Tala otooto o Fa’amasinoga

AMEPEROSA VUI

Na faailoa e le afioga i le ali’i Fa’amasino ia Fiti Sunia i le ali’i o Ameperosa Vui ina ua toe tula’i fo’i o ia i luma o le Fa’amasinoga Fa’aitumalo i le vaiaso na te’a nei e faapea, e tatau ona ia sailia se auala e foia ai le fa’afitauli o le ‘ava malosi o loo a’afia ai o ia.

E mafua lea tulaga, ona o le tausaga e 2012 na amata a’afia ai Vui i le tulafono, ma fa’aauau mai ai lava seia aulia mai le vaiaso na te’a nei. E pei ona taua i fa’amaumauga a le fa’amasinoga, o mataupu uma lava e pei ona molia ai e le malo ia Vui ma ta’usala e le fa’amasinoga, e a’afia ai lava le ‘ava malosi.

O le vaiaso na te’a nei na pu’e fa’apagota ai fo’i e Leoleo ia Vui ma taofia i le toese i Tafuna, ona o tu’uaiga o le fa’atupu vevesi i nofoaga faitele, e aofia ai ma le faaoolima i le tulaga tou. O se vevesi na tula’i mai i le afioaga i Iliili i le vaiaso na te’a nei ina ua vevesi se inugapia a Vui ma nisi o tupulaga, ma fa’ai’u ai loa i le fa’aoolima o Vui i se tasi o ali’i talavou.

O tuutuuga e pei ona tatala ai i tua Vui, e le gata ua fa’asa ona ia toe tagofia le ‘ava malosi, ae ua fa’asa fo’i ona ia toe mafuta atu i ali’i sa latou inupia, lea na mafua ai ona tula’i mai le vevesi.

O le aso 30 o Ianuari o le tausaga fou lea ua fa’atulaga e toe valaau ai le mataupu a Vui i luma o le fa’amasinoga.

FA’AMANATU ALESANA

O le ali’i e 25 tausaga lea na tu’uaia i lo latou osofaia ma ni ali’i talavou se fale ae gaoi meatotino ma se tupe, ua ia ta’utino i le fa’amasinoga maualuga e moni tu’uaiga fa’asaga ia te ia.

Na ulua’i tu’uaia e le malo ia Fa’amanatu Alesana i moliaga mamafa e 2 o le gaoi ma le talepe fale i le tulaga muamua, ae i lalo o se maliliega na sainia e le malo ma le ua molia, na malie ai Alesana e tali ioe i le moliaga o le gaoi.

I le tali ioe ai o Alesana i le moliaga e pei ona ta’usala ai o ia e le fa’amasinoga, sa ia ta’utino ai e fa’apea, i se taimi o le po o le aso 24 o Aperila 2018, sa latou osofaia ai ma ni ali’i talavou se to’alua le faleoloa o Chin Store i Tafuna ma gaoia ai le tele o oloa sa i totonu e aofia ai ma se tinoitupe. O oloa sa gaoia e aofia ai telefoni, sipika, faapea ai ma se laptop.

Ina ua fesiligia e le fa’amasinoga ia Alesana poo fea oloa sa latou gaoia, ae na tali le ua molia, e na o le tupe sa alu ma ia, ae o oloa na ave e ali’i talavou sa latou osofaia le faleoloa.

O loo taofia pea Alesana i le toese i Tafuna e fa’atali ai le aso 6 o Fepuari o le tausaga fou lea ua fa’atulaga e lau ai lana fa’asalaga.

OKESENE FINAUGA

O le ali’i lea na taofia e Leoleo i le toese i Tafuna talu mai le masina o Mati o le tausaga nei, ua tatalaina nei o ia i tua ina ua solofua e le fa’amasinoga le tagi a le malo sa faia fa’asaga ia te ia.

Ina ua valaau le mataupu a le ali’i o Okesene Finauga i luma o le fa’amasinoga maualuga i le vaiaso na te’a nei, na fa’aalia ai e le loia a le malo ia Laura Garvey se talosaga ina ia solofua le tagi sa faia fa’asaga ia Finauga.

Na faamanino atili e Garvey e fa’apea, ua mae’a ona oo atu le pule o le Kamupani sa galue ai Finauga ma faailoa ai, e le o manino lelei i a latou faamaumauga pe sa gaoia e Finauga se tupe mai le kamupani pe leai. E mafua lea tulaga ona ua fiu le Kamupani e tau tu’u fa’atasi lisiti e faamaonia ai tu’uaiga fa’asaga i lenei ali’i, ae foliga mai e le o maua lava se faamaoniga.

Ona o lea tulaga, na talosagaina ai loa e le malo le fa’amasinoga ina ia solofua le tagi sa latou faaulu fa’asaga ia Finauga.

O Finauga na tu’uaia i moliaga mamafa o le gaoi atoa ai ma le ave faagaoi o oloa ma tupe sa tuuina atu i lalo o lana vaavaaia.

I le mae’a ai o masina o 9 talu ona taofia Finauga i le toese, ua toe tatalaina nei o ia i tua i le vaiaso na te’a nei.