Tala otooto o Fa’amasinoga

MALIEO MAUI

O le ali’i e 24 tausaga le matua lea ua fa’alua ona tu’uaia e le malo ma le Ofisa Fa’anofovaavaaia i lona le usita’i lea i tuutuuga o lana nofovaavaaia, ua poloaina e le fa’amasinoga lona tuliina o masina e 12 i le toese i Tafuna, e fai ma aoaoga mo ia i lona le usita’i soo i tuutuuga a le fa’amasinoga.

Na fa’atoese le susuga a Malieo Maui i le fa’amasinoga maualuga i le aso Faraile na te’a nei i lona le usitaia o fa’atonuga sa tu’uina atu ia te ia, atoa ai ma lana talosaga mo se isi avanoa se’i toe fo’i ai i tua e fa’aleleia lona olaga ma saili se galuega e tausi ai lona aiga, aemaise ai lona augani i le fa’amasinoga mo se fa’amagaloga mo ia.

E pei ona taua i fa’amaumauga a le fa’amasinoga sa tolaulauina e le afioga i le ali’i fa’amasino ia Elvis P. Patea e fa’apea, o le tausaga e 2013 na ta’usala ai e le fa’amasinoga maulauga ia Maui i le moliaga o le talepe fale i le tulaga 2, ma fa’anofovaavaaia ai loa o ia e le fa’amasinoga mo le 5 tausaga i lalo o tuutuuga e tele e ao ona ia usita’i i ai.

O ni isi o ia tuutuuga e aofia ai lona tuliina o masia e 20 i le toese i Tafuna, peita’i sa na o le 8 masina na tuli ae toe tuu i ai e le fa’amasinoga le avanoa ma fa’amalumalu ai loa lona tuliina o masina e 12, fuafua lea i lona usita’i i tuutuuga uma a le fa’amasinoga e aofia ai le aua ne’i ona toe solia se tulafono.

O le tausaga e 2015 a o fa’anofovaavaaia pea le ua molia, na faia ai se suega i lona tino ma fa’amaonia ai lona tagofia o fualaau fa’asaina o le mariuana, peita’i e o o mai lava i le aso Faraile na te’a nei e le i faia lava se fa’aiuga a le fa’amasinoga fa’asaga i lona le usita’i lea i tuutuuga o lana nofovaavaaia.

O le tausaga nei fo’i na toe ta’usala ai fo’i o ia i le fa’amasinoga fa’aitumalo i le moliaga o le fa’atupu vevesi i nofoaga faitele, ma mafua ai loa ona faila e le Ofisa Fa’anofovaavaaia fa’apea ai ma le malo le talosaga i le fa’amasinoga, mo se avanoa e fa’aleaoga ai le nofovaavaaia ai Maui, ona o lea ua fa’amaonia lona soli o tuutuuga o lana nofovaavaaia.

Na taua e le loia a Maui ia Michael White e fa’apea, o le tele o tuutuuga uma o le nofovaavaaia a le ua molia sa ia usita’i ma tausisi i ai, se’i vagana ai lava le tuutuuga o le aua ne’i ona toe solia se tulafono e le o usita’i o ia i ai, ae na fa’ailoa e Patea e fa’apea, e le iloa e le fa’amasinoga le mafua’aga e faigata ai ona usita’i Maui i le tuutuuga o le aua lea ne’i ona toe solia se tulafono a le malo.

Na tutu fa’atasi le loia a le ua molia ia White ma le loia a le malo ia Gerald Murphy e talosaga i le fa’amasinoga mo se fa’asalaga mama mo Maui, ina ia mafai ai ona toe fo’i o ia i lona aiga e saili sana galuega e tausi ai ona matua, ma fesoasoani ai i lona lumana’i.

I le mae’a ai ona iloilo e ali’i fa’amasino o sa latou fa’aiuga e tusa ai o lenei mataupu, na malilie ai loa o le a le faia se fa’aiuga e fa’aleaoga ai le nofovaavaaia a le ua molia, ina ia tuli ai tausaga e 5 e pei ona fa’amalumalu, ae na manatu le fa’amasinoga latou te faia se teuteuga i se tasi o tuutuuga, ina ia poloaina o ia e tuli loa masina e 12 lea sa fa’amalumalu mai e le fa’amasinoga i le 2013, ae o le a toese ai aso ia na taofia ai o ia i le toese e fa’atalitali ai le tu’uina atu o se fa’asalaga mo ia.

