Tala otooto o Fa’amasinoga

ALEKI FATA

O le aso 8 o Aokuso lea ua toe tolopo i ai le lauina o le fa’asalaga a le ali’i o Aleki Fata, e mafua mai ina ua faila e le malo i le vaiaso nei tu’uaiga fou fa’asaga ia te ia, e mafua mai i le fa’alavelave lea na faia ai se suiga ma faamaonia ai lona fa’aaogaina o fualaau fa’asaina.

O le vaiaso nei na fa’atulaga e lau ai le fa’asalaga a Fata i luma o le afioga i le ali’i Fa’amasino Sili lagolago ia Fiti Sunia, ina ua ta’usala o ia i le moliaga mamafa o le umia faasolitulafono o vaega o le pauta fa’asaina o le aisa.

Ae ina ua aga’i atu Fata i le fale fa’amasino mo le lauina o lana fa’asalaga, na tauaao faapitoa atu ai loa e le Masela o le Fa’amasinoga le kopi o le tusi saisai fou mai le fa’amasinoga e loka ai o a, ona o tu’uaiga fa’asaga ia te ia, i lona le usitaia lea o tuutuuga o lana nofovaavaaia.

E pei ona taua i le ripoti a le Ofisa Faanofovaavaaia e fa’apea, o le vaiaso na te’a nei na aga’i atu ai Fata e vaai le Ofisa Faanofovaavaaia, e pei ona poloaina ai o ia e le fa’amasinoga.

I lea asiasiga, na faatonuina ai loa e se sui o le Ofisa Faanofovaavaaia ia Fata ina ia faia se suega i lona tino e fa’amaonia ai, na te le o toe tagofia le ‘ava malosi poo fualaau fa’asaina. O le faaiuga o le suega sa faia, na faamaonia ai le maua o le vailaau o lo o i totonu o le pauta o le aisa i le tino a le ua molia.

Ina ua fesiligia o ia e le sui o le Ofisa Faanofovaavaaia, na fa’amaonia ai e Fata lona ulaina o le aisa ma nisi o ana uo i po e 2 ua tuana’i atu, a o le i oo i le aso na faia ai lana suega.

Ina ua valaau le mataupu a Fata i le fa’amasinoga, sa faailoa ai Sunia i loia a itu e lua le mafua’aga o le tusi saisai fou lea ua toe loka ai Fata. E le gata i lea, sa faailoa fo’i e Sunia le teena e le fa’amasinoga o le talosaga ina ia faatulaga se tupe e tatala ai le ua molia i tua.

Na faailoa e le loia a Fata ia Ryan Anderson le tete’e o le ua molia i tu’uaiga fou fa’asaga ia te ia, ma ia talosagaina ai loa le fa’atulaga o se aso e faia ai le ulua’i iloiloga fa’asaga i tu’uaiga fou nei.

O le aso 8 o Aokuso lea ua faatulaga e faia ai le ulua’i iloiloga a Fata e tusa ai o tu’uaiga fou fa’asaga ia te ia. O le aso fo’i lea ua toe tolopo i ai e le fa’amasinoga le lauina o lana fa’asalaga.

Ua toe taofia nei Fata i le toese i Tafuna e aunoa ma se tupe e totogi, e fa’atali ai le aso lea ua fa’atulaga e lau ai lana fa’asalaga ma faia ai lana ulua’i iloiloga.

AVEI ILALIO

O le ali’i lea na loka e Leoleo i le fa’atupu vevesi ae maua ai fualaau fa’asaina i lona tino, ua ia ta’utino i le fa’amasinoga e fa’amaonia tu’uaiga fa’asaga ia te ia.

O le vaiaso nei na tula’i ai Avei Ilalio i luma o le fa’amasinoga maualuga mo le tolaulauina o le maliliega ua mae’a ona latou sainia ma le malo. O le ali’i loia fautua lagolago ia Ryan Anderson na tula’i mo le ua molia, ae o le ali’i loia sili lagolago ia Doug Iowe na tula’i mo le malo.

