Talitonu Senatoa ua taugata $40 mo le totogi laisene ave ta’avale fou

E talitonu afioga i Senatoa, o le totogi fou e $40 lea ua fa’atulaga mo laisene ave ta’avale, ua fai lava sei maualuga toe taugata, pe a fuafua i le na o le tasi le tausaga le umi e aofia ai lea laisene ave ta’avale mo i tataga mai fafo ua mafai ona nofomau i Amerika Samoa.

Fa’amaonia e le Komesina o le Matagaluega o Leoleo i se iloiloga sa faia i luma o le Komiti o le Puipuiga o le Saogalemu Lautele a le Senate i le vaiaso nei, e $40 le totogi o le laisene ave ta’avale mo soo se tagata mai fafo ua agava’a fa’aletulafono ona aumai i totonu o Amerika Samoa.

O lea fo’i laisene ave ta’avale e tasi le tausaga le umi e aoga ai, fuafua lava i le umi o le ID nofomau o le tagata mai fafo o lo o tuuina mai e le Ofisa o Femalagaaiga.

Ae afai e toe fa’afou le laisene ave ta’avale i tausaga ta’itasi, e $40 lava lona totogi, ina ia talafeagai ma tuutuuga o le Tulafono fou ua fa’aigoaina o le “American Samoa REAL ID Act”, lea na sainia e avea ma tulafono i le masina o Oketopa o le tausaga na te’a nei.

O le tofa ia Le’i, fa’atasi ai ma le Fa’atonusili o le Matagaluega o le Puipuiga o le Saogalemu Lotoifale ia Samana Semo Ve’ave’a, na auai i le iloiloga sa faia i le vaiaso nei, e fesiligia ai ni isi o mataupu o lo o fa’asea ai afioga i Senatoa, e pei o le mataupu i le totogi o laisene.

O le afioga i le ali’i Senatoa ia Fa’amausili Mau Jr sa ta’ita’ia le iloiloga, lea fo’i sa auai sui o le Komiti a le Senate.

O fa’asea e pei ona tauaao e afioga i Senatoa, o fa’asea lava fo’i ia na mafai ona oo mai i le Ofisa o le Samoa News, fa’asaga i le taugata o le totogi fou o laisene ave ta’avale, pe a fuafua atu i le maualuga o le totogi ae na o le tasi le tausaga e aoga ai le laisene ave ta’avale.

Na taua e ni isi o le atunu’u i le Samoa News e fa’apea, na matua fa’ateia i latou ina ua aga’i atu i le Ofisa o Ta’avale Afi a le malo i Tafuna mo le pu’eina o a latou laisene ave ta’avale, ae avatu le laisene e mae’a le aoga i le masina o Iulai poo Aokuso fo’i o le tausaga nei, fuafua lava i le taimi e mae’a ai a latou ID nofomau mai le Ofisa o Femalagaaiga.

O le itu na matua fa’ateia ai i latou, e leai lava se gaioiga a le Ofisa o Ta’avale Afi e fa’amalamalama pe tuuina atu ni fa’amatalaga e tau fa’amanino ai lea faiga fou. Sa fa’aalia fo’i e ni isi o tagata faipisinisi i le atunu’u le lagona faasea lava fo’i lea e tasi, ona o ni isi o a latou tagata faigaluega o lo o fetaia’i ma le fa’afitauli lava lea e tasi, o le totogi o le $40 mo le laisene fou atoa ai ma le isi $40 e toe fa’afou ai le laisene ave ta’avale.

Na taua e se tasi o tagatanu’u o le atunu’u i le Samoa News e fa’apea, e leai lava se taumafaiga e fa’amanino le mafua’aga ua ala ai ona fuafua le umi e aoga ai le laisene ave ta’avale i le ID nofomau mai le Ofisa o Femalagaaiga.

I le taimi o le iloiloga i le vaiaso nei, na faamanino ai e Le’i e fa’apea, i lalo o le tulafono fou o laisene ave ta’avale e pei ona pasia ma avea ma tulafono, o lo o faamanino mai ai lona tau e $40 mo tagata mai fafo, o le totogi lava fo’i lea mo le laisene ave ta’avale e 5 tausaga le umi o lo o tuuina atu i sitiseni ma Nesionale o Amerika i totonu o le teritori.

I lalo o se vaega o le tulafono, o le laisene ave ta’avale e tatau ona fuafua le umi e aoga ai i le umi e nofo ai le tagata mai fafo i totonu o le Iunaite Setete.

