Tala otooto o Fa’amasinoga

ONOSA’I NAVELIKA

O le aso 22 o Aperila lea ua fa’atulaga e lau ai le fa’asalaga a le ali’i o Onosa’i Navelika, i le mae’a ai lea ona ta’usala o ia e le fa’amasinoga maualuga i le moliaga o le umia fa’asolitulafono o vaega o le pauta fa’asaina o le aisa.

O le vaiaso nei na tula’i ai Navelika, 58 tausaga le matua i luma o le fa’amasinoga mo le fofogaina o le latou maliliega ma le malo. O le ali’i loia fautua lagolago ia Rob McNeill na tula’i mo le ua molia, ae o le tama’ita’i loia sili lagolago ia Laura Garvey na tula’i mo le malo.

Na ulua’i tu’uaia Navelika i le moliaga mamafa o le umia fa’asolitulafono o vaega o le pauta oona o le aisa, le moliaga e mafai ona fa’asala ai o ia i le toese mo le umi e le itiiti ifo i le 5 tausaga, pe fa’asala i le salatupe e le itiiti ifo ile $5,000, ae le sili atu i le $20,000.

Ae i lalo o le maliliega na sainia e le ua molia ma le malo, lea fo’i ua talia e le fa’amasinoga maualuga, ua tali ioe ai le ua molia i le moliaga mamafa ua toe teuteu e le malo, le moliaga o le umia faasolitulafono o vaega o le pauta oona o le aisa.

I le tali ioe ai o Navelika i le moliaga e pei ona ta’usala ai o ia, sa ia ta’utino ai e fa’apea, i se taimi o le aso 26 o Tesema 2018 i le vaega e paka ai ta’avale a le Falema’i o le LBJ i Faga’alu, sa ia umia ai ma lona iloa vaega o le pauta fa’asaina o le aisa.

Na taua atili e le ua molia e fa’apea, i le aso e pei ona taua, sa ia ulaina ai se paipa tioata o loo i ai vaega o le aisa i totonu, ma le fa’amoemoe e fa’aala ai ona mata ao tausi ma’i ai i le gasegase o si ona grandson sa taofia i le potu tigaina o le ICU.

Ina ua maua e Leoleo o ia i lea aso, sa ia taumafai e nana le paipa tioata, mulimuli ane, na mafai lava ona maua e Leoleo ma pu’e fa’apagota ai loa o ia.

Ua tatalaina nei i tua le ua molia e aunoa ma se tupe e totogi, e fa’atali ai le aso e lau ai lana fa’asalaga. Na fa’ailoa e le afioga i le ali’i fa’amasino sili ia Michael Kruse ia Navelika e fa’apea, afai na te toe solia se tulafono i le taimi lenei ao lei oo atu i le aso e lau ai lana fa’asalaga, o le a sili atu loa ona mamafa se fa’asalaga e tuuina atu e le fa’amasinoga ia te ia.

SOLOFUA MOLIAGA FA’ASAGA IA SAVELIO VAIMOE

Ua solofua e le afioga i le ali’i Fa’amasino ia Elvis P. Patea le tagi a le malo fa’asaga ia Savelio Vaimoe, ina ua le mafai e le malo ona fa’amaonia tu’uaiga fa’asaga ia te ia, i le taimi o le ulua’i iloiloga o lenei mataupu i le vaiaso nei.

Na faailoa e Patea i le malo e fa’apea, e tatau ona latou vaavaai poo a tonu moliaga e talafeagai ma le fa’alavelave sa tula’i mai, ina ia talafeagai ai moliaga e faia fa’asaga i le ali’i ua tu’uaia.

O le tama’ita’i loia fautua lagolago ia Anna Whiles na tula’i mo Vaimoe, ae o le ali’i loia sili lagolago ia Jason Mitchell na tula’i mo le malo.

Talu mai le aso na tula’i mai ai lenei fa’alavelave, na taofia mai ai lava Vaimoe i le toese i Tafuna e aunoa ma se tupe na fa’atulaga e tatala ai o ia i tua. O le mae’a ai o lana iloiloga i le vaiaso nei, na tatala ai loa o ia i tua i lona aiga.