Na ulua’i tu’uaia e le malo ia Ilalio i le moliaga mamafa o le umia fa’asolitulafono o vaega o le laau faasaina o le mariuana, faapea ai ma moliaga mama e 2 o le faaoolima i le tulaga tolu atoa ai ma le faatupu vevesi i nofoaga faitele.

Ae i le maliliega aufa’atasi ua mae’a ona sainia e Ilalio ma le malo, lea fo’i ua talia e le fa’amasinoga, ua malie ai le ua molia e tali ioe i le moliaga muamua lea ua uma ona toe teuteu e le malo, le moliaga o le umia faasolitulafono lea o vaega o le laau fa’asaina o le mariuana.

I le tali ioe ai o Ilalio i le moliaga e pei ona ta’usala ai o ia, na ia ta’utino ai e fa’apea, i le po o le aso 23 o Iulai 2018 i  Pavaiai, na maua ai e Leoleo i le taga o lona ofu sa fai ni sikaleti mariuana ua uma ona taai.

Na ioe atili le ua molia e fa’apea, na loka o ia e Leoleo ina ua ia faia ni gaioiga e save’u ai le nonofo filemu o tagata o le nu’u ma aiga tuaoi i lea po, ae ina ua saili e Leoleo lona tino ma lona ofu, na maua ai loa sikaleti mariuana.

E pei ona taua e le malo i le maliliega e fa’apea, pe tusa o le itula e 20:39 i le po e pei ona taua, na aga’i atu ai Leoleo i se valaau na sau mai Pavaiai, e faatatau i se alii’ o loo leoleoa ma faatupu vevesi solo i totonu o lea vai aai.

Na taunu’u Leoleo na latou molimauina ai se ali’i o loo laulau vavale ma leoleoa. Ma o ia lea o Ilalio.

Na faailoa e le ua molia i Leoleo, o sikaleti e 2 sa maua ia te ia, na ia fa’atauina mai i se tasi o ana uo i Vaitogi.

O lo o taofia pea le ua molia i le toese e fa’atali ai le aso 2 o Aokuso lea ua fa’atulaga e lau ai lana fa’asalaga.

MAPU LAFITAGA

O le aso 2 o Aokuso lea ua fa’atulaga e lau ai le fa’asalaga a le susuga a Mapu Lafitaga, ina ua ta’usala o ia e le fa’amasinoga maualuga i le moliaga mamafa o le ave ta’avale a o se’i lona laisene, lea e mafai ona faasala ai se tasi i le toese mo le umi e oo atu i le 5 tausaga, ae faamalosia le tuliina o aso e 90 i le toese, pe faasala foi i le salatupe e $5,000.

Na faailoa e Lafitaga i luma o le fa’amasinoga i le latou maliliega ma le malo e fa’apea, i le aso 3 o Oketopa 2018 i luga o le alatele o le malo, na taofi ai e Leoleo le pikiapu sa ia faafoeina ina ua molimauina le faaletonu o se tasi o moli i le pito i luma.

Ina ua fesiligia e Leoleo lana laisene ave ta’avale, sa ia pepelo i ai ua leiloa lona laisene. Mulimuli ane ina ua ia toe faailoa i le Leoleo, o lona laisene o lo o se’i mo le 6 masina, e mafua mai i le solitulafono o le ave ta’avale ‘ona na ta’usala ai o ia e le fa’amasinoga fa’aitumalo i le tausaga na te’a nei.

O se tasi o tuutuuga o le nofovaavaaia a Lafitaga e 12 masina ina ua ta’usala o ia i le moliaga mama o le ave ta’avale ‘ona, o le faasa lea ona ia toe faafoeina se ta’avale mo le 6 masina, o le umi fo’i lea na se’i ai e le fa’amasinoga lona laisene ave ta’avale.

O lo o tumau pea tuutuuga o loo tatala ai Lafitaga i tua e faatali ai le aso lea ua fa’atulaga e lau ai lana fa’asalaga.