Tala otooto o Fa’amasinoga

VAATUTI TEVITA JR

O le ali’i e 27 tausaga le matua lea na tu’uaia e le malo i lona faia o uiga mataga i se teineititi e 14 tausaga le matua, ua ia ta’utino i le fa’amasinoga e fa’amaoni tu’uaiga fa’asaga ia te ia.

E 5 moliaga na ulua’i tu’uaia ai e le malo le ali’i o Va’atuti Tevita Jr, o ia moliaga e aofia ai moliaga mamafa e 4 e pei o le faiaiga ma se teineititi e laititi i lalo o le tulafono, faia o uiga fa’asotoma, faia o gaioiga fa’afeusuaiga, tagofia o itutinosa o se teineititi laititi, ma le moliaga mama o lona faia o gaioiga e ono lamatia ai le saogalemu o se teineititi.

Ae i lalo o le maliliega lea sa latou sainia ma le malo ma ua taliaina fo’i e le fa’amasinoga maualuga, ua tali ioe ai Tevita Jr i le moliaga mamafa e tasi o lona faia o gaioiga mataga fa’afeusuaiga, ae solofua ai e le fa’amasinoga isi moliaga o lo o totoe ai i le pepa o tagi sa ia fa’aulu.

I le tali ioe ai Tevita Jr i le moliaga e pei ona ta’usala ai o ia e le fa’amasinoga maualuga, sa ia ta’utino ai e fa’apea, i le masina o Setema 2016 ao fa’aauau pea le la mafutaga ma le teineititi e 14 tausaga le matua na a’afia, sa la faiaiga ai ma lea teineititi e ala i lona fa’atinoina i ai o ni uiga mataga e le tusa ma le tulafono.

E pei ona taua i fa’amaumauga a le fa’amasinoga e fa’apea, e fai lava si umi o le taimi na faia ai le mafutaga a le ua molia ma le teineittii na a’afia, seia oo lava i le taimi na maua ai o ia e le aiga, ma tu’uina atu ai loa lenei mataupu i le Ofisa o Leoleo.

Na ta’utino Tevita Jr e fa’apea, o le gaioiga sa ia faia, sa le tusa lea ma ala o le tulafono.

O le moliaga o le faia o uiga mataga fa’afeusuaiga e pei ona ta’usala ai Tevita Jr, e mafai ona fa’asala ai se tasi i le toese mo le umi e le silia i le 7 tausaga, poo le fa’asala fo’i i se sala tupe e le silia i le $5,000.

O lo o taofia pea le ua molia i le toese i Tafuna e fa’atali ai le aso 13 Aperila o le tausaga nei, lea ua fa’atulaga e lau ai lana fa’asalaga.

O le afioga i le ali’i fa’amasino sili ia Michael Kruse na iloiloina le mataupu a Tevita Jr, fa’atasi ai ma le lagolagosua a afioga i ali’i fa’amasino ia Fa’amausili Pomele ma Tunupopo Faleafaga. O le ali’i loia ia Bob Pickett na tula’i mo le itu a le malo, ae o le ali’i loia fautua ia Douglas Fiaui o lo o avea ma loia fautua a le ua molia i lenei mataupu.

FA’ATULAGA ASO FAIA AI FA’AMASINOGA AUTU O MATAUPU TUAI

O le vaiaso ua te’a na fa’atulaga ai e le fa’amasinoga maualuga taimi ma aso e faia ai fa’amasinoga autu mo ni isi o mataupu ua tele masina e lei toe maua i ai e le fa’amasinoga se fa’amatalaga.

O ia mataupu sa tauaveina mai e le afioga i le ali’i fa’amasino sili lagolago ia Lyle L. Richmond, ae talu mai le taimi na gasegase ai le ali’i fa’amasino ina ua latalata i le fa’aiuga o le tausaga na te’a nei, na ta’atitia mai ai loa ni isi o iloiloga sa fa’atulaga mo ni isi o nei mataupu.

O ni isi o nei mataupu e aofia ai le mataupu o lo o tu’uaia ai le ali’i sa avea ma Pulesili o le Ofisa o le Litaea a le malo ia Filisouaina Ta’afua, lea ua fa’atulaga ai loa e le fa’amasinoga le aso 6 Novema 2017 e fa’atulaga ai lana fa’amasinoga autu, ae afai e le fa’ataunu’uina le fa’amasinoga autu mo le isi mataupu lea ua fa’atulaga i le aso 5 Iuni 2017, ona tu’u mai ai loa lea o le mataupu a Ta’afua e fa’ataunu’u ai lana fa’amasinoga autu i le masina o Iuni.

O le mataupu pito sili ona leva i fa’amaumauga a le fa’amasinoga, o le mataupu i le va o le malo ma le alii o Stoechkict Allen lea na tula’i mai i le 2011, ma ua fa’atulaga ai loa le aso 18 Tesema 2017 e faia ai lana fa’amasinoga autu.

O le mataupu o loo tu’uaia ai Allen na alia’e mai i le taimi ao galue o ia i le Ofisa o le Loia Sili a le malo, lea o lo o tu’uaia ai o ia i le mataupu e fa’asaga i le faia o C.I fa’atasi ai fo’i ma ni isi o tagata sa latou galulue i le Ofisa o le Loia Sili i lea vaitaimi.

O le ali’i Loia Tuto’atasi sa tofia e le kovana ia Togiola Tulafono i lena vaitaimi ia Marcellus Tala Uiagalelei o loo tula’i mo le malo. Na taua e Uiagalelei e fa’apea, o le aso 19 Aokuso 2014 na fa’atulaga e faia ai le fa’amasinoga autu o lenei mataupu, peita’i na toe tolopo ina ua le avanoa le molimau a le malo sa fa’amoemoe i ai le mataupu, ina ua maua i ripoti o loo i Niu Sila le molimau i le taimi tonu na fa’atulaga ai le fa’amasinoga.

O le alii loia ia Fiti Sunia lea ua avea nei ma Fa’amasino o le Fa’amasinoga Fa’aitumalo sa avea ma loia a Allen, ma ua poloaina Allen e le fa’amasino ina ia oo atu i lana iloiloga lea ua fa’atulaga i le aso 17 Mati 2017 ua maua se isi ana loia fou.