Talitonu Titiali’i e le lava totogi o Senatoa ma Faipule

Pago Pago, AMERIKA SAMOA

E talitonu le afioga i le ali’i Faipule mai le Itumalo o Saole ia Titiali’i Kitara Vaiau, e le o talafeagai totogi o lo o maua e afioga i Senatoa ma Faipule i le taimi nei, pe a fuafua i ituaiga galuega o lo o latou fa’atinoina mo le malo o Amerika Samoa. 

Ona o lea tulaga, ua ia talosagaina ai le Fofoga Fetalai o le Maota o Sui, afioga Savali Talavou Ale ina ia toe silasila i le tulaga o totogi o sui o le Fono Faitulafono ma fai i ai se fuafuaga ina ia toe faia se siitaga o totogi.

Ina ua maua lona avanoa e saunoa ai i le taimi o folafolaga a le Maota o Sui i le vaiaso na te’a nei, na taua ai Titiali’i e faapea, “O tatou o tagata fau tulafono ma o nisi foi o Tama ua tele tausaga o tautua i le Fono Faitulafono, a o lenei lava e tumau tatou i lenei totogi laititi o lo o i ai.”

Sa ia taua fo’i e faapea, “E le gata e le lava totogi o le fono ae a silasila fo’i i ai, e leai ni a tatou Ofisa, e leai ni kesi, e leai ni telefoni, e oo lava foi i ni tatou tagata faigaluega. E moni lava fo’i sa maua la tatou ta’i $10,000 mai le malo i le tausaga na te’a nei, ae le taitai fo’i ona lava lea tupe e fesoasoani ai i manaoga.”

Na taua e le ali’i Faipule mai Saole e faapea, e le afaina lava lona sui faipule, aua o ia o se tasi o faipule e fou mai i le Fono Faitulafono, ae lagona lona alofa i Tama ua tele tausaga o tautua i le nofoa a’o lea lava e tumau o latou totogi i le tulaga sa i ai mo le tele o tausaga.”

O se tasi o mataupu na taua e Titiali’i, o vaega tupe o lo o aveesea mai i alauni a Faipule ma Senatoa, e le talafeagai ma le Tulafono. Sa ia taua e faapea, na pau tupe e agavaa ona aveese mai ai tupe o le lafoga (FICA) ma le ‘medicare’, o totogi ta’i $25,-000 a Senatoa ma Faipule, ae o le $30,000 mo alauni a le Fono, e le ona faia ai fua se suiga.

O le mataupu i siitaga o totogi o Senatoa ma Faipule, atoa ai ma le fesiligia o tupe o loo aveese mai i le alauni e $30,000 a le Fono, e le o ni mataupu e fou i luma o le Maota. E le gata sa talanoaina i le tele o tausaga ua mavae, ae sa toe fesiligia ai fo’i e Faipule le Teutupea le malo ia Malemo Tausaga i le 2 vaiaso talu ai e uiga i tupe o lo o aveese mai i alauni a Faipule ma Senatoa. 

O afioga i ali’i Faipule ia Vailiuama Steve Leasiolagi ma Lavea Fatulegae’e P. Mauga na laua fesiligia le Teutupe a le malo e uiga i lenei mataupu. 

Saunoa Vailiuama, o ia fo’i o le Taitai o le Komiti o le Tupe ma le Paketi a le Maota o Sui,  o le siaki e $30,000 a Faipule ma Senatoa, e le o se totogi ae o le tupe o lo o faatulaga mai i lalo o le Tulafono mo ‘alauni’.  O le tupe fo’i lea e fa’atupe mai i tupe lotoifale, lona uiga, e leai se malosi o le malo feterale e tipi ai fua siaki a le Fono.

O le taimi nei e pei ona faailoa e Vailiuama ia Malemo, o lo o fa’aauau pea ona tipi mai siaki a Senatoa ma Faipule saofaga mai le malo feterale e pei o le lafoga (FICA) ma le tupe e alu i le ‘medicare’, ae i lona talitonuga, e le talafeagai ma le Tulafono lea gaioiga. 

