Tala otooto o Fa’amasinoga

IOANE FAIMATA

E 7 tausaga lea ua fa’asala ai e le Fa’amasinoga Maualuga le ali’i o Ioane Faimata e taofia ai i le toese i Tafuna, ina ua fa’amaonia e le fa’amasinoga le moliaga mamafa o le talepe fale i le tulaga lua sa tu’uaia ai o ia e le malo.

O le vaiaso nei na tula’i ai Faimata i luma o le fa’amasinoga mo le lauina o lana fa’asalaga. O le ali’i loia fautua lagolago ia Rob McNeill na tula’i mo ia, ae o le tama’ita’i loia sili lagolago ia Laura Garvey na tula’i mo le malo.

Ina ua maua lona avanoa mai le fa’amasino sili ia Michael Kruse, na fa’atoese ai loa le ua molia i le fa’amasinga atoa ai ma le malo o Amerika Samoa, e tusa ai o lana solitulafono sa faia, lea ua mafua ai ona taofia o ia i le falepuipui. Na taua e le ua molia e fa’apea, na avea le malosi o faaosoosoga a ana uo, atoa ai ma le una’i atu a le Tiapolo, na mafua ai loa ona ia faia le fa’aiuga e soli le tulafono.

“Ao lenei taeao, ua ou lagona lo’u salamo ma lo’u sese i le solitulafono sa ou faia, o le ala lea ou te talosaga ai ma le loto vaivai, faamolemole tu’u mai isi avanoa mo a’u se’i o’u toe fo’i atu ai i lo’u aiga e fai so’u aoga i nai o’u matua,” o le talosaga lea a Faimata.

Na fesili Kruse ia Faimata, pe fa’apefea ona alu i tua e tausi lona aiga ma fai sona aoga, o lea e tuli le isi ana fa’asalaga fa’a falepuipui e 5 tausaga, ina ua fa’aleaoga e le afioga i le ali’i fa’amasino ia Elvis P. Patea lana nofovaavaaia, ma poloaina ai loa o ia i le masina o Ianuari na te’a nei e tuli le umi o loo totoe o lana nofovaavaaia e 5 tausaga.

E lei tali Faimata, ae sa na o le nofo ma le maligi o ona lolimata.

Na tutu fa’atasi le loia a le malo ma le loia a Faimata e finau i le fa’amasinoga, ina ia tuli fa’atasi se fa’asalaga o le a tuuina atu ia Faimata, ma lana fa’asalaga o loo tuliina i le taimi nei.

I le mae’a ai ona iloilo e ali’i fa’amasino o mau fa’amaonia o le mataupu fa’asaga ia Faimata, na tuuina mai ai loa e le afioga ia Kruse le faaiuga a le fa’amasinoga, e faa falepuipui Faimata i le toese mo le umi e 7 tausaga, peita’i, ona o talosaga a loia, ua talia ai e le fa’amasinoga, o le a tuli fa’atasi le fa’asalaga e 7 tausaga ma le fa’asalaga e 5 tausaga o loo tuliina nei e le ua molia i le toese.

Na taua e le fa’amasinoga e fa’apea, e atagia mai i faamaumauga a lenei ali’i, o le tausaga e 2012 na ta’usala ai o ia i le moliaga o le talepe fale, a o lea fo’i ua toe ta’usala o ia i le 2019 i le moliaga lava lea e tasi o le talepe fale.

TOE A’AFIA FO’I WAYNE GASOLO I LE TULAFONO

O se ali’i o loo nofovaavaaia i luma o le fa’amasinoga maualuga i le taimi nei, na toe pu’e fa’apagota e Leoleo fa’atasi ma nisi ali’i se to’alua, ona o tu’uaiga i lo latou fa’atupu vevesi i nofoaga faitele.

O Wayne Gasolo, faatasi ai ma Taiana Vaueli ma Sililoto Tali na tutula’i uma i latou i luma o le fa’amasinoga fa’aitumalo i le vaiaso nei, ma o latou teena le moliaga o le faatupu vevesi o loo tu’uaia ai i latou.

