Talosaga Nua fa’amasinoga e solofua tagi fa’asaga ia te ia

Ua i luma nei o le Vaega Iloilo o le Fa’amasinoga Maualuga a Amerika Samoa se talosaga na fa’aulu e le afioga i le ali’i Senatoa ia Nuanuaolefeagaiga S. Nua ma lana loia o Gwen Tauiliili-Langkilde, e talosagaina ai le fa’amasinoga ina ia solofua le tagi ua fa’aulu e ni matai o le itumalo o Ta’u, Manu’a fa’asaga ia te ia.

E le gata la i le talosaga e solofua ai le tagi ua faila fa’asaga ia te ia, ae ua mae’a fo’i ona fa’amanino e Nua fa’amatalaga mai lana itu e tusa ai o le mataupu lea ua i luma nei o le Fa’amasinoga.

O le mataupu e pei ona taoto nei i luma o le fa’amasinoga, o le tagi na fa’aulu e le afioga Lefiti Atiulagi Pese, Maui Aloali’i ma Tauese V.K Sunia, o ni matai mai le itumalo o Ta’u, Manu’a, fa’asaga i le mataupu e pei ona le talafeagai ai le nofoia e Nua o le isi nofoa o le itumalo o Manu’a #1 i luma o le maota maualuga a le senate.

Na taua e Nua i lana fa’amatalaga ua i luma o le fa’amasinoga e fa’apea, i le mae’a ai ona fa’atauto o ia o se tasi e to’alua i ai senatoa mai itumalo o Fitiuta, Faleasao ma Ta’u, na amata ai loa ona ia fa’atino tiute fa’a senatoa i totonu o le maota, e aofia ai fa’aiuga mo iloiloga o loo fa’agasolo e pasia ai tofigaa le kovana, atoa ai ma le tofia o ia e avea ma Ta’ita’i o le Komiti o Tulafono a le maota maualuga, e aofia ai ma le vaavaaia lea o galuega fa’atino a isi uma komiti a le maota.

I le aso 23 Novema 2016, na valaau ai e le tofa i le tootoo ia Fa’amausili [Pomele] le fonotaga mo le itumalo o Ta’u, e filifili ai so latou sui mo le isi nofoa e lua i ai nofoa mo itumalo o Fitiuta, Faleasao ma Ta’u, ma malilie ina ia fono lava pitonu’u mavaevae e lua o Ta’u, o Si’ufaga ma Luma, e filifili mai ai ni o latou sui.

Na fono Luma ma filifilia ai le afioga a Tuialu’ulu’u Vaimili e fai ma o latou sui, ae o Nua na tasi i ai le pitonu’u o Si’ufaga e fai ma o latou sui, ae ina ua tauaofia le fono tu’u fa’atasi a Ta’u, lea e aofia ai Si’ufaga ma Luma ma fa’ailoa ai suafa o sui ua filifilia e itu ta’itasi i le aso lava lea, ma filifilia ai loa Nua e fai ma o latou sui.

Sa auai Lefiti i le fonotaga a Si’ufaga na filifilia ai Nua, ae le’i finagalo o ia e auai i le fonotaga tu’u fa’atasi a le itumalo o Tau, e oo fo’i i le Fa’alupega ia Maui, sa logo i ai le fonotaga i le aso 23 Novema peita’i e lei auai o ia ona o tulaga le atoatoa i le malosi o le tino.

I le fonotaga sa faia i le aso 24 Novema i Malaetele i Ta’u, Manu’a, sa saili ai loa ni sui se to’alua mo le maota maualuga, ma fa’alauiloa ai e Fitiuta le afioga a Galea’i M. Tu’ufuli e avea ma o latou sui, ae fa’alauiloa e Faleasao le afioga a Vaitautolu e avea ma o latou sui, ma Nua sa fai ma sui o Ta’u, ae i le fa’aiuga o le fonotaga, na toe filifilia ai loa Galea’i ma Nua e avea ma sui o le itumalo i le maota o le Senate, ma e ui e lei auai le afioga i le Fa’alupega ia Maui mo le fa’amaoniaina o tofiga a le itumalo, sa mafai lava ona fa’amaonia e le Kovana Itumalo ia Misaalefua J. Hudson sa auai fo’i i lea fonotaga.

Na taua e Nua le le manuia o ana taumafaiga e tele ina ia saini e Maui le pepa e fa’amaonia ai le filifilia o ia, ma saini ai loa le aao o le afioga a Misaalefua e fa’amaonia ai le toe filifilia o ia mo le isi nofoa o le itumalo.

TALOSAGA SOLOFUA AI LE TAGI FA’ASAGA IA TE IA

Na taua e le itu tete’e e fa’apea, e ui e lei mafai e le Fa’alupega ia Maui ona sainia le pepa e fa’amaonia ai le toe filifilia o Nua, ae sa mafai lava ona fa’amaonia e Misaalefua.

I le tulaga o le tula’i mai ai o se fete’enaiga, e talitonu le itu tete’e, e leai se fete’enaiga i le va o Nua ma matai o loo tagi i lenei mataupu. Na taua fo’i e le itu tete’e e fa’apea, ua silia ma le masina talu ona fa’atino e Nua ona tiute fa’a senatoa, e aofia ai ma le faamaonia o tofiga a le kovana mo sui lana kapeneta, aemaise ai ma le avea o ia ma taitai fono o le Komiti o Tulafono a le maota maualuga.

Ae afai e fa’aleaoga e le fa’amasinoga le faamaonia o Nua e avea ai ma sui o le senate, o le a fesiligia uma ana fa’aiuga ua mae’a ona faia, e le gata fo’i i lea, ua mae’a fo’i ona fa’amaonia e le Senate le toe filifilia o Nua e avea ma se tasi o senatoa mo Fitiuta, Faleasao ma Ta’u.

Ona o tulaga e pei ona taua, ua talosagaina ai loa e le itu tete’e le fa’amasinoga ina ia fa’aleaoga le tagi ua faia fa’asaga ia Nua.