Talia talosaga e fa’alauiloa igoa o molimau mataupu a Thomas Siaumau

E ui i le tete’e malosi o le loia a le malo, ae na talia lava e le afioga i le ali’i Fa’amasino Sili lagolago ia Fiti Sunia le talosaga a le itu tete’e, ma ia poloaina ai loa le loia a le malo ina ia tauaao atu i le itu tete’e le lisi ma igoa o molimau a le malo ua fuafua e valaau i le taimi o le fa’amasinoga autu a le ali’i o Thomas Siaumau, lea ua fa’amoemoe e fa’ataunu’uina i le aso 25 o Fepuari.

O le susuga a Siaumau, lea o lo o taofia pea i le toese i Tafuna talu mai le masina o Tesema 2017 na pu’e fa’apagota ai o ia e Leoleo, o lo o tu’uaia i le fa’alavelave lea na tafana ai e se tagata se ta’avale Leoleo i le nofoaga o loo i ai le malae Baseball i Tafuna.

O le aso Gafua na te’a nei na valaau ai le mataupu a Siaumau i luma o le Fa’amasinoga Maualuga. O le ali’i loia ia Daniel Holladay mai le Ofisa Loia a le RDA na tula’i mo Siaumau, ae o le tama’ita’i loia sili lagolago ia Christy Dunn na tula’i mo le malo.

O lenei iloiloga, sa fa’atulaga ona o se talosaga na faila e le loia a Siaumau, e talosagaina ai le Fa’amasinoga ina ia poloa’i le malo e faailoa atu igoa ma fa’amatalaga uma e fa’atatau i a latou molimau, atoa ai ma le tuuina atu o tulaga uma e fa’atatau i suesuega sa faia i Fale Suesue i Hawaii e fa’atatau i pulufana o lo o latou tu’uaia sa fa’aaoga e Siaumau i le taimi o le fa’alavelave, poo i ai ni tulaga lima e fa’amaonia ai le latou tagi.

Na taua e Holladay i lana folasaga e fa’apea, e tusa ai o le ripoti lea ua tauaao atu e le malo, e to’a 6 le aofa’i o a latou molimau ua faamoemoe e valaau i le aso o le fa’amasinoga, o ia molimau o fanau laiti uma i latou. Peita’i na fa’ailoa e Holladay e fa’apea, e le gata latou te le iloa poo ai igoa o nei molimau, ae latou te le iloa fo’i poo fea e maua pe saili i ai i latou ina ia fesiligia ma fa’atalatalanoa e uiga i lenei mataupu.

O se tasi o itu na fa’aalia e Holladay i le fa’amasinoga, o ripoti sa latou maua o loo taua ai tu’uaiga e fa’apea, o nisi o molimau a le malo sa onana i le po na tula’i mai ai le fa’alavelave. Ma, afai e moni ia tu’uaiga, pe fa’apefea ona iloa e nei tamaiti talavou le mea moni sa tupu i le po na tula’i mai ai le fa’alavelave e pei ona tu’uaia ai Siaumau.

“Afai e le mafai e le malo ona fa’ailoa mai igoa ma fa’amatalaga uma e fa’atatau ia latou molimau uma nei e to’a 6, e le mafai lava ona matou faia se auala e puipuia ai aia tatau o Siaumau i lenei mataupu. O le mafua’aga lena matou te matua talosagaina ai le Fa’amasinoga ina ia poloa’i le malo e fa’amatu’u mai igoa ma fa’amatalaga uma e fa’atatau i a latou molimau,” o le talosaga lea a Holladay.

“Ua fia amata la matou suesuega e uiga i lenei mataupu, peitai e le mafai ona matou faia se suesuega, aua matou te le iloa poo ai o le a matou o e fesiligia, ona matou te le iloa poo ai molimau a le malo e fesili i ai.”

I le mataupu i ripoti mo suesuega sa faia i Hawaii e fa’atatau i pulufana o loo finau le malo sa maua i le taimi o le fa’alavelave, na taua e Holladay e faapea, ua silia ma le tausaga talu ona mae’a le fa’alavelave ae latou te lei tauaaoina lava ni ripoti mai le malo e tusa ai o nei suesuega.

