Tala otooto o Fa’amasinoga

FALEPUIPUI LE ALI’I NA IA FA’AOOLIMA I LONA TO’ALUA

E 15 aso lea ua fa’asala ai e le Vaega o le Fa’amasinoga o Aiga, Fualaau Fa’asaina ma le Ava malosi (FDA) o le Fa’amasinoga Maualuga le ali’i e 36 tausaga le matua lea na tu’uaia i lona fa’ao’olima i lona to’alua, ina ua ta’usala o ia e le fa’amasinoga i moliaga mama e 2 o le fa’ao’olima i le tulaga tolu, i lalo o se maliliega na sainia e le ua molia ma le malo, lea fo’i na talia e le fa’amasinoga.

E tusa ai ma fa’amaumauga a le fa’amasinoga, o le fa’alua ai lea ona ta’usala le ua molia i le moliaga mama o le fa’aoolima i le tulaga tolu. O le tausaga e 2014 na ta’usala ai o ia e le fa’amasinoga i le fa’alavelave lea na ia fa’ao’olima ai i se ali’i e 20 tausaga le matua na ia lafo se upu palauvale i lona tuafafine, ma fa’anofovaavaaia ai o ia e le fa’amasinoga mo le umi e 12 masina, i lalo o tuutuuga e sa ona ia usita’i i ai.

Ae o le masina o Tesema na te’a nei na toe a’afia ai fo’i o ia i le tulafono, e mafua mai i le fa’alavelave lea na ia fa’ao’olima ai i lona to’alua i le po o le Kerisimasi, faapea ai ma le aso na sosoo ma le Kerisimasi, e mafua mai ina ua ‘ona atu le ua molia i le fale e le o i ai se mea’ai, ma i’u ai lava ina tula’i mai se vevesi i lo la va ma fa’ai’u ai loa i lona fa’ao’olima i lona to’alua.

O ni isi o tuutuuga o le nofovaavaaia a le ua molia mo le umi e 24 masina, e aofia ai lona tuliina lea o aso e 45 i le toese i Tafuna, peita’i o le a fa’amalumalu lona tuliina o aso e 30, ae ua lava aso e 15 e taofia ai o ia i le toese, e aofia ai aso e 5 lea na taofia ai o ia ina ua fa’atoa alia’e mai lenei mataupu.

O isi tuutuuga o le nofovaavaaia ai le ua molia e aofia ai le fa’asa lea ona ia toe taumafai e fa’afeso’ota’i lona to’alua, pe toe taumafai fo’i e fa’amata’u o ia, ona o lea ua manino le fa’amasinoga ua faila e le fafine sana talosaga i le fa’amasinoga mo se la teteaga fa’aletulafono.

Ua poloaina o ia e auai i ni aoaoga e fesoasoani ai i le tulaga o le ita, atoa ai ma lona totogiina o le salatupe e $100.

ANTHONY SIOKA

O le aso 5 Me lea ua fa’atulaga e tu’uina atu ai se fa’aiuga a le fa’amasinoga maualuga fa’asaga i le ali’i talavou o Anthony Sioka, ina ua fa’amaonia e le fa’amasinoga tu’uaiga fa’asaga ia te ia, o lona le usita’ia lea o tuutuuga o lana nofovaavaaia sa tu’uina atu e 5 tausaga.

O ni isi o tuutuuga o le nofovaavaaia sa tu’uina atu e le fa’amasinoga ia Sioka talu mai le tausaga e 2013, ina ua ta’usala o ia fa’atasi ai ma isi ali’i e to’atolu i lo latou faia o uiga mataga i se teineititi e talavou i lalo o le tulafono, o le alu lea e asi le Ofisa Fa’anofovaavaaia fa’atasi i le masina, ma ia totogi lana salatupe, peita’i ua manino i fa’amaumauga a le Ofisa Fa’anofovaavaaia, e lei usitaia e le ua molia tuutuuga e pei ona taua.

Na ta’utino le ua molia i luma o le fa’amasinoga maualuga i le vaiaso na te’a nei, i lona fa’atamala lea ua mafua ai ona ia le tausia tuutuuga o lana nofovaavaaia.

O lo o taofia pea Sioka i le toese i Tafuna e fa’atali ai le aso lea ua fa’atulaga e tu’uina atu ai se fa’aiuga a le fa’amasinoga fa’asaga ia te ia.

WILLIAM UPUNEI

O le vaiaso na te’a nei na taofia ai le ali’i o William Upunei i le falepuipui i Tafuna, ina ua fa’amaonia le maua o le vailaau o loo maua i le pauta o le aisa i totonu o lona tino, i le taimi na aga’i atu ai o ia e asi le Ofisa Fa’anofovaavaaia, ae poloaina ai loa le faia o lana suega fa’apitoa.

Ua taofia nei o ia e fa’atali ai lana ulua’i iloiloga lea ua fa’atulaga e faia i le fa’aiuga o le vaiaso nei, lea o le a iloilo ai pe fa’amaonia ua ia le usitaia tuutuuga o lana nofovaavaaia sa tu’uina atu e 5 tausaga, ina ua ta’usala o ia e le fa’amasinoga i le moliaga o le gaoi i le tausaga e 2014.

O ni isi o tuutuuga o le nofovaavaaia a Upunei sa tu’uina atu e le fa’amasinoga i le 3 tausaga talu ai, ia aua ne’i ona toe tagofia le ‘ava malosi poo fualaau fa’asaina, o le a mafai fo’i ona faia se suega i lona tino ina ia fa’amaonia ai o loo ia usitaia ia tuutuuga.