O le afioga i ali’i fa’amasino lagolago ia Mamea Sala Jr ma Muasau T. Tofili na lagolago ia Patea i le iloiloina o se fa’aiuga mo lenei mataupu.

TITIFALAULA SIAUMAU

Na teena e le susuga a Titifalaula Siaumau moliaga mamafa e 2 o lo o tu’uaia ai o ia e le malo, ina ua tula’i i luma o le fa’amasinoga maualuga i le aso Faraile na te’a nei. I lona teena ai o tu’uaiga fa’asaga ia te ia e pei ona fa’aleo e lana loia fautua ia Sharron Rancourt, ua fa’atulaga ai loa lana ulua’i iloiloga e faia lea i le aso 14 Iulai o le tausaga nei, ae o lana fa’amasinoga autu ua fa’atulaga i le aso 1 Oketopa 2019.

Sa talosagaina fo’i e Rancourt le fa’amasinoga e fa’atonu le malo ina ia vave tu’uina atu mau fa’amaonia o le latou tagi i le la itu, ina ia vave ai ona faia a latou iloiloga nai lo le tau fa’atalitali i le taimi mulimuli e latalata ai i le aso o le fa’amasinoga autu, ae fa’atoa tu’uina atu e le malo mau fa’amaonia o lenei mataupu.

Ina ua fesiligia e le afioga i le ali’i fa’amasino sili ia Michael Kruse le loia a le malo ia Gerald Murphy e tusa ai o le talosaga a le itu tete’e, na saunoa le ali’i loia e fa’apea, “Lau afioga i le fa’amasino, o le a ou faia le mea sili ina ia mautinoa e vave mai le ripoti a Leoleo ma tu’uina atu loa i le itu tete’e”.

Ae na toe tali Kruse e fa’apea, “E le taua le faia o le mea sili ae tatau ona fa’atonu au Leoleo ina ia vave tapena a latou ripoti ma tu’uina mai ina ia mafai ai fo’i e le isi itu ona silasila i ai. Ma fa’ailoa fo’i i au Leoleo, e i ai le taimi e le toe lava ai le onosa’i a le fa’amasinoga i tulaga fa’apenei”.

O lo o tumau pea tuutuuga o lo o tatala ai Siaumau i tua e fa’atali ai taualumaga o lana mataupu, e aofia ai le fa’asa lea ona taumafai e fa’afeso’ota’i molimau a le malo, fa’asa fo’i ne’i ona toe solia se tulafono a le malo.

O moliaga faasaga ia Siaumau e aofia ai lona aumai mai lea i le atunu’u o vaega o fualaau fa’asaina (import of controlled substance - marijuana), fa’apea ai ma le moliaga o lona fesoasoani lea i se isi tagata i le tufatufaina atu o fualaau fa’asaina (conspiracy to distribute controlled substance - marijuana), ma o ia moliaga na afua mai i le fa’alavelave lea na maua ai e sui o le Ofisa o Tiute ni vaega o le laau fa’asaina o le mariuana sa i totonu o se afifi na aumai i le uta a le va’alele o le Hawaiian Air i le po o le aso 27 Mati 2017.

Na taua e le molimau fa’atuatuaina e le malo, o ia fo’i lea sa fa’atuatusi mai i ai le afifi o lo o tu’uaia na aumai fa’anana ai fualaau fa’asaina, o Siaumau e ana le afifi ae na mafua ona aumai i lona igoa ona sa talosaga atu o ia i se auala e fa’afaigofie ai ona oo mai lana afifi i le atunu’u, o lo o aumai ai lana sipika mai fafo.

Na teena e le molimau autu a le malo ia Felix Penerosa lona le iloaina o ni fualaau fa’asaina o lo o i totonu o le afifi. E tula’i mai lenei fa’alavelave ae o le taimi lea o lo o faigaluega Penerosa i le kamupani la’u uta a le CSL Cargo Services ae o Siaumau o lo o galue o se ali’i Ofisa mo le Ofisa o le Tiute a le malo.