Talosaga Luatua i le fa’amasinoga e solofua moliaga fa’asaga ia te ia

Ua taoto atu nei i se fa’aiuga a le fa’amasinoga maualuga le talosaga na fa’aulu e le susuga a Luatua Filisouaina Ta’afua ma lana loia ia Gwen Tauiliili-Langkilde i le vaiaso na te’a nei, e talosagaina ai se fa’aiuga a le fa’amasinoga ina ia solofua moliaga mamafa e 20 o lo o tu’uaia ai o ia e le malo.

O Luatua lea sa avea ma Pulesili o le Ofisa o le Litaea a le malo mo le tele o tausaga, o loo tu’uaia e le malo i moliaga eseese e aofia ai moliaga mamafa e 4 o le ave fa’agaoi o tupe sa tu’uina atu i lalo o lana vaavaaiga, 5 moliaga mamafa o le gaoi, 3 moliaga mamafa o le faia o fa’amaumauga taufa’asese, 7 moliaga mamafa o lona sainia fa’amalosi o ni fa’amaumauga, ma le moliaga mamafa e tasi o lona tu’uina atu lea o se siaki e le o i ai se tinoitupe i totonu.

O le iloiloga a Luatua i le aso Faraile o le vaiaso na te’a nei, na maua ai loa le avanoa e finauina ai e lana loia a laua talosaga e 2 ua mae’a ona tu’uina atu i le fa’amasinoga, lea fo’i na maua le avanoa o le loia a le malo ia Bob Pickett e tali mai ai.

I le talosaga a le itu tete’e ina ia solofua moliaga o lo o tu’uaia ai le ua molia, na finau ai Tauiliili-Langkilde ina ia solofua uma le tagi fa’asaga ia Luatua, ona e le o mafai e le malo ona fa’atino ona tiute i lalo o le tulafono e lagolago ai la latou tagi fa’asaga i le ua molia, e pei o le tu’uina atu lea o ni fa’amatalaga tusitusia e fa’amanino ma lagolago ai moliaga esese ua latou faila fa’asaga ia Luatua.

Na taua atili e Tauiliili-Langkilde e fa’apea, e i ai fo’i isi moliaga a le malo ua ova atu i le fa’atasi ona latou faila fa’asaga i le ua molia, ma ua foliga mai ai e matuia se gaioiga ua tu’uaia o ia sa ia faia. Sa ia talosaga atili i le fa’amasinoga ina ia fautua i le malo, e iloilo toto’a poo ai tonu moliaga e tatau ona faila fa’asaga i le ua molia, ae le na o le togi fa’atasi uma atu i totonu i le taimi e tasi.

Mo se fa’ata’ita’iga o le moliaga o le tu’uina atu lea o se siaki e le o i ai se tupe i totonu, lea na finau ai le itu tete’e, pe aisea ua molia ai Luatua i lea moliaga ae o lo o tele faleoloa tetele o loo fa’apipi’i solo ai igoa o tagata ua le taliaina a latou siaki, e mafua mai i isi a latou siaki sa tu’uina atu muamua sa tula’i mai ai se fa’aletonu.

I le si’osi’omaga o lenei mataupu e pei ona alia’e ai tu’uaiga fa’asaga ia Luatua, na taua ai e lana loia le i ai le talitonuga, o lenei mataupu uma e afua mai i le fa’ailoga lanu atoa ai ma le faia o se gaioiga ina ia fa’aleaogaina ai le tautua ua tele tausaga o ofoina atu e Luatua mo le Ofisa o le Litaea a le malo sa tautua fa’amaoni ai.

Ae na taua e le itu a le malo e fa’apea, o moliaga ua faila fa’asaga ia Luatua, sa fa’avae mai lea i mataupu eseese na maua e le malo i ana su’esu’ega sa a’afia ai o ia, e pei o lona saini fa’amalosi o le saini a le Ta’ita’ifono o le Komiti Fa’afoe, o le mataupu e fa’atatau i lona fa’aopoopo o lona totogi e aunoa ma se fa’atanaga mai le Komiti Fa’afoe, atoa ai ma le mataupu i lona fa’aaogaina o lona malosi fa’a ta’ita’i e faia ai fa’aiuga na te gaoia ai tupe mai auala eseese.

Na taua atili fo’i e le loia a le malo e fa’apea, e tusa ai ma su’esu’ega a le malo sa faia e uiga i lenei mataupu, e le la’ititi se taimi na fa’atinoina ai e le ua molia le mataupu e pei ona tu’uaia ai o ia, ae umi se taimi sa ia fa’atinoina ai fa’asolosolo nei gaioiga, o le mafua’aga lena o moliaga uma e pei ona faia fa’asaga ia te ia.

I le mataupu e fa’atatau i le moliaga o le tu’uina atu o le siaki e le o i ai se tupe i totonu, na taua ai e le itu a le malo e fa’apea, na pau mataupu e molia ai e le malo i latou o loo tu’uina atu siaki e le o i ai se vaega tupe i totonu, na o mataupu e faila atu i le ofisa o leoleo, e le o se tiute fo’i o le malo le ta’amilo solo i faleoloa ma tau va’avaai poo ai o loo ia fa’atinoina lea ituaiga solitulafono.

I le fa’aiuga o le fa’afinauga a le malo, na taua ai e Pickett e fa’apea, e tusa ai ma su’esu’ega a le malo sa faia e uiga i lenei mataupu, e i le va o le $90,000 e oo atu i le $100,000 le vaega tupe o lo o masalomia e le malo sa aveese mai i le teugatupe a le litaea ona o gaioiga a le ua molia, o le mafu’aaga lena e le laititi ai lenei mataupu.

Ua taoto atu nei i se fa’aiuga a afioga i ali’i fa’amasino se tali mo lenei mataupu, ae o lo o tumau pea le aso 6 Novema 2017 lea ua mae’a ona fa’atulaga e fa’ataunu’uina ai le fa’amasinoga autu a Luatua, lea o lo o tatalaina pea i tua i lalo o tuutuuga mai le fa’amasinoga.

O le afioga i le ali’i fa’amasino ia Elvis P. Patea o loo iloiloina lenei mataupu, fa’atasi ai ma le lagolagosua a afioga i ali’i fa’amasino ia Mamea Sala Jr ma Tunupopo Faleafaga.