Talia pea le fa’aaoga o le C.I e malaga ai i fafo atu o le atunu’u

Ua faamaonia e Ta’ita’i o Ofisa o le malo o lo o galulue i tulaga o Femalagaaiga, le fa’aauau pea lea ona talia le pepa malaga o le C.I (Certificate of Identity) a tagatan’u o Amerika Samoa, e malaga ese atu ai ma fafo atu o le atunu’u, aemaise lava le aga’i atu i le setete o Hawai’i mo malaga i Amerika.

Pau le isi teuteuga e tatau i tagatanu’u o Amerika Samoa ona matua malamalama lelei i ai, afai e te malaga i le C.I i Hawaii, e tatau ona i ai ni isi ou pepa fa’amaonia o lo o pipi’i ai ma ou ata e fa’amaonia atili ai, o oe tonu lea o lo o malaga. O isi pepa fa’amaonia e aofia ai se I.D mai le Militeli poo le Laisene aveta’avale.

O le susuga a Samana Semo ma le Loia Sili ia Talauega Eleasalo Ale na fai ma sui o le malo, e molimau i le iloiloga lona luga a le Komiti o le Puipuiga o le Saogalemu Lautele a le Senate, lea na fa’aauau mai i le aso Lulu mo le taeao o le aso Faraile na te’a nei, mo le fa’amaninoina o lenei mataupu.

Ua mae’a fo’i ona fa’amaonia mai e le Ofisa o Femalagaaiga a le malo tele o Amerika i le malo o Amerika Samoa, le taliaina pea lea ona malaga o ona tagatanu’u i C.I e ulufale atu ai i Hawaii, se’i vagana ai le kamupani va’alele a le Hawaiin Airlines ma le Vaega o le TSA e ese fo’i a latou ta’iala mo tulaga o femalagaaiga.

O iloiloga a le Senate na valaau ina ua fesiligia e ni isi o Senatoa le mataupu e fa’atatau i C.I ua vavao ai le atunu’u, atoa ai ma le naunau e fa’amanino le tulaga sa’o ua taoto i ai lenei mataupu.

Ua manino fo’i i le iloiloga sa faia, le aoga pea o le C.I e malaga atu ai i isi atunu’u e aofia ai ma Samoa.

Pau le fautuaga ua tuuina mai i tagatanu’u pe a malaga i pepa malaga o le C.I e aga’i atu i Hawaii, ia vave lava i le ma’alele mo le taimi e siaki ai, ina ne’i i ai ni isi fesili e toe fia fesiligia ai le tagata malaga, ae o lo o lava ma totoe le taimi e fa’atino ai ni isi suiga, poo le taliina fo’i o ni fesili e tuuina atu e le TSA poo le Hawaiia Airlines.