Na pau le tupe na taua e Vailiuama i lana saunoaga e agava’a ona tipi mai ai le lafoga ma le ‘medicare’, o le totogi o Senatoa ma Faipule e $25,000 i le taulsaga. 

Na lagolagoina e le afioga i le Faipule ia Lavea Fatulegaee P. Mauga le finagalo o Vailiuama. Saunoa Lavea e faapea, ua tele tausaga o finauina pea e afioga i Senatoa ma Faipule le mataupu lenei, ona o le tipi ese mai o lafoga ma tupe o le ‘medicare’ mai le latou alauni.

Na talosaga Malemo i afioga i Faipule mo se avanoa e toe vaavaai ai i le Tulafono, a o le i tuuina mai se fautuaga e tusa ai o le latou talosaga.

Sa le’I nofo lelei I le finagalo o le Fofoga Fetalai ia le talosaga a Faipule ina ia taofi le tipi ese o lafoga ma le ‘medicare’ mai I totogi a sui faitulafono ma ia fautuaina ai afioga i Faipule ina ia silasila toto’a i ituaiga mataupu e tatau ona fesiligia ai molimau a le malo i le taimi o a latou iloiloga.

Na faamanatu e Savali i afioga i Faipule le tatau ona latou malamalama lelei i o latou tiute i lalo o le Tulafono, o i latou o tagata e fausia tulafono mo le manuia o le malo ma le atunu’u. I le talitonuga a Savali, so o se tagata na te fausia tulafono e tatau ona malamalama lelei i le tulafono. 

“Ou te le mana’o e talanoaina ituaiga mataupu faapenei i le taimi tatou te fesaga’i ai ma molimau a le malo, ina ne’i faitauina i tatou, tatou te le malamalama i le Tulafono, a o tatou lea o loo fausiaina tulafono mo le malo,” o le saunoaga lea a Savali i afioga i Faipule.

Na faamanino e Savali i Faipule e faapea, i lalo o tulafono a le fetarale, afai e i ai se isi alagatupe e maua e le tagata faigaluega e ese mai i lona totogi, e tatau ona tipi ese mai i le tupe faaopoopo lea le lafoga ma le tupe mo le ‘medicare’.

“O le alauni la e $30,000 lea e maua e a outou afioga, e mafai ona faaigoa o isi alaga tupe faaopoopo, lona uiga la, e agava’a ona tipi mai ai le lafoga ma le tupe o le ‘medicare’, ae le gata fo’i i lea, e fesoasoani atili ai i tulaga o Saogalemu a afioga i Faipule i le taimi e tali ai faamanuiaga o le saogalemu pe afai e malolo litaea,” o le saunoaga lea a Savali.

E pei ona faailoa i luga o siaki o alauni a Senatoa ma Faipule, e 6.2% o lo o tipi mo le lafoga ae 1.45% o lo o tipi mo le ‘medicare’.

I lalo o le Tulafono, e $30,000 alauni e maua e Senatoa ma Faipule ae $40,000  mo Ta’ita’i o le Fono e aofia ai le Peresetene o le Senate ma le Fofoga Fetalai o le Maota o Sui. O lea vaega tupe e fesoasoani ai i le faatinoina atoa ai ma le faatupeina o a latou tiute.

O lo o faamanino mai fo’i i lalo o le tulafono le tuu atu o le avanoa i Senatoa ma Faipule e filifili ai le tagata pe manatu e avea le siaki o le alauni ma vaega o lona totogi, ma agavaaa ai loa le aveese mai o le lafoga. 

E i ai nisi o Senatoa ma Faipule sa latou faailoa i le Samoa News, e naunau i latou e aveese mai a latou lafoga ma isi saofaga i le siaki o le alauni, ina ia mafai ai ona avea le siaki o le alauni o se vaega o le latou totogi e maua i le tausaga.

I lalo o le Tulafono, e $30,000 le totogi o le Peresetene o le Senate ma le Fofoga Fetalai ae ta’i $25,000 totogi o Senatoa ma Faipule, ma le Faipule o le motu o Swains e $20,000 lona totogi i le tausaga. Ae mo le siaki o le alauni, e $40,000 e maua e Ta’ita’i o le Fono ae $30,000 mo Senatoa ma Faipule.