Talosaga Faipule e saili ni auala e faaleleia ai femalagaaiga i Manu’a

Pago Pago, AMERIKA SAMOA

O le tele o fesili na fesiligia ai e afioga i Faipule le Faatonusili o le Pulega o Taulaga ma Malae Vaalele i le taimi o lana iloiloga e faamaonia ai tofiga a le Kovana mo ia i le vaiaso nei, na mafuli lava i fautuaga mo le sailia o ni auala e faaleleia ai femalagaaiga mo le itumalo o Manu’a.

O le ma’ea ai o le iloiloga sa faatautaia e le Komiti o le Pulega o Taulaga ma Malae Vaalele a le Maota o Sui, i lalo o le ta’ita’iga a le Ta’ita’i Komiti ia Tiaoali’i Fau Sai, na pasia ai loa le susuga a Christopher King e avea ma Faatonusili i le palota e 18-0.

Ina ua fesiligia e le Sui Fofoga Fetalai ia Fetu Fetui Jr le susuga a King pe ua i ai ni suiga ua ia faia i totonu o le Matagaluega, na saunoa le molimau, “o lea lava, e i ai suiga laiti ua mae’a ona faia, e ala i le toe faafo’i o tagata faigaluega a le Vaega o Fela’uaiga i totonu lava o le Matagaluega e galulue i o latou tiute sa tofia muamua ai i latou.”

Na faailoa e Fetu ia King, e to’atele nisi o lana aufaigaluega e le o fiafia i suiga ua ia faia, ona o nisi o nei suiga, ua atagia mai ai le tofia o le tagata i le galuega e le o i ai sona agava’a. Saunoa Fetu e faapea, o le mafua’aga lava lea e ala ai ona tutupu faaletonu i le auaunaga a le Matagaluega, o le sese o le galuega e tofi i ai le tagata.

Na fautua Fetu ia King ina ia fai ni suiga lelei mo le aufaigaluega, ma ia vaavaai i auala e faaleleia ai tulaga tau femalagaaiga mo Manu’a. I lona talitonuga, ua tele tausaga o faaletonu pea auala o femalagaaiga mo lona itumalo pele o Manu’a.

Na fa’aalia e le afioga i le ali’i Faipule mai le Itumalo o Manu’a #1 ia Alumamalu Filoiali’i Ale lona faanoanoa tele i le tulaga le amanaia ma le tu’u lafoa’i o lo o tupu pea mo le itumalo  o Manu’a. 

Na faaalia e Alumamalu ia King, ua silia i le 25 tausaga o lana tautua i le Matagaluega, a o lea lava o lo o tutupu faaletonu i tulaga tau femalagaaiga i Manu’a. E le gata e faaletonu va’a e faatino ai femalagaaiga mo le itumalo, ae le o atoatoa fo’i mea faigaluega e fa’aaoga. Mo se faata’ita’iga e pei ona saunoa le afioga i le ali’i Faipule, a taunu’u le va’a o le Manu’atele i Manu’a, e leai se forklift e fa’aaoga e la’u ai uta a tagata mai le va’a e aga’i atu i le uafu, ae fa’aaoga le masini o loo fa’aaoga mo galuega toe faaleleia o le uafu e sisi ai i fafo uta a tagata.

O le popolega e pei ona saunoa le afioga a Alumamalu, o le saogalemu o tagata malaga ma tagata faigaluega.

Na toe faatepa e le afioga a Alumamalu le susuga a King i le taimi na sauni ai Tui Manu’a Elisara e tu’uina atu le motu o Manu’a i lalo o le vaavaaiga a le Malo Tele o Amerika ma sainia ai loa le feagaiga, e le i talia e le Tui Manu’a le faatonuga a Fitafita ina ia latou malaga faatasi mai i Tutuila ma tagata o lona itumalo i le Fua Va’a a le malo tele. Na finagalo lava Tui Manu’a e folau mai ma tagata o lona Itumalo i le va’a alo, ina ia molimauina e le malo tele tulaga pagatia o loo fetaia’i ma ona tagata i auala o femalagaaiga.

“Ou te talitonu atoatoa, ua filifilia oe e le afioga i le ali’i Kovana e te lavea’i Manu’a mai tulaga faaletonu o loo i ai femalagaaiga atoa ai ma le tele o isi tautua e le o maua e tagata o lo’u itumalo,” o le saunoaga lea a le afioga a Alumamalu.

O le lagona lava fo’i lea e tasi na faasoa e le afioga i le Faipule mai Swains ia Su’a Alexander Eli Jennings ina ua maua lona avanoa e saunoa ai i le taimi o le iloiloga. 

Na taua e Su’a lona le fiafia tele i le tulaga faaletonu o loo i ai le tautuaina o le itumalo o Manu’a e le malo o Amerika Samoa, tau ala atu i le Matagaluega o Pulega o Taulaga ma Malae Vaalele.

