Talosaga le Komiti o Fefaatauaiga a le Maota o Sui ia ripoti mai i le TBAS

Pago Pago - AMERIKA SAMOA

O le aso Gafua o le vaiaso nei, Oketopa 2, 2023 sa faapea ona auai atu ai le sui Pulesili o le Faletupe a le Teritori o Amerika Samoa (TBAS), le susuga Owen Peery faapea le Faatonusili o Faletupe ia Tuasivi John Marsh, i se iloiloga a le Komiti o Fefaatauaiga a le Maota o Sui, aua ni ripoti lata mai, i nisi o mataupu e faatatau i le faletupe a le TBAS.

O lenei iloiloga sa ta’ita’ia e le taitaifono, le afioga i le Faipule ia Samuel Ioka Ale Meleisea.

Na fesiligia e le taitaifono faapea totino o le komiti ia Peery ma Tuasivi, e tusa ai ma ripoti lata mai o su’egatusi o le faletupe faapea le tulaga o iai le faletupe.

Na saunoa Tuasivi, talu ona faamavae ia le pulesili a le TBAS, o David Buehler, e le i faataunuuina se suesuega mo le tausaga tupe o le 2021-2022, faapea foi le tausaga tupe o le 2022-2023, ae o lo o latou galulue punouai ina ia mafai ona tu’ufaatasia ripoti o su’egatusi o ia tauaga, ma o lo o tumalosi le TBAS i tala o le tupe.

Sa faamaonia foi e Tuasivi le faafoeina o le latou galuega i le taimi nei, e le sui faatonusili ia Peery, ma o le a tulaga lelei fesootaiga i le va o le Ofisa o Faletupe ma le pulega a le TBAS.

Sa saunoa foi le susuga Peery i le tulaga malosi o iai le faletupe i le taimi nei, e ui o lo o manaomia pea ona suesueina tala o le tupe, ina ia faamaonia le sa’o ma le tonu le tulaga i tala o le tupe.

E le gata i lea, na ta’ua e Peery le iai o se tupe totoe mai i le tausaga 2023 a le TBAS, ae e le i o’o iai suesuega a le vaega suetusi.

Sa fa’ailoa mai foi e Peery i afioga i Faipule, o lea ua iai se su’etusi fou ona e le i finagalo le suetusi tuai e faataunuuina suesuega i le taimi e tasi, mo tausaga tupe 2022 ma le 2023.

Sa ia ta’ua foi e faapea, o tupe faaulu a le faletupe e $283 miliona, o nonogatupe e $30 miliona, lea e fa’ailoa mai ai le lava o tupe i totonu o le TBAS.

Na fesiligia e le afioga i le Faipule ia John Saelua ia le tulaga o le laiseneina o le faletupe (FDIC).  Na tali mai Feery, o le taimi mulimuli na fono ai le TBAS ma le FDIC, sa fa’ailoa mai ai e le FDIC e le o mafai ona taliaina se talosaga mai i le faletupe, pe afai e fa’aauau pea ona pulea e le malo.

Na ta’ua e Feery, e tusa ai ma le faamalamalama’aga a le FDIC, e latou te le taliaina se talosaga mai i le TBAS pe a faapea o lo o umia e le malo ia se vaega tele o le faletupe.

Na fesiligia e le afioga i le Faipule ia Fa’auifono Vaitautolu ia le faatuina o le ATM e tasi i Fitiuta, ae o le toatele o tagata e nonofo i Faleasao, Luma ma Siufaga.  Sa fia malamalama le afioga i le Faipule po o silafia e Peery lea tulaga.

Na tali Peery, o lo o latou taumafai e avatu nisi masini i motu uma o Manu’a ae peitai, e le o taliaina a latou taumafaiga e faipisinisi i Manu’a.

Na ta’ua e Peery, o le faafitauli tele i le aveina o masini ATM i Mau’a, o le tulaga o femalagaiga.  Ona afai ae tele nisi masini i Manu’a, o lona uiga, e tatau ona o ni a latou tagata faigaluega se toalua i taeao ma afiafi o aso taitasi, e faatumu nei masini.

O isi mataupu na aofia i le iloiloga, o totogi mo nonogatupe, o laina uumi i le fa’aaogaina o masini ATM.

O le a mafai ona toe maua nisi tala i nei mataupu i se taimi o i luma.