Tala otooto o Fa’amasinoga

SUAUUPAIA AMITUANA’I

Ua taofi le tuuina atu o se faaiuga a le fa’amasinoga maualuga fa’asaga i le mataupu a le ali’i o Suauupaia Amituana’i, se’i fa’atali se faaiuga o moliaga fou lea ua faila e le malo faasaga ia te ia, atoa ai ma le fia iloa e le fa’amasinoga o le tulaga e uiga i lana fanau e to’a 6 o loo i le fale, poo ai o loo ia tausia i le taimi nei.

O le aso Faraile na te’a nei na fa’atulaga e lau ai le fa’asalaga a Amituana’i, i le mae’a ai lea ona fa’amaonia e le fa’amasinoga o tuuaiga faasaga ia te ia, i lona le usitaia lea o tuutuuga o lana nofovaavaaia sa tuuina atu e le fa’amasinoga maualuga i le 2014, o le alu lea e asi le ofisa fa’anofovaavaaia, faapea ai ma le totogi o lana salatupe.

Na talosaga Amituana’i i le fa’amasinoga mo se avanoa e toe fo’i ai i tua e fa’aauau lana galuega e tausi ai lona aiga ma lana fanau. O Amituana’i o se ali’i Inisinia, e fai lava ana galuega i tua i lona aiga e maua ai ana tupe e tausi ai lona aiga.

Na talosaga lana loia fautua ia Douglas Fiaui i le fa’amasinoga mo se avanoa e toe fo’i atu ai le ua molia i tua e fa’aauau lana tausiga i lona aiga.

Na taua atili e Fiaui e faapea, o aso e 37 talu ona taofia Amituana’i i le falepuipui, ua a’afia ai le tausiga o lona aiga, ina ua leai se isi e faigaluega ma maua mai ai se tupe.

Na talosaga le loia a le malo ia Woodrow Pengelly i le fa’amasinoga e silasila toto’a i tuuaiga fou fa’asaga ia Amituana’i, e ese mai i tuuaiga o lona le alu e asi le ofisa faanofovaavaaia atoa ai ma le le totogiina o lana salatupe.

Na fesili le afioga i le ali’i fa’amasino ia Elvis P. Patea i le loia a le malo poo a moliaga fou o lea ua faia faasaga ia Amituana’i, ae na tali le loia a le malo, 3 moliaga lea ua faila e le malo fa’asaga ia Amituana’i, talu mai se fa’alavelave na tula’i mai i le masina o Iulai na te’a nei.

O ia moliaga e aofia ai le ave ta’avale ‘ona, taumafai e gaoi meatotino a se isi tagata  (attemped stealing), aemaise ai ma le faia o fa’amaumauga taufa’asese (forgery). Na taua atili e le loia a le malo e faapea, afai ae maea le iloiloga a Amituana’i i luma o le fa’amasinoga maualuga, ona aga’i atu loa lea i le aso lava lea i luma o le fa’amasinoga fa’aitumalo, lea ua fa’atoa faila ai le tagi fou fa’asaga ia te ia

Ona o le tagi fou lea na faila e le malo i le aso Faraile na te’a nei fa’asaga ia Amituana’i, na manatu ai loa le fa’amasinoga e taofi le tu’uina atu o sana fa’aiuga fa’asaga ia te ia, ae se’i fa’atali se fa’aiuga o le tagi fou lea ua faila fa’asaga ia te ia, atoa ai ma ni isi o fa’amatalaga o loo naunau le fa’amasinoga e fia maua mai e fa’atatau ia te ia.

O le taeao nei lea ua fa’amoemoe e toe tula’i ai Amituana’i i luma o le fa’amasinoga fa’aitumalo, mo le fa’atulagaina o le aso e faia ai lana fa’amasinoga autu e tusa ai o le tagi fou lea ua faia fa’asaga ia te ia.

TITIFALAULA SIAUMAU

O le aso Faraile na te’a nei na saini ai e le Fa’amasino Sili ia Michael Kruse se poloaiga, e pu’e fa’apagota mai ai le ali’i o Titifalaula Siaumau, ina ua le auai o ia i lana iloiloga sa fa’atulaga i le aso Faraile na te’a nei.

O Siaumau, lea sa galue i le Ofisa o Tiute a le malo o Amerika Samoa, o lo o tu’uaia o ia e le malo i le moliaga o lona fesoasoani lea i se isi tagata i le umia faasolitulafono o vaega o fualaau faasaina o le mariuana, ma le fa’amoemoe e tulei ma fa’atau atu i isi tagata.

O se tasi o tuutuuga mai le fa’amasinoga o lo o tatala ai o ia i tua, o le auai lea i soo se taimi e fa’atulaga ai ana iloiloga i luma o le fa’amasinoga.

E le i auai le ua molia i le taimi na valaau ai lana mataupu i luma o le fa’amasinoga maualuga i le vaiaso na te’a nei, ae ina ua fesiligia e Kruse lana loia ia Sharran Rancourt poo fea o i ai le ua molia, na tali lana loia na te le iloa poo fea o i ai o ia.

Ua fiu fo’i e fa’afesootai lona aiga i le numera o le telefoni sa masani ona latou fesootai ai, e leai ma se isi na tali mai. O le taimi lea na fa’ailoa ai loa e Kruse lona sainia o le poloaiga e pu’e fa’apagota mai ai Siaumau, pe afai ua ia le usitaia tuutuuga na tatala ai o ia i tua.

O le mataupu o lo o tu’uaia ai Siaumau na alia’e mai i fualaau fa’asaina o le mariuana lea na aumai i se afifi na auala mai i uta a le kamupani la’u uta o le CSL, ae fa’atua tusi mai i le igoa o Felix Penerosa, o se tagata faigaluega a le CSL.

Na taua e Penerosa i lana molimau i le ulua’i iloiloga a Siaumau na faia i luma o le fa’amasinoga fa’aitumalo i le masina o Me na te’a nei e fa’apea, na alu atu le ua molia ia te ia mo sana fesoasoani, mo le aumaia lea o sana afifi mai fafo.

Ina ia fa’a faigofie mo Siaumau feuiaiga e mana’omia, na taua ai e Penerosa lona faia o se auala e fesoasoani ai i le ua molia, e ala i lona fai i ai e fa’atuatusi mai le afifi i lona igoa, ina ia faigofie ai feuiaiga ma vave ai ona taunu’u mai le afifi i Amerika Samoa.

O le afifi a Siaumau e pei ona taua e le ali’i leoleo su’esu’e ia Det. John Paselio sa suesueina lenei mataupu, o lo o aumai ai se sipika i totonu, ae i totonu o le sipika o lo i ai vaega o lau mamago o le mariuana. O le afifi fo’i sa lafo mai i le igoa o Toese Asiata mai Sacramento.