Talitonu Muavaefaatasi e le afaina i le tulafono le avea o ia ma Taitai o le CFIDD

Pago Pago, AMERIKA SAMOA

E ui i tu’uaiga fai mai e le tusa ma le tulafono le avea o le Tofa a Muavaefaatasi John Edward Suisala ma Faatonusili o le Matagaluega o Auaunaga ma Tautua Lautele, toe avea fo’i ma Ta’ita’i o le Faalapotopotoga o loo ofoina atu tautua mo aiga o fanau e i ai manaoga faapitoa o le tino (CFIDD), peita’i na faamanino e Muavaefaatasi i le Samoa News, e leai se solitulafono o le gaioiga o loo ia faia ona o mafua’aga sa ia fa’aalia.

O le vaiaso na te’a nei na fesiligia ai e le Samoa News le Tofa a Muavaefaatasi, ina ua tauaao e le Samoa News le isi faila mai le lotoifale o le Matagaluega o loo avea ai Muavaefaatasi ma Faatonu, lea o loo taua ai, o le ali’i Faatonusili, o ia fo’i lea e pulea le Faalapotopotoga a le CFIDD.

E tele fesili na fesiligia ai e le Samoa News le ali’i Faatonu, ina ia faamanino i le atunu’u lona sootaga i le Faalapotopotoga o le CFIDD atoa ai ma le avea ai o ia ma Faatonusili o le Matagaluega a le malo o le DHSS, o le mataupu lea o loo taunu’u mai ai tupe fesoasoani mai le malo tele, lea o loo maua ai fo’i e le CFIDD alaga tupe e faatino ai ana auaunaga mo le atunu’u.

Sa fesiligia le ali’i Faatonu, pe talafeagai le avea o ia ma Faatonusili, ae toe avea fo’i o ia ma Pulesili o le Faalapotopotoga o loo latou maua tupe mai le DHSS.

Na faamanino e le ali’i Faatonu e faapea, e leai se aafiaga i lalo o le tulafono o le avea o ia ma Faatonusili o le DHSS, toe avea fo’i o ia ma Pulesili o le Faalapotopotoga Tumaoti o le CFIDD. E mafua lea tulaga ona sa ia taua e faapea, e le o maua sona totogi mai lana galuega i le CFIDD, ona o auaunaga uma ma tautua o loo ia ofoina atu mo aiga o fanau e i ai manaoga faapitoa o le tino, e le o totogiina ae o loo ofo fua mo le manuia o fanau.

O faila fou na maua e le Samoa News i le vaiaso na te’a nei o loo taua ai le fa’aauau ona maua e le CFIDD o tupe mai polokalame eseese e lua o loo i lalo o le Matagaluega o ld DHSS, lea o loo avea ai Muavaefaatasi ma Faatonusili. 

Mo se faataitaiga e pei ona taua i faamaumauga ua maua e le Samoa News, i le 2019, e $40,000 le tupe na maua e le CFIDD e faatupe ai galuega ma auaunaga sa latou faatinoina, e pei o le $10,000 na fa’aalu mo faasalalauga e faalauiloa ai tautua sa latou faatinoina; $2,500  na faatupe ai aoaoga ma mea sa faatino ai aoaoga; $2,730 na totogi ai femalagaaiga; $1690 mo isi penefiti ma manaoga, atoa ai ma le $9,600 na maua e le tagata e Pulea galuega Faatino a le CFIDD, faapea ai fo’i ma le $12,480 na totogi ai le tagata na faatinoina aoaoga, o ia fo’i o se tagata faigaluega a le CFIDD.

E ui o loo manino i faamaumauga ua maua e le Samoa News le maua e tagata faigaluega a le CFIDD o totogi ma penefiti mai vaega tupe sa latou maua, peita’i o loo matua teena malosi e Muavaefaatasi le maua e tagata faigaluega a le CFIDD e aofia ai ma ia o ni totogi poo ni penefiti.

Na faamanino e le ali’i Faatonusili e faapea, e lei toe maua lava e le CFIDD ni vaega tupe mai polokalame e 2 o loo i lalo o le DHSS talu ona avea o ia ma Faatonusili o le DHSS. Na pau siaki tupe e 4 na maua e le CFIDD, o siaki tupe ia na maua i le va o le 2019 ma le 2020 mai talosaga sa tuuina atu i le 2017 mo galuega sa faatino ai i le taimi lea.

O siaki tupe e 4 na taua e le Faatonusili na maua mai e le CFIDD e aofia ai le $40,000 na maua mai i le 2019 ona o se talosaga na tuuina atu i le 2017; o le siaki tupe lona lua e $40,000 na maua mai ia Tesema 2019 mai le talosaga na tuuina atu i le 2018; o le siaki tupe lona tolu e $10,185 na maua ia Novema o le 2019 mai le talosaga na tuuina atu i le tausaga lava lea e 2019,  ma le siaki tupe lona fa e $9,985 na maua mai i le tausaga na te’a nei,  mo le talosaga na tuuina atui le tausaga lava fo’i na te’a nei.