“O lea ua toe 2 vaiaso amata le fa’amasinoga autu ao lenei lava matou te fa’atali i le taimi e tauaao mai ai e le malo ripoti se’i amata la matou suesuega. E le mafai ona matou ulufale atu i le fa’amasinoga pe afai e le fa’amatu’u mai e le malo mau fa’amaonia o loo latou taulimaina e fesoasoani ai i le matou itu,” o le faamatalaga lea a Holladay.

“O a tonu lava fa’amaumauga o loo e mana’omia,” o le fesili lea a Sunia ia Holladay.

“Ou te mana’o i faamaumauga e pei o tulaga lima atoa ai ma faamaoniga o Siaumau sa fa’aaogaina pulufana ma a’upega e pei ona tu’uaia ai o ia e le malo,” o le tali lea a Holladay.

Na toe fesili Sunia ia Holladay poo a uma fa’amaumauga ua mae’a ona tauaao atu e le malo i le latou itu, ae na tali le ali’i loia, e na o le ripoti lava a Leoleo ma nai vaega o fa’amatalaga e fa’atatau i le fa’alavelave. O nei faamaumauga uma e pei ona taua e le loia a le itu tete’e, e le mafai ona fesoasoani i le latou itu mo le finauina o le mea amiotonu i lenei mataupu.

Ina ua fesiligia e Sunia ia Dunn poo a fa’amaumauga ma ripoti ua mae’a ona latou tauaao atu i le itu tete’e, na tali le loia a le malo, ua mae’a ona tauaao atu i le itu tete’e ripoti uma ma fa’amaumauga e fa’atatau i le mataupu, sei vagana ai le lisi o igoa o molimau atoa ai ma faamaumauga e fa’atatau ia tei latou, e le o mafai e le malo ona fa’amatu’u atu.

Ae mo le ripoti e fa’atatau i suesuega sa faia i Hawaii i pulufana, o ripoti ia e lei taunu’u mai lava e pei ona taua e Dunn. O le taimi e taunu’u mai ai ripoti nei, ona tu’uina atu fo’i lea i le itu a le malo.

Na faamanatu e Dunn ia Sunia le Ulutala 16 o Faatinoga o galuega i mataupu tau solitulafono, lea o loo manino mai ai, e le mafai ona fa’amatu’u atu e le malo igoa poo faamaumauga e fa’atatau ia latou molimau se’i vagana ua oo i le po e sosoo ma le aso o le fa’amasinoga, ona fa’atoa mafai lea ona tu’uina atu ia fa’amaumauga uma i le itu tete’e.

Na faailoa atili fo’i e Dunn ia Sunia e fa’apea, ua mae’a ona faia e le afioga i le Fa’amasino Sili ia Michael Kruse lana poloaiga e le mafai ai ona fa’amatu’u atu le lisi o igoa o molimau i le itu tete’e.

“E leai se mea e fa’atali ai fua le itu tete’e i fa’amaumauga a le malo, ua leva na tatau ona fa’atino a latou suesuega e uiga i lenei mataupu. O molimau fo’i e pei ona latou talosagaina, e le o ni molimau e fou i le ua molia ma lona aiga, lona uiga, o loo i ai lava le avanoa e mafai ai ona latou fesilisili solo ma suesue ni isi o tupulaga talavou i le nu’u ma tuaoi, ina ia maua mai ai ni fa’amatalaga e fesoasoani i le latou mataupu.

Na taua atili e Dunn e fa’apea, e le o taumafai le malo e taofi le itu tete’e mai le amata fa’atinoina lea o le latou suesuega e uiga i lenei mataupu, pau le tulaga e tatau ona manino, e le mafai ona fa’amatu’u atu le lisi o molimau a le malo.

I le mae’a ai ona fa’afofoga o le fa’amasinoga i folasaga a itu e lua, na talia ai loa e Sunia le talosaga a le loia a Siaumau, ma ia poloaina le loia a le malo ina ia tuuina atu le lisi ma igoa o molimau a le malo i le itu tete’e ao lei oo i le aso 15 o le masina lenei o Fepuari.