Tala otooto o Fa’amasinoga

LIO FAAALIGA

O le ali’i e 26 tausaga mai Fagatogo lea na tu’uaia i lona ave fa’agaoi o ni oloa mai totou o se faleoloa i Fagatogo lava i le vaiaso na te’a nei, ua molia nei o ia e le malo i le moliaga mamafa o le gaoi.

I faamaumauga a le fa’amasinoga, o lo o taua ai le masalomia e le pule o se faleoloa Asia i Fagatogo le ua molia o lo o taumafai e gaoi ni oloa mai lana faleoloa, e mafua mai i lona alu atu soo i totonu o le faleoloa ae leai sana fa’atau e faia.

Ina ua mae’a le vaiaso muamua o le masina o Novema na te’a nei, sa maitauina pea e le faatau oloa gaioiga a le ua molia, peita’i sa le manatu mamafa i ai. Ae ina ua siaki e le fa’atau oloa lana masini pu’eata o lo o leoleoina ai totonu o lana faleoloa, na fa’ateia ai o ia ina ua ia vaaia ni gaioiga fa’asolitulafono a le ua molia sa faia i totonu o lana faleoloa.

O ia gaioiga e aofia ai lona gaoia o ni oloa o meaai faapea ai lavalava ma tuu i totonu o lana ato fa’afafa sa fealua’i ma amo solo, e aunoa ma le totogiina o se tupe mo ia oloa. Na taumafai le fa’atauoloa e fesiligia le ua molia i le vaiaso na te’a nei ina ua ia toe vaaia o ia, peita’i sa sola ese, ma ia logoina ai loa Leoleo mo se fesoasoani.

E $5,000 le vaega tupe lea ua faatulaga e totogi ona faatoa mafai lea ona tatala le ali’i o Lio Faaaliga i tua mai le toese i Tafuna, e fa’atali ai taualumaga o lana mataupu. O ni isi o tuutuuga e tatala ai o ia i tua, o le fa’asa lea ona toe alu i le faleoloa na a’afia, fa’asa fo’i ona ia toe taumafai e fa’afesootai le fa’atauoloa i soo se auala.

O le vaiaso fou lea ua fa’atulaga e toe tula’i ai Fa’aaliga i luma o le fa’amasinoga mo le isi ana iloiloga.

SOOSOO FAAPALE

E 90 aso lea ua faasala ai e le Fa’amasinoga Faaitumalo le ali’i o Soosoo Faapale, ina ua faamaonia e le Fa’amasinoga le moliaga o lona tete’e atu i Leoleo ao taumafai e pu’e faapagota o ia, e mafua mai i le fa’alavelave lea na tulai mai i Tafuna i le masina o Oketopa o le tausaga nei, lea na latou fufusu ai ma ni isi ali’i i luma o se faleoloa Asia, ae ina ua taunu’u leoleo, na sola le ua molia ona e lei mana’o e pu’e fa’apagota e Leoleo o ia.

Na taua e Faapale i le Faamasinoga e fa’apea, na mafua ona sola ese mai Leoleo, ona sa ia iloa lelei e le o fa’ataga e le Fa’amasinoga ona ia tagofia le ‘ava malosi, ona o loo fa’anofovaavaaia o ia mo le 12 masina, e mafua mai ina ua faamaonia e le faamasinoga le moliaga o le faaoolima i le tulaga tolu sa molia muamua o ia i le amataga o le tausaga.

Na faatoese Faapale i le fa’amasinoga e tusa ai o lana solitulafono, ma ia talosagaina ai se isi avanoa mo ia se’i toe sui ai lona olaga.

Ae na saunoa le afioga a Fiti Sunia e fa’apea, sa tuu atu muamua e le Fa’amaisnoga le avanoa ia te ia, ae foliga mai e leai se lesona sa ia aoaoina mai ai, o lea la ua ia toe talosaga atu mo se isi avanoa, ae ua manatu le Fa’amasinoga ua tatau loa ona tuuina atu se lesona mo ia.

“O le a tuu atu aso e 90 e te tuliina i le toese i Tafuna, e fai ma au fa’asalaga i le mataupu lenei, ina ua ta’usala oe i le moliaga mama o le sola ese ma Leoleo ao taumafai e pu’e faapagota oe, faapea ai ma le mataupu o lou le usitaia o tuutuuga o lau nofovaavaaia,” o le saunoaga lea a Fiti Sunia.

O ni isi o tuutuuga o le nofovaavaaia a Faapale, o le faasa lea ona ia toe tagofia le ‘ava malosi poo fualaau fa’asaina, auai i aoaoga e fesoasoani ai i le ‘ava malosi ma fualaau faasaina, atoa ai ma le faia o ni suega i lona tino ina ia iloa ai poo ia tagofia fualaau fa’asaina.