Tala otooto o Fa’amasinoga

LAFAELE APELU

O le vaiaso fou lea ua fa’atulaga e lau ai le fa’aiuga a le ali’i o Lafaele Apelu, ina ua fa’amaonia e le fa’amasinoga maualuga tu’uaiga o lona le usitaia lea o tuutuuga o lana nofovaavaaia sa tu’uina atu i le tausaga e 2014, ina ua ia le totogiina lana salatupe e $1,000, le alu e asiasi i le Ofisa Fa’anofovaavaaia fa’atasi i le masina, atoa ai ma lona toe soli lea o tulafono a le malo.

Ina ua ta’usala e le fa’amasinoga ia Apelu i le moliaga o le fa’ao’olima i le tulaga lua i le masina o Iulai 2014, na fa’anofovaavaaia ai loa o ia mo le 5 tausaga i lalo o tuutuuga e ao ona ia usita’i i ai, ma o ni isi o ia tuutuuga e aofia ai lona tuliina lea o masina e 20 i le toese, poloaina lona totogiina o le salatupe e $1,000, aua ne’i ona toe solia se tulafono, ma ia alu e asiasi i le Ofisa fa’anofovaavaaia fa’atasi i le masina.

O le masina o Ianuari o le tausaga nei na ta’usala ai e le fa’amasinoga fa’aitumalo ia Apelu i le moliaga mama o le fa’atupu vevesi i nofoaga faitele, e mafua mai ina ua auai o ia i se vevesi na mafua mai i se inugapia sa faia. Na maua fo’i i fa’amaumauga a le ofisa faanofovaavaaia le silia i le 6 masina e lei toe alu lava Apelu e asi le ofisa fa’anofovaavaaia.

E na o le 12 masina na tuli e Apelu i le toese ae tatala loa o ia i tua, ma le tuutuuga o masina e 8 o loo totoe o lana fa’asalaga fa’a falepuipui e 20 masina, o le a fa’amalumalu lona tuliina, fuafua lava i lona usitaia o poloaiga a le fa’amasinoga.

O lo o taofia pea Apelu i le toese i Tafuna e fa’atali ai le aso lea ua fa’atulaga e tu’u atu ai se fa’aiuga a le fa’amasinoga fa’asaga i le mataupu lea ua ta’usala ai o ia, o lona le usita’i lea i tuutuuga o lana nofovaavaaia.

Na fa’ailoa e le afioga i le ali’i fa’amasino ia Elvis P. Patea ia Apelu i le vaiaso na te’a nei e fa’apea, sa tu’u atu e le fa’amasinoga le avanoa ia te ia i le ulua’i taimi na ta’usala ai o ia i le moliaga o le fa’ao’olima i le tulaga lua, ina ua ia talosaga atu mo se avanoa, ae foliga mai ua ia le manatu mamafa i le avanoa sa tu’uina atu e le fa’amasinoga ia te ia.

O le afioga i le ali’i fa’amasino lagolago ia Fa’amausili Pomele ma Muasau T. Tofili o loo lagolago ia Patea i le iloiloina o lenei mataupu. O le ali’i loia ia Gerald Murphy o loo tula’i mo le malo ae o le ali’i loia ia Michael White o loo tula’i mo Apelu.

FA’ASALA FALEPUIPUI LE ALI’I FA’AO’OLIMA I LONA TO’ALUA

E 2 fa’aiuga o vaiaso lea ua poloaina e le fa’amasinoga fa’aitumalo e taofia ai i le falepuipui i Tafuna, le ali’i lea na tu’uaia i lona fa’aoolima lea i lona to’alua i le fa’aiuga o le tausaga na te’a nei, ina ua ta’usala o ia i le moliaga o le fa’ao’olima i le tulaga tolu i le vaiaso na te’a nei.

Talu ai o puipuiga i lalo o le tulafono i le faigofie lea ona iloa Tina o loo faia fa’asaga i ai nei sauaga, o le a le mafai ai e le fa’amasinoga ona fa’alauiloa le suafa o le ali’i o loo a’afia i lenei mataupu.

Na fa’atoese le ua molia i le fa’amasinoga e tusa ai o lana solitulafono sa faia, ma ia talosagaina ai se isi avanoa mo ia se’i toe fa’aleleia ai le la aiga ma lona to’alua. Sa ia taua fo’i lona naunau e toe sosoo lo la aiga ma lona to’alua, lea na motusia mai lava i le masina o Tesema na te’a nei ina ua taofia o ia e Leoleo, ma fa’asa ai e le fa’amasinoga o ia ona toe taumafai e fa’afeso’ota’i lona to’alua.

Na fa’ailoa e le loia a le malo i le fa’amasinoga le musu o le fafine e toe sosoo le la aiga ma lona to’alua, ona ua fefe o ia i le fasi atoa ai ma le faiga fa’apologa e fai atu e le ua molia ia te ia.

O le fa’alavelave e pei ona ta’usala ai le ali’i ua fa’asala nei e le fa’amasinoga, na mafua mai ina ua ‘ona atu o ia i le po ma amata loa ona ia tu’i fesili lona to’alua poo fea ua ave uma i ai le tupe sa ia avatu e fa’atau ai meaai mo le aiga, ma i’u ai lava i lona aapa atu ua futi mai le ulu o lona to’alua ae ta tu’i ona foliga.

Na taua e le fafine na a’afia i Leoleo le fa’atele ona faia e lona to’alua o uiga saua nei ia te ia, ae fa’atetele lava i le taimi e ‘ona atu ai i le fale i fa’aiuga o vaiaso. Na taua atili e le fafine na a’afia i Leoleo ona masalosaloga ua i ai, ua fa’aaoga e lona to’alua fualaau fa’asaina e aofia ai le mariuana ma le aisa, ona o ana uo ia ua mafuta ma eva ai, o ni isi o loo masalomia lo latou tagofia o ituaiga fualaau fa’asaina nei i totonu o le latou pitonu’u.

O ni isi o tuutuuga o le nofovaavaaia e 12 masina a le ali’i lea ua ta’usalaina nei e le fa’amasinoga, o lona totogi lea o le salatupe e $125 i le fa’amasinoga, fa’asa ona ia toe faia ni uiga tau fa’amata’u pe fa’aoolima fo’i i lona to’alua, ua fa’asa fo’i ne’i ona toe tagofia le ‘ava malosi poo fualaau fa’asaina, o le a mafai fo’i ona suesueina lona tino poo ia tagofia tulaga e pei ona taua.

Ua fautuaina fo’i e le fa’amasinoga le ua molia ina ia auai i ni aoaoga fa’a faufautua e fesoasoani ai i le tulaga o le ita o loo a’afia ai o ia.

Na fa’ailoa atili e le fa’amasinoga i le ali’i lenei e fa’apea, e le taitai talia e le fa’amasinoga ituaiga gaioiga nei o loo faia fa’asaga ia Tina ma fanau, o le sauaina lea o i latou i totonu o aiga, ma o le tiute o le fa’amasinoga ia mautinoa e puipuia aia tatau atoa ai ma le saogalemu o i latou nei mai le a’afia i sauaga ma faiga fa’apologa toe le alofa.