Na tu’uaia e le malo ia Vaimoe i moliaga o le taumafai e fasioti se tagata atoa ai ma le faaoolima i le tulaga muamua. O ia moliaga na afua mai i le fa’alavelave lea na tu’uaia ai o ia i lona tuuina lea o se naifi (tulou) i le ua o lana sponsor ma le fa’amoemoe e fasioti ai o ia.

E to’atasi le molimau na valaau e le malo i le taimi o le ulua’i iloiloga, o le tama’ita’i Leoleo Su’esu’e ia Det. Vasa Wells. Na taua e Wells i lana molimau e fa’apea, o le aso 21 o Ianuari 2019 na ia maua ai se telefoni mai lona ta’ita’i e fa’apea, o lo o i ai se tagata na momoli atu e se sui o le Ekalesia ma se fa’amatalaga, sa ia fasiotia se isi tagata.

Na taua e Wells e fa’apea, i le la talanoaga ma le sponsor sa faailoa atu ai e le sponsor ia te ia e fa’apea, ao moe i lona fale, sa faateia o ia ina ua alu atu se tagata ma taumafai e fasioti o ia. Na te le iloaina poo ai, ae o loo tau i ai lava ona masalosaloga i le tagata sa ia faia lea tulaga.

Na taua fo’i e le molimau le la talanoaga ma Vaimoe e tusa ai o le fa’alavelave. Na taua e Vaimoe i le Leoleo e fa’apea, sa le muta lona mafaufau alofa pea i lona aiga, ma le tulaga ua le maua ai se latou tupe mai le siaki o le FEMA na maua e lana sponsor, i le mae’a ai lea o le Afa malosi o Gita sa a’afia ai le atunu’u i le tausaga na te’a nei.

Sa ia mafaufau fo’i e faapea, na pau le auala e fa’amuta ai nei mafaufauga o le fasioti lea o lana sponsor. Sa ia alu ma se ato o loo i ai se tama’i naifi faapea ai ma se fagu vailaau ma le fa’amoemoe a mae’a ona ia fasiotia lana sponsor, ona fasioti loa fo’i lea ma ia.

Na taua e le molimau i lana fa’amatalaga le aga’i atu o Vaimoe i le fale o lana sponsor i Faleniu ma ia iloa ai o loo moe o ia, sa ia tago loa i le naifi ma sesele lona ua. O le mae’a ai o lana sesele lona lua, na ia vaaia ai le ala i luga o lana sponsor, o lea na ia alu ai loa i le atoa.

Na manino i le molimau a le tama’ita’i Leoleo, e leai ni manu’a na a’afia ai le ua o le sponsor mai le gaioiga sa fa’atino e le ua molia.

O le mae’a ai ona fa’atino e Vaimoe i lenei gaioiga, na ia aga’i atu ai loa i se Falesa latalata ane ma faailoa i tagata o le Ekalesia o loo i ai, e mana’omia le momoli o ia i le ofisa o Leoleo, ona o lea fa’atoa mae’a ona ia fasiotia se tagata.

I le mae’a ai ona iloilo e le faamasinoga o mau e uiga i lenei mataupu, na solofua ai loa e le afioga i le ali’i Fa’amasino ia Patea le tagi a le malo fa’asaga ia Vaimoe.

LEMASANIMALEEA MAPU

E 12 masina lea ua nofovaavaaia ai le ali’i o Lemasanimaleea Mapu, ina ua ta’usala o ia e le fa’amasinoga fa’aitumalo i le moliaga mama o le fa’atupu vevesi i nofoaga faitele. O se vevesi na tula’i mai i le aso 10 Aokuso 2018, na a’afia ai Mapu ma nisi o ali’i se to’a 6 i se vevesi, lea na i’u ina aga’i atu Leoleo ma pu’e fa’apagota mai ai o ia atoa ai ma isi ali’i sa i ai i le vevesi.

O nisi o tuutuuga o le nofovaavaaia a Mapu, o lona totogi lea o le salatupe e $150 ma ia saili sana galuega e galue ai mo le totogiina o lana sala. Na faailoa e le afioga i le ali’i fa’amasino ia Elvis P. Patea ia Mapu, e le o misi i le vaai a le fa’amasinoga ana solitulafono e 2 sa ta’usala ai o ia e le fa’amasinoga i le 2015 ma le 2016, lona uiga, e tatau ona i ai se suiga i lona olaga.