Talitonu Kovana e le fou fa’afitauli ova taimi tagata faigaluega malo

I le avea ai o le mataupu e fa’atatau i “Ova Taimi” a tagata faigaluega a le malo, e le o se mataupu e fou i le faigamalo a Lolo ma Lemanu, na fautuaina ai e le afioga i le ali’i kovana ia Lolo Matalasi Moliga lana kapeneta i le fonotaga i le vaiaso na te’a nei, ina ia mata’ala i tulaga o ova taimi a tagata faigaluega, aemaise lava i matagaluega o lo o aofia ai tulaga o tupe a le feterale, ina ia mautinoa e totogi ova taimi.

Saunoa le tofa i le Tootoo ia Lolo e fa’apea, o le mataupu i ova taimi, na afua mai i faigamalo ua tuana’i atu, a o lea o lo o fa’aauau pea ona tauave e le la faigamalo i le taimi nei.

“O la’u fautuaga fa’amolemole i tulaga o ova taimi a tagata faigaluega, ia mautinoa e totogi ova taimi o tagata, ina ia aua ne’i toe avea ma fa’afitauli i le malo i se taimi o i luma”, o le saunoaga lea a Lolo.

Sa ia fautuaina fo’i Fa’atonusili o matagaluega ma ofisa a le malo, ina ia mata’ala fo’i i le mataupu e fa’atatau i tupe feterale ia o lo o tuai ona taunu’u mai ma fa’aaoga, ona fa’aaoga ai loa lea o tupe lotoifale e fa’afetaui ai tupe ia, ma le fa’amoemoe e mulimuli ona toe totogi lea o tupe lotoifale i le taimi e taunu’u mai ai tupe feterale.

Na taua e le ali’i kovana e fa’apea, o lo o i ai pea lava ni isi o Ofisa o le malo o lo o avea lea tulaga ma fa’afitauli o i latou, peita’i o le tulaga sa’o e tatau ona i ai, e tatau ona vave le fa’aaogaina o tupe mai le feterale ina ia mautinoa e vave ai ona toe fa’atutumu tupe lotoifale a le malo o lo o fa’aaoga.

“O se tasi o fa’afitauli ua maitauina pea i le faiagmalo i taimi fa’ai’u nei o tausaga tupe, o le tulaga i le mauaina mai pea o vaega tupe mo le malo i soo se taimi, o ni isi o taimi tatou te iloa atu ai le malamalama i le fa’aiuga, peita’i e faigata ona tatou mauaina le tulaga, ona o lo o tuai la tatou galuega fa’atino e ala i le toina mai lea o tupe feterale mo lona fa’aaogaina”, o le isi lea saunoaga a le ali’i kovana.

Ae i tulaga o ova taimi, na toe fa’atepa e le ali’i kovana le lata i le miliona tala se vaega tupe a le atunu’u na alu i le tau totogiina o ova taimi a tagata faigaluega sa fa’atonuina e le Ofisa o Tagata Faigaluega a le malo tele e totogi, e mafua mai ina ua fa’atamala ni isi o ofisa i le totogiina lea o itula ovataimi a tagata faigaluega.

“E pei ona avatu fa’a fautuaga i a outou afioga i fa’atonusili, afai e manaomia le galulue ova taimi o lau aufaigaluega, o le fautuaga, saili mai ni isi tagata faigaluega fou latou te fa’atinoina galuega o lo o mafua ai ona ova taimi lau aufaigaluega, ina ia mafai ai ona fa’atino la tatou manulauti, o le ofoina atu lea o galuega fou mo tatou tagata”, o le saunoaga lea a Lolo.

Sa ia taua fo’i le tatau lea i fa’atonusili ona latou mata’ala ma mautinoa, e le toe tula’i mai le fa’afitauli lea na tula’i muamua mai i tausaga ua mavae, o le tele o itula ova taimi a tagata faigaluega e fa’atupu, ma mafua ai loa ona mamafa tu le avega e feagai ma le malo.