Tala otooto o Fa’amasinoga

JOE FA’AALIGA

Ua ta’utino le ali’i o Joe Fa’aaliga i luma o le fa’amasinoga maualuga i le vaiaso ua te’a, e fa’amaonia tu’uaiga o lona le usita’i lea i poloaiga sa tu’uina atu e usita’i i ai, a o taofia ai o ia i totonu o le toese i Tafuna.

E pei ona taua e le fa’amasinoga i le latou ripoti lea ua mae’a ona tuuina atu i luma o le fa’amasinoga maualuga, o le tausaga na te’a nei na sola ai Fa’aaliga i tua mai le toese i Tafuna, ao taofia ai o ia mo le tuliina o lana fa’asalaga fa’a falepuipui, e mafua mai i le fa’alavelave lea na ta’usala ai o ia e le fa’amasinoga maualuga i le moliaga o le talepe fale i le tulaga muamua fa’apea ai ma le gaoi.

O ni isi o poloaiga sa tu’uina atu e le fa’amasinoga maualuga ia Fa’aaliga ina ua ta’usala o ia i mataupu tau solitulafono eseese e lua i le 2013 ma le 2014, e le gata e aua ne’i ona toe solia se tulafono a le malo, a ia avea fo’i o ia ma tagatanu’u e tausisi i tulafono uma a le malo i le umi o lana fa’anofovaavaaia.

O le fautuaga lea ua tu’uina atu e le Ofisa Fa’anofovaavaaia i luma o le faamasinoga fa’asaga i se fa’aiuga mo Fa’aaliga, atoa ai ma le fa’afinauga lea fo’i ua tu’uina atu e le malo, ia fa’aleaogaina loa le faanofovaavaaia a Fa’aaliga, ae poloaina loa o ia na te tuliina le umi e 7 tausaga lea o loo fa’amalumalu mai mataupu na ulua’i ta’usala ai o ia e le fa’amasinoga.

O lo o taofia pea le ua molia i le toese i Tafuna e fa’atali ai le aso lea ua fa’atulaga e lau ai lona fa’asalaga.

Ua talosagaina fo’i e le fa’amasinoga maualuga le Ofisa Fa’anofovaavaaia, ina ia tapena se ripoti e tusa ai o solitulafono uma na ta’usala ai e le fa’amasinoga le ua molia, ma fautua atu i le umi o nei fa’asalaga ua mae’a ona tuli e le ua molia.

FAILAUGA TALOSAGA

E 12 masina lea ua fa’anofovaavaaia ai e le fa’amasinoga fa’aitumalo le ali’i o Failauga Talosaga i le vaiaso ua te’a, e mafua mai ina ua ta’usala o ia e le fa’amasinoga i le moliaga o le faatupu vevesi i nofoaga faitele atoa ai ma le gaoi i le tulaga tolu, e mafua mai i le fa’alavelave lea na ia gaoia ai se telefoni feavea’i, seevae ma ni lavalava i totonu o se ta’avale sa paka i luma o se faleoloa i Fagaalu.

I fa’amaumauga a le fa’amasinoga sa taua ai e fa’apea, o se inugapia sa faia a le ua molia ma ni isi o ana uo, na aga’i atu ai loa le ua molia e fa’atau mai se latou meaai i le faleoloa o loo i Faga’alu lea e tatala fa’asoloatoa mo le 24 itula, ae tau atu ai o loo paka ai se ta’avale o loo vili i lalo le tioata, ae le o i ai se tagata i totonu.

Na tatala e le ua molia le faitoto’a ma ia aveese mai ai se telefoni feavea’i sa i luga o le pito i luma o le ta’avale, sosoo ai ma lona gaoia o se ato fa’afafa sa i le nofoa pito i tua o le ta’avale.

O totonu o le ato sa i ai ni seevae ma ni ofu, ae na faailoa e le ua molia i Leoleo, e moni sa alu ma le ato fa’afafa ae le iloa poo ai o ana uo na latou inu na alu ma lavalava atoa ai ma seevae sa i totonu.

Na faatoese le ua molia i le fa’amasinoga e tusa ai o lana solitulafono sa faia, ma ia talosagaina ai se isi avanoa o ia lea fo’i na talia e le fa’amasinoga. Na fa’aaoga e le fa’amasinoga aso e 6 na taofia ai le ua molia i totonu o le toese e avea ma ana fa’asalaga i lenei mataupu, ae o le a fa’amalumalu lona tuliina o le umi e 30 aso i le toese. Ua poloaina fo’i o ia e le fa’amasinoga ina ia saili sana galuega tumau e galue ma maua ai sona totogi.