Sa ia taua e faapea, a talanoaina loa le Faavae o Amerika Samoa, lona uiga ua latou talanoaina mataupu taua ua uma ona tusia ma faamaumauga, atoa ai ma le vaavaai atu i tagatanu’u o loo pagatia ma le amanaia.

Na taua e Su’a le tagi o lona mafaufau pe a vaavaai atu i le tulaga pagatia o loo fetaia’i ma tagatanu’u o le Itumalo o Manu’a, e le gata i le leaga o auaunaga o loo latou maua mai le malo, ae oo lava fo’i i auala o femalagaaiga e le o i ai lava se suiga lelei. Na faaamuia Su’a i tagata o le itumalo o Manu’a, e ui lava i le tulaga faaletonu o auaunaga mo i latou, ae o lo o mafai lava ona latou maua ni nai vaega o nei auaunaga, e tali ai manaoga mo nai tagata o loo totoe i le itumalo.

Ae mo le motu o Swains e pei ona saunoa Su’a, ua leai ma se isi o toe nofo i le motu i le taimi nei, ua malaga uma mai i Amerika Samoa, ona e leai se tagata e mafai ona nofo mo se tausaga atoa pe fia fo’i tausaga e aunoa ma se va’a e malaga atu e momoli atu ni uta ma ni taumafa pe aumai fo’i tagata i Tutuila.

Na faamamafa e Su’a e faapea, afai e toe lalaga le Faavae o le atunu’u, o loo aofia ai ma le motu o Swains i totonu.

“Ae o le fesili e tuuina atu, o toe i ai ni tagata o totoe i Swains i le taimi nei, o le tali e leai. Ua o ese uma ona o le leai o ni auaunaga ma ni tautua e mafai ona tuuina atu mo le motu ma ona tagata,” o le saunoaga lea a Su’a.

I le faaiuga o lana saunoaga, sa ia faafetaia ai le afioga i le ali’i Kovana ia Lemanu P. S Mauga, ina ua ia tofia le susuga a King e fai ma Faatonusili o lenei Matagaluega taua a le malo. E talitonu Su’a, e mafai e le susuga a King ona saili auala e ala i lona tomai ma le agava’a e faaleleia ai femalagaaiga mo Manu’a ma foia ai faafitauli ua tele tausaga o tula’i mai.

Sa ia fautuaina fo’i le susuga a King ina ia silasila toto’a i va’a e mafai ona faatino ai femalagaaiga faavaomalo i le va o Amerika Samoa ma isi atunu’u, e pei ona faia e le malo o Samoa. E le gata o se auala e maua ai alaga tupe mo le malo, ae penefiti ai fo’i tagatanu’u ma pisinisi. 

Na lagolagoina e le Sui Fofoga Fetalai le saunoaga a Su’a. Na taua e Fetu e faapea, pau le auala e siitia ai le tulaga o Manu’a, o le faaleleia o va’a ma le uafu, faapea fo’i se va’alele ma ni malae vaalele fou.

Sa ia fautuaina fo’i King ina ia silasila toto’a i va’a fagota ma va’a la’u oloa o loo ulufale mai i le atunu’u, pe le o le isi lea auala ua mafua ai ona to’atele tagata eseese mai Asia i le atunu’u. E leai se itu e ita ai fua ia ituaiga tagata, aua o loo ia aumaia fo’i nisi o tagata mai Asia e galulue i Amerika Samoa, peita’i o le uiga o lana saunoaga e pei ona saunoa Fetu, ia aumai i le auala sa’o tagata i totonu o le atunu’u, ae le o auala faaalatua.

Na faafetaia e le afioga i le ali’i Faipule mai Tualauta ia Larry Sanitoa le susuga King ona o galuega lelei sa ia faatinoina mo le malo ma tagatanu’u mo le tele o tausaga. E talitonu Sanitoa, o le tele o tausaga ua mavae sa galue ai le susuga a King i lalo o le ta’ita’iga a nisi sa avea ma Faatonu, peita’i o lea faatoa filifilia o ia avea ma Faatonu o le Matagaluega, e i ai lona talitonuga e tele atu isi faaiuga lelei e mafai ona ia faia mo le manuia o le atunuu aemaise le itumalo o Manu’a.

Sa faafetaia fo’i e Sanitoa tulaga siitia ua i ai le Malae Vaalele Faavaomalo i Tafuna. Pau le itu na fia malamalama i ai Sanitoa, poo i ai se alagatupe a le Matagaluega mai alagatupe fesoasoani mai le malo tele mo puipuiga o le faama’i, e fesoasoani ai i le faatinoina o auaunaga ma totogi ai tagata faigaluega i le malae vaalele, ona o lea ua tele masina o tapunia le malae vaalele, ua faaitiitia fo’i tupe maua i tulaga o vaalele malaga mai i le atunu’u.

Saunoa le susuga a King, o loo i ai le vaega tupe a lana Matagaluega na maua mai tupe fesoasoani mo puipuiga o le faama’i e fesoasoani ai i le faafitauli e pei ona fesiligia.