i latou, o lo’o tuli nei o latou fa’asalaga i le falepuipui, ona o moliaga i ni taupulepulega e fasioti i le Faipule mai i le itumalo o Lepa i Upolu, Samoa, po o le afioga ia Tuilaepa Sailele Malielegaoi lea sa avea ma Palemia o Samoa.

O tamaitai loia ia Josephine Fuimaono Sapolu ma Unasa Iuni Sapolu o lo’o tutula’i mo Lemai, lea sa faaulufaleina le talosaga i luma o le Faamasinoga Apili i le amataga o lenei vaiaso.

O le afioga i le Faamasino Sili ia Satiu Simativa Perese faatasi ai ma Faamasino ia Asher ma William Young, o lo’o latou mata’ituina lenei mataupu.

O le molimau fou e pei ona ta’ua i le ripoti a le Samoa Observer, e tauala mai lea ia Michael Toevai, lea sa molimau i totonu o le faamasinoga.

I lana molimau, na ta’ua ai e Toevai lona mauaina o se tusi i totonu o se faila a le faalapotopotoga a le S.S.I.G (Samoa Solidairty International Group), lea o lo’o avea ai o ia ma Failautusi ae sa avea ai Lemai ma Tausitupe.

Na molimau Toevai, o lenei tusi sa tusia e le susuga ia Taulai Leiloa.  O le uluai tagata lea na molia ma ua mae’a lona faamasinoga, lea na ia ioeina ai moliaga sa fa’asaga ia te ia.

Sa ta’ua foi e Toevai i lana molimau, o Novema 2021 sa tusia ai lenei tusi ma sa ia fa’ato’a mauaina i totonu o faila a le S.S.I.G, ina ua mae’a le faamasinoga a Lemai.

Na molimau foi le faifa’atoaga mai i le afioaga o Afeaga e faapea, ina ua ia maua le tusi, na ia fesiligia ia Lemai pe aisea na le fa’ao’oina atu ai le tusi i le faamasinoga, ae na tali Lemai, sa ia tau sailia le tusi.

Sa fesiligia e le loia a le malo ia Lupematasila Iliganoa Atoa le moni ma le faamaoni o lenei tusi ma sa ia su’esu’eina foi Toevai pe na faapefea ona ia mauaina le tusi.  O le susuga i le alii loia ia Joshua Leung Wai sa avea ma loia lagolago ia Lupematasila.

Na taofi mau le molimau i lana mau, sa ia mauaina lenei tusi i totonu o faila a le S.S.I.G ae e le’i tu’uina atu e seisi ia te ia.

Na fesiligia foi Toevai pe na te le silafia po o Lemai sa tusia le tusi po o seisi, sa ia tali ioe, e na te le iloa.

Sa fesiligia e Lupematasila ia Toevai pe sa iai le tusi i le taimi o le fa’amasinoga a Lemai.  Na tali Toevai, e le o Lemai na su’eina le tusi, ona sa fa’ate’ia o ia (Lemai) ina ua ia (Toevai) fai atu iai e uiga i le tusi.

O Lemai na fa’amasino faatasi ma Malele Paulo lea o lo’o lauiloa i le suafa o ‘King Faipopo’, i le tausaga ua mavae ma sa fa’amaonia ai o la moliaga, o le taupulepule e fasioti ia Tuilaepa.

E fa tausaga ua fa’asalaina ai Paulo i le falepuipui ae o Lemai, e lima tausaga ia le fa’asalaga o Taulai.

O lo’o molia ai foi le susuga ia Talalelei Pauga i lenei mataupu, ae e le’i amataina lona faamasinoga.  Ma o le mafua’aga lea ua taofiofi ai e le faamasinoga faamatalaga e uiga i lenei mataupu, se’ia mae’a lona faamasinoga.