Na faamanino auiliili e le Faatonusili e faapea, e le o aafia i le tulafono gaioiga o loo faatino e ia ma tagata faigaluega o le CFIDD, ona o loo latou faatinoina nei galuega uma e aunoa ma se totogi. O galuega fo’i o loo faatino i le taimi lava fo’i e faatino ai galuega a le malo mai le itula e 7:30 i le taeao e oo atu i le itula e 4:00 i le afiafi.

O auauga nei e aofia ai le faia o aoaoga mo nofoaga o loo tausi ma aoaoina ai fanau e i ai manaoga faapitoa o le tino (Daycare provide). O nisi o auauaga e aofia ai le faia o aoaoga i ave pasi ina ia iloa le auala e tautua ai fanau e i ai manaoga faapitoa o le tino pe a malaga i luga o pasi, ma ia i ai fo’i se nofoaga faapitoa i totonu o le pasi e faaavanoa e nonofo ai fanau nei. 

Na taua atili foi e le Faatonusili lo latou faatinoina o isi aoaoga e fesoasoani ai i le aafiaga o le ‘ava malosi i fanau talavou, ma faia ai aoaoga ina ia taofia ai le tagofia o le ‘ava malosi.

E tusa ai o le molimau a le ali’i Faatonusili, e le na o ia le tagata faigaluega a le malo o loo faatinoina lea ituaiga gaioiga, o le galue mo le malo toe aafia fo’i i le faatinoina o isi auaunaga ma tautua mo le manuia o fanau e soifua mai ma manaoga faapitoa o le tino ma le mafaufau.

I le amataga mai o lenei Faalapotopotoga o le CFIDD, sa tusa ma le to’a 10 tagata faigaluega na galulue ai e pei ona taua e le Faatonusili, ae talu ai ua faaitiitia le auaunaga a le Faalapotopotoga, o le mafua’aga loa lea na faaitiitia ai loa fo’i ma tagata faigaluega pe tusa ma le to’a 3.

Na matua teena malosi e le Faatonusili ripoti o loo maua e ia ma tagata faigaluega a le CFIDD totogi mai galuega ma auaunaga o loo latou faatinoina. Sa ia taua i le Samoa News e faapea, o auaunaga uma lava o loo faatinoina, o loo ofo fua uma atu lava, o le mafua’aga fo’i lea latou te faatinoina ai nei galuega i taimi faigaluega a le malo, ona e manino lava le mafua’aga o le faatino o nei tautua mo le atunu’u.

E feteena’i le saunoaga a le ali’i Faatonusili ma le molimau a le Tamaitai e faauluulu i ai polokalame faatino a le CFIDD, le faletuaia Nellie Faumuina, o ia fo’i o se tagata faigaluega a le malo mo le Matagaluega o le DHSS, e pei ona faauluulu ai ia te ia le Polokalame o Tina ma Pepe faatoa fananau mai (WIC).

Na taua e Faumuina i se talanoaga ma le Samoa News i le masina na te’a nei, o loo totogi latou mai galuega o loo latou faatinoina, pe a ma le ta’i $300 nai vaega tupe o lo o mafai ona totogi ai latou. 

Na taua e le ali’i Faatonusili ia Muavaefaatasi le tau saili o se nofoaga fou e faatu ai le Ofisa a le CFIDD, ina ua tatala i lalo le fale o le malo sa latou faaaogaina i le nofoaga o fanua o le malo i Tafuna, lea na tala i lalo e le faigamalo a Lolo ma Lemanu i le tausaga na te’a nei. O le taimi nei la, ua tapunia le tumau auaunaga a le CFIDD se’i maua se latou ofisa fou.

E le tutusa le molimau a le ali’i Faatonusili ia Muavaefaatasi ma le faamatalaga na tuuina mai e Faumuina i le Samoa News. Na taua e Faumuina e faapea, talu ai ua tatala i lalo le fale o le malo sa avea ma nofoaga autu a le CFIDD i Tafuna, o le mafua’aga lea ua fa’aaoga ai lona fale i Pago Pago e avea ma Ofisa a le CFIDD mo se taimi le tumau ao tau saili ai se nofoaga fou.

O le aso na sosoo ai ina ua lomia e le Samoa News le saunoaga a Faumuina, na valaau mai ai se tasi o le aiga o Faumuina ma valaau mai i le Samoa News e tusa ai o le taua o le maota o Faumuina i Pago Pago faapea ai ma le avea ma nofoaga autu mo le Ofisa o le CFIDD.

Na taua e le sui o le aiga o Faumuina na valaau mai i le Samoa News, e leai se fale o Nellie i Pago Pago, e leai fo’i se ofisa o se CFIDD o fa’amautu i Pago Pago. O le aso lava lea na toe telefoni mai ai Nellie i le Samoa News ma ia tete’e na te lei faia ni faamatalaga e faatatau i sona fale i Pago Pago atoa ai ma se ofisa o le CFIDD i Pago Pago.