Talosaga mo i latou na a'afia galuega ona o le COVID-19

Ua fa’atulaga le Matagaluega o Tagata Faigaluega a le Malo latou te taliaina talosaga uma a i latou ua agava’a i le totogi ua fa’atulaga mai e le fa’atupega fa’apitoa mai le Malo tele ona o a’afiaga o galuega i le Fa’asa o le Coronavirus.

O lenei avanoa ua ofoina mai mo i latou uma na vaea mai galuega, fa’aititia itula faigaluega ma i latou fo’i ua tapunia latou ofisa faigaluega ona o a’afiaga o le Coronavirus.

O lenei matafaioi ma ona aiaiga tamau e fa’atautaia ai, na tuusa’o mai e Kovana Lolo Moliga i le Matagaluega o Tagata Faigaluega a le Malo latou te fa’atinoa, ma ua aofia ai tagata faigaluega i le malo ma pisinisi tua. 

O nisi o aiaiga mo talosaga:

• tagata faigaluega o le sitiseni Amerika, nationale Amerika, pe o se tagata nofo mau i Amerika. E le agava’a i latou o tagata mai fafo ae o lo’o nofomau i Amerika Samoa ma le Immigration ID a Amerika Samoa

• tagata faigaluega a’o ia o lo’ova’aia lana tama, ua le mafai fo’i ona alu e faigaluega ona ua tapunia Day Care sa tuu ai lana tamaititi ona o le Coronavirus, lea ua motusia ai lona avanoa faigaluega ona ua tatau ona nofo e va’aia lana tama po’o le fanau, ua agava’a i latou e talosaga i lea fo’i alamanuia.

• tagata faigaluega ua le mafai ona toe o e faigaluega ona o a’afiaga o le fa’asa mo le Coronavirus ma a’afiaga o le soifua e ono lamatia ai.

• tagata faigaluega ua fa’atonuina ina ia nofo va’ava’aia i lona aiga mo lenei taimi umi ona o le coronavirus.

• I latou na fuafua e amata faigaluega i ni galuega ae ua toe fa’amuta mai a’o le’i amata ona o le fa’asa o le Coronavirus.

• tagata faigaluega na to’esea o latou itula faigaluega o a’afiaga o le fa’asa o le Coronavirus.

• tagata faigaluega na tapunia latou galuega ona o le Coronavirus, ua mafua ai ona le toe faigaluega motusia ai le tupe maua ma ua a’afia ai le gasologa lelei o latou aiga.

Ua fa’atulaga aso e tolu o le vaiaso fou e mafai ai ona faila talosaga. O nofoaga e tolu ua tatala mai e aofia ai Tafuna Elementary Gymansium, Samoana High Gymnasium ma Aua Elementary Gymnasium. Aso Gafua, aso Lulu ma Aso Faraile mai le itula e 8:00 i le taeao se’ia pa’ia le 3:00 i le afiafi.

Mo le vasega o e faigaluega i pisinisi tumaoti, ua i ai uma aiaiga ua lisia i luga, ae toe fa’aopoopo atu i ai ma le isi vaega tuga lava e tasi; O se pisinisi ua matua fa’amaonia lava ua a’afia tele ana tupe maua, ma ua matua fa’asaina lava ona tatala faitoto’a ona o le fa’asa mo le Covid-19.

O lo ua fa’atulaga fo’i le vasega o aufaigaluega uma e galulue i pisinisi tumaoti e aga’i ane i so’o se nofoaga e latalata ia te ia e pei ona fa’ailoa atu i le aso Lua, Aso Tofi ma Aso Toona’i mai le itula e 8:00 se’ia oo i le itula e 3:00 i le afiafi.

O i latou uma o tagata faigaluega i pisinisi tumaoti o le a oo ane i aso atofaina mo tagata faigaluega a le Malo, o le a te’ena i latou ma a latou talosaga, e le talia pe afai e sese le aso o le a e oo ane ai.

Ua faia nei fuafuaga uma ina ia le matua so’ona to’atele na’ua tagata i le taimi e tasi i so’o se nofoaga ma ia le silia fo’i i le 150 e fa’apotopoto i le taimi e tasi.