Na faamalamalama e le tofa Le’i i luma o le Komiti a le Senate e fa’apea, e tatau i le Ofisa o Ta’avale afi a le malo i Tafuna ona mulimulita’i i aiaiga o le tulafono ua pasia, e aofia ai le tulaga lea, e tatau ona mae’a le aoga o le laisene i le taimi e mae’a ai fo’i le aoga o le ID nofomau a le tagata mai fafo i le Ofisa o Femalagaaiga.

E le i fiafia ni isi o afioga i Senatoa i le fa’amalamalamalaga a le tofa Le’i, ona e i ai lo latou talitonuga, ua fai lava si maualuga toe taugata o le totogi o le laisene mo tagata mai fafo, ae na o le tasi le tausaga e aoga ai le laisene.

Ae na toe fa’apupula atili e Le’i e fa’apea, o vaega uma o lo o fa’aaoga e gaosi mai ai le ituaiga laisene fou lea ua fa’aaogaina i le taimi nei, e fai lava si taugata, o le mafua’aga fo’i lena o le taugata o le laisene, ona o ituaiga laisene tonu ia o loo fautuaina mai i lalo o le tulafono e tatau ona fa’aaoga ma aloaia.

Na toe faamanatu e Le’i se iloiloiga sa faia i le maota o sui i le tausaga na te’a nei, lea fo’i sa talanoaina ai le mataupu lava lenei, ma pasia ai loa e le fono le suiga i le tulafono ina ia faatulaga loa le totogi o le laisene i le $40 e pei ona i ai nei.

Na finau le afioga i le ali’i senatoa ia Magalei Logovi’i e fa’apea, ua matua fai lava si taugata o le $40 lea ua fa’atulaga mo totogi o laisene ave ta’avale. Sa ia taua fo’i e fa’apea, “e i ai uma lava o tatou aiga mai Samoa, ma o lo o safa ma pagatia i latou i le totogiina o le totogi o le laisene i tausaga ta’itasi.

Na taua e Magalei lona lagolagoina o le fuafuaga e pei ona taua e Le’i, o le tau lea o le laisene e $100 mo le 5 tausaga. Na lagolagoina e ni isi o Senatoa lea manatu. I le faaiuga o le iloiloga, sa fautuaina ai loa e le afioga i le Ta’ita’i Komiti ia Fa’amausili le tatau lea ona toe vaavaai i se suiga o le tulafono, ina ia sii i le $100 le totogi o le laisene e lima tausaga le umi e aoga ai.

I le taeao ananafi, na fesiligia ai fo’i e ni isi o afioga i Faipule le mataupu lava lenei e fa’atatau i le maualuga o le totogi o laisene ave ta’avale mo tagata mai fafo. Ona o lenei mataupu, na talosagaina ai loa e afioga i Faipule le Ta’ita’i o le Komiti o le Puipuiga o le Saogalemu Lautele a le maota o sui, mo se iloiloga ma le Komesina o Leoleo e fa’atatau i lenei mataupu, pe afai ae toe a’e mai le Fono mai lana malologa e 4 vaiaso.

Saunoa Titiali’i Kitara Vaiau e fa’apea, e tatau ona fuafua le tulafono i auala e laugatasia uma ai tagatanu’u o Amerika Samoa, faapea ai ma tagata mai fafo ua nonofo fa’aletulafono i le teritori.

O lona atugaluga, ina ne’i avea le maualuga o le totogi o laisene e manatu ai tagata mai fafo, ua fa’apito augafa fuafuaga mo tagatanu’u lava o le teritori, ae fa’atuatuana’i ai i latou, e ui ua afu le tautua a ni isi mai fafo i totonu o le faigamalo a Tutuila ma Manu’a.

Ae na taua e nisi o Faipule, o le mataupu pito sili ona ogaoga i lenei mataupu, o le si’i i luga o le totogi o le laisene ae le o aloaia Amerika Samoa i lalo o le tulafono o le Real ID Act lea ua pasia i totonu o le malo tele o Amerika. E le gata i lea, o le Matagaluega o le Puipuiga o le Saogalemu Lotoifale e gafa ma le mataupu i laisene ave ta’avale i soo se vaega o Amerika, ae na o Amerika Samoa lava o loo gafa le Ofisa o Leoleo ma lenei mataupu.

I lo latou taofi, e tatau ona toe iloilo lelei le tulafono ina ia mautinoa e o gatasi ma le manaoga o le tulafono sa tuuina mai i le malo tele.