Ua toe tatala i tua ia Vaueli ma Tali, ae o Gasolo, e $1000 le tupe lea ua fa’atulaga e totogi ona fa’atoa mafai lea ona tatala o ia i tua. O se vevesi na tula’i mai i se Fale Su’isu’i i le itu i sisifo o le atunu’u, na mafua ai ona aga’i atu Leoleo ma pu’e fa’apagota mai i latou nei e to’atolu.

O le tausaga e 2017 na ta’usala ai e le fa’amasinoga ia Gasolo i lona umia faasolitulafono o vaega o le laau faasaina o le mariuana, ma faanofovaavaaia ai loa o ia mo le 5 tausaga i lalo o tuutuuga, na te tuliina masina e 20 i le toese i Tafuna.

A o tuli ai lana fa’asalaga i le toese, na toe a’afia Gasolo i le tulafono i le tausaga na te’a nei, ina ua fa’amaonia i se suega sa faia ia te ia faatasi ai ma isi pagota se to’alua, lo latou fa’aaogaina o le pauta oona o le aisa.

ALESANA SEFO

O le ali’i lea o loo tu’uaia i lona ave faagaoi o ni meatotino a se aiga tuai atoa ai ma lona ulufale fa’amalosi i totonu o le fale, ua ia talosaga i le fa’amasinoga ina ia fa’atulaga loa se aso e faia ai lana fa’amasinoga autu.

O loo tete’e malosi Alesana Sefo i le tagi a le malo fa’asaga ia te ia. O le vaiaso nei na toe valaau ai le mataupu a Sefo i luma o le afioga i le Fa’amasino Sili ia Michael Kruse. O le ali’i loia ia Rob McNeill na tula’i mo ia, ae o le tama’ita’i loia sili lagolago ia Laura Garvey na fai ma sui o le malo.

Ina ua valaau le mataupu a Sefo, na fa’ailoa ai loa e lana loia e fa’apea, ua mae’a ona la tauaaoina mau faamaonia ma ripoti a Leoleo mai le malo, faatasi ai ma se ofa sa tuuina atu mo Sefo. Ae ina ua mae’a ona la iloilo ma faitau i le ripoti faapea ai ma le ofa, na teena ai loa e Sefo le faia o se maliliega, ae ua ia manatu e faataunuu loa sona fa’amasinoga autu.

O le masina o Me o le tausaga fou 2020 ua faamoemoe e faia ai le fa’amasinoga autu o lenei mataupu, ma o loo taofia pea Sefo i le toese ina ua le mafai ona ia totogi le tupe e $10,000 sa fa’atulaga e tatala ai o ia i tua.

STUART HUDSON

O le Tama e 56 tausaga lea o loo tu’uaia i lona umia fa’asolitulafono o vaega o le pauta fa’asaina o le aisa, ua ia finau i le fa’amasinoga e fa’atulaga loa se aso o lona fa’amasinoga.

O loo tete’e malosi Stuart Hudson i le tagi a le malo fa’asaga ia te ia. O le tagi a le malo, na tula’i mai ina ua fesiligia o ia e Leoleo i le Ofisa o Leoleo i Tafuna i le tauasga na te’a nei i se isi mataupu, ae vaaia ai e Leoleo se taga pepa iila o loo ta’atia i tafatafa o le nofoa o loo saofa’i ai Hudson.

O loo taua i le tagi a le malo e fa’apea, na iloa atu e Leoleo le taimi na tago ai Hudson i le taga o lona ofuvae sa fai ma le fa’amoemoe e aumai i fafo lana pepa sikaleti, ae fa’afuase’i ona pau mai ai ma le pepa o loo i ai vaega papa’e o le pauta oona o le aisa.

Na finau malosi Hudson i Leoleo i le taimi lea, e le o ia e ana fualaau fa’asaina, e lei maua fo’i se mea i lona tino, ae sa ta’atia i le vaega tonu lava sa nofo ai.

O loo taofia pea Hudson i le toese e fa’atali ai le masina o Aokuso o le tausaga fou 2020 lea ua fa’atulaga e fa’ataunu’u ai lona fa’amasinoga autu.