Tala otooto o Fa’amasinoga

ABRAHAM MCMOORE

O le ali’i lea o lo o tu’uaia e le malo i lona fa’alala lea o se fana i se isi ali’i i Utulei i le vaiaso na te’a nei, ua tu’uaia nei o ia e le malo i moliaga o le umia fa’asolitulafono o se a’upega atoa ai ma le umia o se a’upega e le i lesitalaina.

O moliaga ua tu’uaia ai e le malo ia le ali’i o Abraham McMoore e aofia ai le moliaga mamafa e tasi o lona fa’aaoga fa’asolitulafono o se a’upega, o se fa’asalaga e mafai ona fa’asala ai o ia i le toese mo le umi e le silia i le 5 tausaga, pe fa’asala foi i le salatupe e le silia i le $5,000, fa’apea ai ma moliaga mama e 4 e aofia ai le fa’atupu vevesi i nofoaga faitele, fa’ao’olima i le tulaga tolu, umia o se a’upega e le i lesitalaina, atoa ai ma lona fa’aaoga fa’asolitulafono o se a’upega.

O le fa’alavelave lenei na tula’i mai i Utulei i le aso 18 Oketopa na te’a nei, ina ua logo e le ali’i na a’afia Leoleo mo se fesoasoani, ina ua fa’alala atu e McMoore se fana ia te ia. E tusa ai ma fa’amaumauga a le fa’amasinoga, e tuaoi ia le alii na a’afia ma le ali’i ua molia nei e le malo.

Na taua i fa’amaumauga a le fa’amasinoga e faapea, e tu loa le ta’avale a le ali’i na a’afia i luma o le fale o lo o fai ai lana galuega, ae ona vaaia loa le ua molia ua savali atu ma fa’atonu o ia e alu ese ma lana ta’avale, peita’i sa ia fa’ailoa i ai i le ali’i ua molia, o lo o alu atu e fai lana galuega i le fa’apipi’iina o uae’a moli eletise o le fale a se tasi o aiga, peita’i sa le i fiafia i ai le ua molia ma ia fa’atonuina pea le ali’i na a’afia e alu ese.

Na vaaia le ‘ona tele o le ali’i ua molia ma fa’afuase’i ai loa ona ia se’i ese sana fana, le ituaiga o le .22 ma fa’alala i le ali’i na a’afia ma ia fa’afefe o ia pe afai e le alu ese. Na solomuli filemu ese le ali’i na a’afia ma ia fa’afeso’ota’iina loa Leoleo e tusa ai o lenei fa’alavelave.

Ina ua fesiligia e Leoleo le ali’i ua molia, sa ia ioeina ai le i ai o lana fana i le fale, peita’i na ia teena tu’uaiga i lona fa’alala lea o le fanau i le ali’i na a’afia.

E $1,000 le tinotupe lea ua fa’atulaga e le fa’amasinoga e totogi ona fa’atoa mafai lea ona tatala le ua molia i tua mai le toese i Tafuna, afai ae mafai ona tatala o ia i tua, ua poloaina o ia ina ia aua ne’i ona toe umia se a’upega mata’utia pe na te toe soliina fo’i se tulafono a le malo.

O le aso Tofi o le vaiaso fou lea ua fa’atulaga e toe valaau ai le mataupu a le ua molia i luma o le fa’amasinoga.

SOANE PENITITA

Na avea isi fa’amaumauga fou na maua e le fa’amasinoga fa’asaga i le ali’i o Soane Penitita ma itu na teena ai loa e le afioga i le ali’i fa’amasino ia Fiti A. Sunia le maliliega na sainia e le ua molia, ae ua toe tolopo lana mataupu e toe fofogaina i le aso 9 Novema 2016.

O ananafi na fa’amoemoe e fa’amuta ai le mataupu a Penitita, ina ua fa’ailoa e le malo le maliliega lea ua latou sainia ma le ua molia, e tali ioe ai i le moliaga o le ave ta’avale ‘ona, ae solofua isi moliaga tau ave ta’avale o lo o totoe ai i le pepa o tagi na fa’aulu e le malo.

O tuutuuga o le maliliega a Penitita ma le malo, e le gata e fa’anofovaavaaia o ia mo le 6 masina, ae tatau fo’i ona se’i lona laisene mo le 6 masina, totogi le salatupe e tu’uina atu e le fa’amasinoga, ma ia aua i ni aoaoga e fa’amanino ai a’afiaga o le ‘ava malosi.

Na fa’ateia loia a itu e lua ina ua fesiligia e le afioga i le ali’i fa’amasino ia Sunia i laua, pe la te silafia, o le fa’alua ai loa ona tula’i Penitita i luma o le fa’amasinoga i le moliaga o le ave ta’avale ‘ona, ae na tau fai tali uma loia, la te le i maua ia fa’amatalaga e uiga i le ulua’i mataupu na ta’usala muamua ai Penitita e le fa’amasinoga.

Saunoa Sunia e fa’apea, e taua le silafia e loia a itu uma e lua o fa’amatalaga uma e fa’atatau i mataupu fa’apenei, ina ia fuafua i ai fautuaga mo fa’asalaga e tatau ona tu’uina atu.

Na taua e le itu a le malo e fa’apea, o lo o manino le tulafono, a fa’atolu loa ona ta’usala se tagata i le moliaga o le ave ta’avale ‘ona, ona se’i loa lea o lana laisene ave ta’avale mo le olaga toa, e le mafai ona ia toe fa’afoeina se ta’avale.