Talitonu Faipule e le tatau ona faia ni nonogatupe i tupe Litaea

E ui i taumafaiga a le Komiti Fa’afoe o le Litaea ina ia saili auala uma e mafai ai ona fa’atupu teugatupe a le Litaea, ina ia mautinoa ai tulaga manuia mo le teugatupe o le litaea a le atunu’u, peita’i na taua e ni isi o le to’atele o Faipule e fa’apea, e le i faia le teugatupe a le litaea ina ia faia ai ni nonogatupe a le malo, ae na faia faapitoa mo tagata faigaluega a le malo.

O le mataupu e fa’atatau i le tupe tului lea e fa’aopoopo i siaki a tagata litaea a le malo (COLA), lea ua umi o taofia pea e le Komiti Fa’afoe a le Litaea, o le mafua’aga lea o le iloiloga sa valaauina i le vaiaso nei e le Komiti o le Litaea a le maota o sui.

O le Taitaifono o le Komiti Fa’afoe a le Litaea, afioga a Vaanatiu Iafeta Tofala ma le Pulesili o le Ofisa o le Litaea, afioga I’aulualo Talia Fa’afetai na molimau e fa’atatau i lenei mataupu.

Na fa’amanino e Va’anatiu i le Komiti e fa’apea, o lo o tumau pea le fa’aiuga a le Komiti Fa’afoe e taofia ai le tu’uina atu o le COLA mo tagata litaea, se’i vagana ua mautinoa le tulaga malosi o le teugatupe i le taimi nei.

Ina ua fesiligia e Faipule le mafua’aga ua taofia umi ai le COLA ae le fa’agasolo loa ina ia manuia ai tagata litaea, na saunoa Va’anatiu e fa’apea, o le fautuaga mai ia i latou o loo vaavaaiga teugatupe a le litaea a le malo, se’i vagana ua oo atu i le 60% le malosi o le tupe avanoa mo le litaea (funded status), ona fa’atoa mafai lea ona agava’a le COLA e fa’agaioi. O le taimi nei, e na o e 46% le maualuga o le tupe avanoa o lo o i ai, o le mafu’aaga fo’i lena e le o mafai ai ona gaioi le Komiti Fa’afoe e fa’atino le fuafuaga e pei ona naunau i ai tagata litaea.

Na lagolagoina e le afioga i le tama’ita’i faipule ia Vui Florence Saulo taumafaiga a le Komiti Fa’afoe e puipui ma si’itia le teugatupe o le litaea mo tagata faigaluea, peita’i i lona talitonuga, afai o le tulaga fa’aletonu lea o lo o ia i le tupe i le taimi nei, e tatau fo’i la ona silasila toto’a i le Komiti Fa’afoe i nonogatupe o lo o auala atu i ofisa o le malo.

Mo se fa’ata’ita’iga o le nonogatupe lona lua a le Faalapotopotoga o Fesootaiga a Amerika Samoa (ASTCA), lea fo’i ua maua i ripoti le sauni e tuuina atu i le Tupe o le Litaea.

Saunoa Vui e fa’apea, afai ae talia e le Komiti Fa’afoe le talosaga lona lua a le ASTCA mo se nonogatupe, o le a fai ai lava ma masani le talosaga atu mo ni isi nonogatupe i le lumana’i.

Ae na fa’amanino e Va’anatiu e fa’apea, o tiute o le Komiti Fa’afoe o lo o i ai i lalo o le tulafono, e le gata e saili auala e puipuia ai le teugatupe, a ia saili fo’i auala e fa’atupu ai le teugaupe. Sa ia fa’apupulaina fo’i le tulafono lea e tuu atu ai le malosi i le Komiti Fa’afoe, latou te tu’uina atu ai le 10% o le teugatupe e nono ai le malo, ina ia tupu ai i luga le teugatupe mo tagata litaea.

Saunoa I’aulualo e fa’amanino atili lenei mataupu ma ia saunoa ai e fa’apea, talu mai le tele o nonogatupe a le malo sa faia i le Litaea, e leai lava se taimi ua fa’aletonu ai le malo mai le totogiina o ana nonogatupe, e aofia ai ma le totogiinao le tupe tului e 8%.

Na taua atili fo’i e I’aulualo le taua o fautuaga a afioga i Faipule, ae tatau fo’i ona silasila toto’a le Komiti Fa’afoe i soo se auala e mafai ai ona fa’atupu tele i luga le teugatupea le litaea mo tagata faigaluega a le malo.

I le tausaga e 2008, na tula’i mai ai se fa’aletonu tele i le teugatupe a le litaea, lea na leiloa ai le aofaiga e $44 miliona ao i ai le teugatupe i maketi i fafo. Ona o lea tulaga, na talia ai loa e le Komiti Faafoe le fautuaga mai ia i latou o lo o puipuia le teugatupe, ina ia aveese mai le $38 miliona mai le teugatupe i fafo, ae aumai e teu i teugatupe a le litaea fa’alotoifale, ina ia puipuia ai le toe tula’i mai o se isi fa’aletonu i le lumana’i.

Na fesili le afioga i le ali’i faipule ia Sataua Dr. Mataese Samuelu, pe mafai e le tupe tului e 8% o lo o maua mai i nonogatupe a le malo, ona fesoasoani i le fa’atupuina i luga o le tupe avanoa mo le Litaea, ma mafai ai loa ona tatala le COLA i tagata faigaluega, na saunoa Va’anatiu, e mafai pe afai e ausia le 60% poo luga atu fo’i.

O le afioga i le ali’i faipule ia Samuel Ioka Meleisea na lagaina le mataupu e fa’atatau i le COLA, ma mafua ai loa ona valaau le iloiloga.

Saunoa Meleisea e fa’apea, e to’atele tagata o lona itumalo ua fesiligia le mafua’aga ua taofi ai e le malo le COLA, ao lea ua maitauina tulaga fa’aletonu o le tamaoaiga i totonu o le malo ma le atunu’u i le taimi nei.

Na talosaga Meleisea i le Komiti Fa’afoe o le Litaea, ina ia silasila toto’a ia auala e fesoasoani ai i tagata litaea, e ala i le tatala o le COLA e fesoasoani ai i o latou aiga.

Na taua e ni isi o afioga i Faipule sa auai i le iloiloga e fa’apea, e le tatua lava ona avea tupe o le litaea o se tupe e auala atu ai talosaga mo nonogatupe mo le malo. O popolega o afioga i Faipule, e le iloa lava le taimi e tula’i mai ai ni fa’aletonu i le malo i le lumana’i, ma fa’afuase’i ai loa lea ona fa’aletonu le totogiina o le nonogatupe i le litaea, ma safa ai loa ma tatgat litaea.

Na fa’afetaia e afioga i Faipule taumafaiga a le Komiti Fa’afoe ma le Ofisa o le Litaea e saii auala e fa’atupu ai i luga le teugatupe, ae i lo latou taofi, e le o nonogatupe le auala e tatau ona fa’atupu ai i luga le teugatupe, ae tatau ona si’i i luga saofaga a tagata faigaluega ma le malo.