Talimalo Amerika Samoa i fanau aoga mai atunu’u i fafo mo le ‘Samoa Bowl 2023’

Pago Pago - AMERIKA SAMOA

O le po o le aso Gafua, Tesema 25, 2023, na toa’i taunu’u ai i laufanua o Amerika Samoa ia se aumalaga e to’a 50 mai atunu’u i fafo, e aofia ai se au fili volipolo mai i setete o Amerika, e pei o Nebraska, Kansas, Missouri ma Texas, faapea ma a latou faiaoga, fa’atasi ai ma le ‘au fili ‘football’ ma a latou foi faiaoga, aua le ‘Samoa Bowl’ 2023 lea e fa’ataunu’uina i le vaiaso nei.

O le aso Lua, Tesema 26, 2023, sa fa’ataunu’uina ai le ava o feiloaiga  i le faletalimalo a le malo i Utulei,  ma tatala aloaia ai loa le ‘Samoa Bowl’ o lenei tausaga.

I se fa’aaliga tusitusia a le afioga i le Kovana, Lemanu P. S. Mauga, sa ia momoli atu ai le fa’amalo i alo ma fanau ua filifilia e auai i le ‘Samoa Bowl’ 2023 ma ia ta’ua e faapea, o lenei faamoemoe ua le na o se tauvaga, ae o se fa’atasiga e aloa’ia ai le agava’a o alo ma fanau ta’a’alo, o se avanoa e fa’amalosia ai le galulue fa’atasi faapea ma le fa’aalia o tu ma aganu’u a Samoa.

O le taimi mulimuli sa fa’ataunu’uina ai se ‘Samoa Bowl’, o le tausaga e 2003 ma na fa’aalia e le afioga Lemanu e faapea, o le toe faataunu’uina o nei ta’aloga, o se tasi lea o a latou sini fa’atuina mo le autalavou a Amerika Samoa, aua le fa’aauau pea ona atina’eina ma u’unaia taleni fa’a fa’agatama i totonu o le teritori.

Sa ta’ua foi e le afioga i le kovana, o nei fa’agatama, e le na o ni ta’aloga, ae o se fa’avae mo aoaoga, feutagaiga fa’ale atunu’u atoa ai ma le faaleleia atili o taleni.  E le gata i lea, e le na o le manumalo po o le toilalo, e mafai ona aoaoina e fanau aoga, ae e mafai foi ona avea ma auala e latou te fa’asoa ai, faamautuina fegalegalea’iga aua o latou lumanai, i tua atu o malae ta’alo.

O lo o ua fa’amautu nei ia lenei aumalaga toatele i le faletalimalo a le Tradewinds.

E to’a 90 alo ma fanau ua filifilia mo ‘au ta’a’alo a Amerika Samoa, e aofia ai ma ni fanau se toalua na filifilia mai i atunu’u i fafo.

Sa ta’ua e Tufi Malau’ulu Misipeka, o le faletua i le susuga ia Keiokalani Misipeka-Kelemete, o i la’ua ia na fesoasoani malosi ina ia tino mai lenei fuafuaga, o le autu moni lava lenei o nei fa’agatama; o le tautua, o le fetufaa’i o taleni, o le u’unaiga o lagona lelei, o le tauva fa’atamali’i, ma faigauo.

O le susuga i le fa’afeagaiga ia Rev. Patolo Mageo mai i le ekalesia Faapotopotoga a Keriso i Samoa (EFKS) na fofogaina le talosaga i le taeao ananafi ma sa ia saunoa i le taua o le Alofa, Fa’aaloalo, Fefa’asoaa’i ma le Mata’u i le Atua, ma na ia ta’ua, o le mafua’aga lea na taumafai malosi ai le afioga i le kovana, ina ia toe fa’ataunu’uina lenei faamoemoe. 

Na u’una’ia e le susuga i le Fa’afeaiga ia alo ma fanau uma sa auai i le tatalaina aloaia o le ‘Samoa Bowl’ 2023, i le taeao ananafi e faapea, e taua tele le fa’agasologa o lenei vaiaso, ae ia o latou manatua le ala e manuia ai outou i lenei olaga, o le alofa, fefa’asoa’i, fa’aaloalo ma le mata’u i le Atua.

O le vaiaso atoa lenei o lo o faia ai ta’aloga volipolo i le DYWA, i le 10:00 i le taeao.  Ae fa’ai’uina i le ‘football’ i le aso Toonai, Tesema 30, 2023.